GUTULEDWA 11

1Hwane nya satshavbo sesi nyi di ningwa tshava nya gu fane ni ndronga, yi vboha yi nyi embela khiyo: "Khuga u pime Nyumba ya Nungungulu gumogo ni giluvelo, u wuya u gu saya vathu va khozelago umo. 2Aholu, u nga pimi tendrela wu randredego Nyumba ya Nungungulu khu vbavbandze kholu wu ningedzidwe va nya mayigo va na gandredzelago lidhoropa nya gukatege ndrani nya magumi mana na mivili migima yitago. 3Nyi na rumela dzifakazi dzangu dza dzimbili na dzi ambade gilendra gasi guphrofeta mahungu ya Nungungulu, gipimo nya likhumi mazana ni mazana mavili ni livbandre na limwedo magumi matshigu." 4Dzifakazi dzedzi nya dzimbili khu misimbo mivili nya miolivha, gumogo ni dzikandriya dzimbili dzi guromo mbeli ga Pfhumu nya litigo. 5Uye a na gu vbwetago gu dzi ghohetela, a na khale na gu dziti gu khuye gu na duga nilo khu kanani gwawe, wu na gu vbedzago valala vawe. Vale va na lingago gu dzi ghohetela va na fisa guralo. 6Dzifakazi dzedzi dzi na ni tshivba nya gusege ndzadzi yi siwi ndrani nya matshigu yatshavbo nya wuphrofeti wawe, ni tshivba gambe nya guvbindrugedze mati ma gu khala novba, ni gu tsayisa litigo khu mafumbu yatshavbo nya mitungu. 7Gikhati dzi na vbedzago gu fakaza; gi na duga khu phalani girengo gi dwana nadzo. Girengo gi na pala gi gu songa dzifakazi. 8Sirumbi sawe si na khala tshandzala mu dzindzilani nya lidhoropa likhongolo, li ranwago khu gipimaniso pwani Sodhoma ni Egipito, umo gambe Pfhumu yawe yi nga khokhothedwago umo. 9Sirumbi sawe si na wonwa khu vathu nya mayigo, ni mafumbo, ni malimi ni mifumu yatshavbo, ndrani nya matshigu mararu ni gipandre, gambe kha va na dzumedziswa gu si dzinga. 10Vathu va tigoni va na nengedziswa khu gufa nya dzifakazi dzedzi dza dzimbili. Va na ghiya bwelo khavbo va rumelana siningwa nya malosedzela, kholu vaprofeti vava va vavili va di gu va pwisisa wuvi. 11Aholu, khu hwane nya matshigu ya mararu ni gipandre, lidita khu ga Nungungulu Liphuvbo nya guvbanyise lita bela sirumbini mule. Sirumbi si di khuga si gu ema, vatshavbo avo va nga si wonago, va di bedwa khu hwanga ni rerema nya yi khongolo ngudzu. 12Khavbo avbo, va dipwa lito na li gu ganela khu tshivba ni tshivba li guta khu ndzadzini, li va embela khilo: "Litani muta eno!" Va di lita vaya ndzadzini, vari vbakari nya mapfhi, na va gu wonwa khu valala vawe. 13Gikhati gyogyo, gu di dugelela girevareva nya gikhongolo. Gipandre nya likhumi nya lidhoropa gi di pfhungumudwa. Livbandre na mavili magumi mazana nya vathu va fude khu girevareva gyogyo. Ava va nga vbulugago va di tala khu rerema va gu dhumisa Nungungulu wa ndzadzini. 14Khidzo gi nga vbindrisa idzo gitsayiso nya wuvili. Aholu igyo nya wuraru gyomo vbafuvbi ni gu vboha. 15Ngilozi nya livbandre na dzivili yi di womba pundru. Khavbo avbo, gu di pwala ndzadzini na va gu kulungela khu tshivba khavo: "Olu, Mufumu nya litigo wa gu lumba Pfhumu yathu, ni Mesiya a na fumago kala gupindruga nya gupindruge." 16Madhota yatshavbo nya magumi mavili na mana ma khadego vbasikhalotunu nya wufumu mbeli ga Nungungulu, ma di noga kala vbavbatshi, ma gu khozela Nungungulu 17na ma gu khayo: "Ethu hi ngu gu bonga Pfhumu,Nungungulu nya tshivba yatshavbo,wule a gu uye, wule a nga bani ari uye, wule a vbwetago guta.Kholu u hakhide tshivba yago nya yikhongolo, gambe u phede gufuma! 18Mayigo ma di gu wugede khu tshivba,aholu gi vbohide gikhati gyago nya guphodze.Khigyo egi gikhati nya gulamule avo vafudego ni gu tshatshazela sithumi sago, vaphrofeti; ni sihathwa, ni vatshavbo vale va ningago githawo lina lago, sanana ni vakhongolo.Gi vbohide gikhati nya gumbembise vale va saselago litigo." 19Khavbo avbo, Nyumba ya Nungungulu a guromo ndzadzini yi di tulega, yi gu wonega Ngasa nya gidzumeledzwano gya Nungungulu, khu gikhati gyogyo, gu di lasa, gu pandra mabara, gu duga girevareva, ni maralala.

will be added

X\