GUTULEDWA 10

1Khavbo avbo, nyi di wona yimbe ngilozi nya tshivba na yi gu tshiga khu ndzadzini, na yi ambade lipfhi; hungoni gwaye wu diromo wulaho wa ndzadzini, khovbe yaye yi di fana ni lidambo, mawundru yaye kha nga siguni nya nilo. 2Yi di pharile mandzani libhuku na li tudwe. Yi di gandra phwani khu ngondro wa nyamudye, khu ngondro wa nyambade yi gu gandra mafuni, 3gi di khusedza lito khu tshivba gu fana ni nghala ya gu bani yi ngurangura. Khavbo avbo, ma di dzegela gu phindrula livbandre na mavili mabara. 4Ga gikhati gile, nyi di vbweta gu lova, aholu nyi dipwa lito nya gute khu ndzadzini li nyi embela khilo: "Vegedza sihaloni iso si nga ganedwago khu livbandre na mavili mabara. U nga lovi gilo." 5Khavbo avbo, ngilozi nyi nga yi wona na yi emide yi gandra phwani ni mafuni, yi di khusedza libogo la nyamudye gi nonedza ndzadzini, 6yi gu sambanya khu lina la wule a vbanyago kala gupindruga, a gu uye muvangi nya ndzadzi ni mafu ni yiphwa ni sivangwa satshavbo, khiyo: "Gikhati gi vbede ni iso si guromo umo! 7Aholu ya gu kala yi gu womba pundru ngilozi nya livbandre na dzivili, khavbo yi na gu tadzisegago misihalo ya Nungungulu, iyo a nga yi tivisago ga sithumi saye, a gu vaphrofeti." 8Lito lile la ndzadzini nyi nga lipwa, li di wuya li nyi embela gambe khilo: "Indra uya dzega gibhukwana nya gutudwe gi guromo mandzani ga ngilozi yile yi emidego, yi gandra yiphwa ni mafu." 9Eni nyi di hongola ga ngilozi nyi ya yi lomba libhuku. Ngilozi yi di nyi embela khiyo: "Li dzege u li hodze; kanani gwago li na lombela kha nga wulombe, aholu li na gu vava girumbuni gwago." 10Nyi di hakha libhuku mandzani ga ngilozi nyi li hodza, kanani gwangu li di lombela nga wulombe, aholu, na nyi li midzide, ndrani gwangu gu di vava. 11Khavbo avbo, nyi di embedwa gambe, pwani: "Gu vbwetega u simame guphrofeta, u thuledza mafumbu nya mangi, u laye mayigo, malimi ni vafumeli."

will be added

X\