GUTULEDWA 1

1Khugo ogu gutuledwa ga Jesu Kristo, ugo a nga ningwago khu Nungungulu, gasi a yeyedze ga sithumi saye iso si guromo vbafuvbi ni gu girega. Kristo tiviside silo sesi khu ga ngilozi yaye a nga yi rumelago ga githumi gyaye Johane. 2Uye a gu fakazi nya magana ya Nungungulu, ayo ma ngata tiyiswago khu Jesu Kristo, khu satshavbo esi a nga si wonago. 3Kategide wule a hevbulago libhuku leli; va kategide navo vale vapwago magana yaya nya wuphrofeti, va ma vegedza myonyoni gwawe sil9 si lovidwego, kholu satshavbo sesi somo vbafuvbi nya gugirege. 4Eni Johane nya gu lovela livbandre na mavili mabandla ya Asiya, kheni: wuhigo ni gurula gu na khale ni enu khu ga wule a gu uye, a nga bani ari uye, a gu uye a natago, ni ga livbandre na mavili maphuvbo, ma gomogo mbeli nya gikhalo nya wufumu waye. 5Ni ga Jesu fakazi nya guthembege, matiwula nya vafi vatshavbo a gu Pfhumu nya vafumeli va mafuni. Uye a hi haladzago vbaladzile novba waye gasi gu hi handza sighoho sathu, 6a gu hi gira vafumeli ni vaphasi nya mhamba ya Nungungulu Babe waye. Khyaye gidhumo ni tshivba kala gupindruga. Amen. 7Mu ngu mu wona, Kristo a guta khu mapfhini; vatshavbo va na mu wona, ambari vale va nga mu songago, mafumbu yatshavbo ya mafuni ma na dzi laya khu kotani gwaye. I tiyiso: Amen. 8Pfhumu Nungungulu wari khuye: "Kheni Alfa ni Omega! Wule a gu uye, a nga bani ari uye, wule a natago; a gu uye Nungungulu nya tshivba yatshavbo." 9Eni Johane nyi gu ndriyanu, muhengeli ni enu sigaradzoni, gufumani, ni gutimiselani khu ga Jesu Kristo, nyi di vbagedwe nyi manega gidwane gya Patmosi kotani nya gu pwadze mahungu ya Nungungulu ni gu fakazela Jesu Kristo. 10Khu litshigu la Pfhumu nyi di tshigedwa khu Liphuvbo, nyipwa hwane gwangu lito nya likhongolo nya nga pundru, na ligu khilo: 11"Iso u si wonago, si love libhukuni, u li rumela ga livbandre na mavili mabandla ya Asiya a gu aya: Efeso, Esmirna, Pergamo Tiyatira, Sardesi, Filadelfiya ni Laodikeya." 12Eni nyi di thendregedza gasi gu wona khu mani a ganelago ni eni. Na nyi thendregedzile nyi di wona livbandre na dzimbili dzikandriya nya ndralama. 13Vbakari nya dzikandriya nyi di wona moyo nya gufane ni Mwamana wa Muthu, na ambade ngandzu nya gulaphe, na hungide libhandri nya ndralama vbakhanatunu. 14Ndzudzu wa hungoni gwaye wudiri wa guaga, kha nga mawoya nya guage mwendro kha nga hunguva; maho yaye ma di ngangamela kha nga nilo. 15Migondro yaye yi di fana ni sugu nya gungangamele niloni; lito laye li di fana ni ligwaha nya talo nya mati. 16Khu nyamudye a di pharide livbandre na dzimbili dzinyeledzi; khu kanani gwaye gu di duga litshari nya gulodzwe eno ni eno. Khovbe yaye yi di fana ni lidambo nya gungangamele khu tshivba yaye yatshavbo. 17Gikhati nyi nga mu wona, nyi di thega migondroni gwaye kha nga muthu nya gufe. Aholu, uye a di nyi handzega libogo laye la nyamudye, khuye: "U nga thavi! Eni kheni guphela ni guhegisa. 18Kheni wule a vbanyago. Nyi di fude, aholu olu nyi ngu vbanya kala gupindruga. Nyi nani dzipfhungulo nya lufu nedzi nya litigo nya vafi." 19Khu kharato, lova iso u nga siwona: Iso si guromo olu, niso si na gu giregago hwane nya esi. 20Sihalo nya livbandre na dzimbili dzinyeledzi u nga dzi wonago na nyi pharide khu nyamudye, nuwo nya livbandre na dzimbili dzikandriya nya ndralama, tshamuselo wakone khoyu: Livbandre na dzimbili dzinyeledzi dza gu tshamusela dzingilozi dza Nungungulu nya livbandre na mavili mabandla. Gasi, livbandre na dzimbili dzikandriya dza gu tshamusela livbandre na mavili mabandla.

will be added

X\