VAFILIPI 4

1Khu kharato, vandriyangu, sigodwa sangu, nyi mi suvago ngudzu, enu khenu gunengela ni tshatshazelo wangu, simamani gu khala khu gu tiya linani ga Pfhumu. 2Nyi ngu lomba Evodiya ni Sintiki gu kheni va vbanye khu gu pwanana kha nga edzi a golago khidzo Pfhumu. 3Nyi ngu gu lomba uwe pari yangu nya gutumbege, u va phasedzele. Kholu avo va dwanide gumogo ni eni thumoni nya gutivise Mahungu nya Yadi gumogo ni Klementi, ni vatshavbo nyi nga hengelago navo thumoni, malina yawe ma lovidwego libhukuni nya womi. 4Nengelani ga Pfhumu; nyi ngu engedza gu mi embela, nengelani. 5Wuwadi wanu wu na wonege ga vathu vatshavbo. Pfhumu a nata nyamba hwela. 6Mu nga garadzegi khu gilo. Omu nya milombelo yanu lombani esi mu si vbwetago ga Nungungulu, khu monyo nya gubonge. 7Gurula ga Nungungulu gu dzi kodzago gu vboha ni omu hi si gu alakanyigo, gu na sayise myonyo ni mapimo khu ga Kristo Jesu. 8Khu guhegisa, vandruye, nyari kheni thelani kota khu esi nya lisine, nya gululame, nya guyele, nya guagiswe, nya gugolege, esi nya wuzundzo, nya ndruda, si yelago gu dhumiswa. 9Guvbanyani gwanu thumisani esi mu hevbudego gwangu, esi mu nyi pwidego na nyi gu ganela ni esi mu nyi wonego na nyi gu gira, kharati, gurula ga Nungungulu gu na khala ni enu. 10Nyi nengede ngudzu ga Nungungulu kholu enu mu nyi giredego gambe silo nya gusalalegise monyo. Kha nyi ganeli gu kheni nyi di gualakanya gu kheni mu nyi divade. Mu di gu nyi dundruga, aholu mu di si gu mani gikhati nya gu nyi girele gilo. 11Kha nyi ganeli esi khu gu dilela gilo, kholu nyi hevbulede gu eneledwa basi khu esi nyi gu naso. 12Eni nyi ngu kodza gu vbanya wusiwanani ni gumanelani. Nyi hevbulede guvbanya monyo wangu wu na salalegide gikhati gyatshavbo: gani nya gukhura, gani nya gupwa ndzala, gani nyi ngu si mana, gani si ngu nyi kenelela. 13Nyi ngu kodza gupala satshavbo tshivbani ya ule a nyi tiyisago. 14Ambari ulo, enu mu giride gwadi mu hengedego ni eni sigaradzoni gwangu. 15Enu Vafilipi, mu ngu dzitini gwadi gu khenu, guhegulani, gikhati nyi phedego thumo nya gutivise Mahungu nya Yadi, gikhati nyi hongodego Makedhoniya Libandla lanu khilo basi li nga nyi phasa. Mu hengede ni eni khu guninga ni guhakha. 16Na nyi ngari dhoropani ga Tesalonika, dzinyondro dzingi mu nyi rumedego silo nya gu nyi phasedzele wusiwanani gwangu. 17Khandri gu khwatshi nya gu dwanela miningelo, aholu nyi ngu gola mu engedzedwa wuhindzi wanu. 18Eni nyi naso satshavbo khu gutala nya iso. Olu nyi hakhidego satshavbo esi mu nga nyi rumela khu mandzani ya Epafrodito, nyi si mane khu gutala guvbindra esi nyi si vbwetago. Ningelo yoyu kha nga mahema nya yadi nya mhamba yi hakhwago khu Nungungulu yi mu salalegisa. 19Nungungulu wangu a na mi phase khu satshavbo mu si vbwetago, khu gutala nya wufumu ni wudhumo waye ga Kristo Jesu. 20Wudhumo wu na vegwe ga Nungungulu Babe wathu kala gupindruga. Amen. 21Losedzelani vatshavbo va khodwago ga Jesu Kristo. Vathu va Nungungulu nyi vbanyago navo va ngu mi losedzelani navo. 22Vatshavbo, ngudzungudzu ava va dugelago nyumbani ga Mwamangulu va ngu mi losedzela. 23Makategwa ya Pfhumu Jesu Kristo ma na khale ni enu mwatshavbo.


Copyright
Learn More

will be added

X\