VAFILIPI 2

1Khavbo avbo, mwa gu bani mu mane gutiya khu ga Kristo, ni gutangadziswa khu lihaladzo laye, ni gu tshanganiswa khu Liphuvbo laye, mwa gu bani mu li pima lihaladzo li guromo vbakari gwanu, 2nyi ngu mi lomba gu kheni mu tadzise gutsaka gwangu khu gu, mwatshavbo mu hengele mapimo mawowo, lihaladzo limwedo, hefemulo moyo ni gudogorela gumogo basi. 3Mu nga girini gilo khu monyo nya gudwanele gu dzi khusedza mwendro khu matshandza nya mahala, aholu, girani khu gu dzi sodzisa, mu dzi gira va nyalidede ga vathu vatshavbo. 4Muthu ni muthu a nga dwaneli basi gusayisa esi si gu saye, aholu, a na dzi garadze gambe khu sile si gu sa vangana. 5Gu vbwetega mavbanyelo yanu ma fanana ni mavbanyelo ya Kristo Jesu. 6Uye a gu Nungungulu khu tumbunuko waye gima kha dzina guhengula wurendra waye nya gukhale idzo saye ni Nungungulu. 7Aholu a di diga wufumu waye a gu dzi gira khumbi,a dzi gira idzo saye ni vathu.Na gu vbanya khu makhalelo nya wuthu, 8a di dzi vbwasamisa abune,a yingisa kala gufa khu gu songwa vbagihambanotunu. 9Khavbo avbo, Nungungulu khusedzide Jesu a mu ninga lina nya wudhumo guvbindra malina yatshavbo; 10gasi, khu kotani nya wudhumo nya lina la Jesu,sivangwa satshavbo sa ndzadzini,ni mafuni ni vbavbatshi nya mafu,si na khidzima si mu khozela; 11ni gu vathu vatshavbo va huwelela,khavo: "Jesu Kristo Pfhumu", gasi gu dhumiswa Nungungulu Babe. 12Khu kharato, vandriyangu, sigodwa sangu, kha nga mu nyi yingisidego gikhati gyatshavbo nyi khadego vbakari gwanu, nyi yingiseni gambe ni olu nyi guromo hwindzo. Thumelani guvbanyiswa gwanu khu githawo ni gu dzi nogisa, 13kholu Nungungulu a ngu mi phasedzela gikhati gyatshavbo khu gu mi ninga gusuva ni guthuma guhaladza gwaye. 14Girani silo satshavbo nyambana gungurangura ni gu ganedzisana, 15mu yeyedza kharati gu khenu mu vathu nya gululame, nya dzifanelo, gu khenu mu sanana sa Nungungulu, mu khala na mu agide nyambana gihoso vbakari nya vathu nya guwegele nya gu vivbedwa khu monyo. Guvbwetega mu ngangamela vbakari nya vathu vovo kha nga myenge ya mafuni, 16mu va tivisa mahungu nya guvbanyise. Khu kharato, litshigu nya gute ga Kristo, nyi napwa gunengela nya gukhongolo ngudzu, kholu nyi na dziti gu kheni kha nya garala khu guthuma mahala. 17Ambari gu lomba gu ningela womi wangu nyi gira mhamba nya phaso gasi gu pata ni miningelo yanu nya gukhodwe ga Nungungulu. Eni si ngu nyi tsakisa, gambe nyi ngu hengela gutsaka gogu ni enu mwatshavbo. 18Enu nenu tsakani gumogo ni eni. 19Nyi ngu tumba ga Pfhumu gu kheni nyi na mi rumela nyamba hwela Thimoti, gasi eni neni nyita tangadziswa khu gu mana mahungu nya esi si dugelelago vbakari gwanu. 20Mwalo mumbe muthu a hengelago gwadi ni eni sigaradzoni, a wuya a gu dzi garadza khu gu khathalela enu, kha nga uye. 21Vatshavbo vambe va gu dwanela basi gu gira guhaladza gwawe, nasiri ogu ga Kristo. 22Gasi Thimoti, enu mu ngu pima gutumbega gwaye: a dzi garadzide gumogo ni eni thumoni nya gutivise Mahungu nya Yadi, kha nga gyanana gi phasedzelago babe waye. 23Nyi ngu virela gu mu rumela nyamba hwela, me ni gu dziti gu kheni ma na lamudwa kharini mahungu yangu. 24Nyi ngu tumba ga Pfhumu gu kheni eni neni nyi nata mi wona nugunugu. 25Nya gu wona gu kheni gwadi nyi mi rumelani Epafrodito, ndriyangu eno mungana wangu nyi thumago ni gu dwana gomogo naye, a gu uye mu mu rumedego guta nyi phasedzela mu sigaradzoni gwangu. 26Uye a gu khala khu gu mi suva enu mwatshavbo, gambe a ngu garadzega ngudzu kholu enu mu pwidego mahungu nya madwali yaye. 27Gunene, khu lisine a di gu dwala nya guhadze gufa, aholu Nungungulu a mu girede wuhindzi, nasiri uye basi, aholu ni eni neni, a fela gumba engedzela vbatshani nya sigaradzo. 28Khu kharato, nyi ngu mu rumela khu guvbiredza gasi, khu gu mu wonani nya luphye, mu nengele, nyi vbevbugisedwa sigaradzo sangu. 29Khu kharato, mu hakheni khu litsako likhongolo kha nga ndriyanu khu ga Pfhumu. Guvbwetega mu yeyedza githawo ga vathu nya nga uye, 30khaguva a di hadza gufa khu kotani nya thumo wa Kristo, a ningela womi waye khu gufela gu nyi phasedzela khu esi enu mu si dzi kodzigo gu nyi ningani.


Copyright
Learn More

will be added

X\