MATEWU 8

1Na va gu tshiga khu gigomoni, Jesu a di landrwa khu gidzemo nya gikhongolo. 2Khavbo avbo, a di yedwa khu mudwali moyo nya sokono, a nga ya mu khidzimela, khuye: "Pfhumu, wa gu dzina, u na nyi hawulugisa." 3Jesu a di mu handzega mandza, a mu embela, khuye: "Nyi ngu dzina, hawuluga!" Mudwali wule a di dzegela gu hawuluga. 4Aholu Jesu a di mu laya, khuye: "U nga embeli muthu; indra dzi leyedza ga muphasi nya mhamba, gufela gu a ningela, khu guagiswa gwago, iso si rumwago khu Mosi, gasi gu khala nari gifakazo vbakari gwawe." 5Na gu bela Khafarnawume, a di tedwa khu muthangeli moyo nya gikwata nya lizana masotshwa, a ngata mu lombago, khuye: 6"Pfhumu, ndrangani gwangu nyi na ni githumi gi sanisekago ngudzu. Gi khwenyede sivbango." 7Jesu a di mu hakha, khuye: "Nyi nata mu hawulugisa." 8Muthangeli wule a di mu hakha, khuye: "Pfhumu, nyi mwalo fanelo nya gu uwe u bele ndrangani gwangu; aholu rumela lito limwedo lago basi, githumi gyangu gi na vbanya. 9Kholu eni neni, ambari nyi gu ni vakhongolo vangu, nyi na ni masotshwa nyi ma rumago. Mumbe gu mu ruma, kheni, indra, a gu hongola; mumbe, kheni: delu, ata; ga githumi gyangu, kheni: gira egi, gi gu gira." 10Na pwide magana yaya, Jesu a di mu liwuga ngudzu, a gu embela avo va nga bani va gu mu landra, khuye: "Nyi ngu mu embelani, khu lisine, kheni: gima nyi si gu mani muthu nya gukhodwe nga oyu tigoni momu ga Israeli! 11Nyi ngu mi embelani nya gukheni va nata nya vangi khu khuga-dambo ni muwha-dambo vata khala vbamezatunu gumogo ni Abrahama, ni Isaki, ni Jakobe mufumuni wa ndzadzini, 12gasi va mune thomba va na rinywa vbavbandze, mu gidemani, avbo va na guya lilago ni gu ketsa magwaha." 13Khavbo avbo, Jesu a di embela muthangeli wule, khuye: "Indra, si na girege satshavbo kha nga idzo u khodwago khidzo." Gikhati gile kamwe githumi gi di hawuluga. 14Jesu na bede ndrangani ga Pedro, a di ya mana ngogadzi wa Pedro na lade khu gumba dzi pwela. 15Na mu kuhide khu mandza feveri yi di dzegela gu vbindra, a gu wuga a va sayisa. 16Ni silambo, va di mu yisela vathu nya vangi va nga bani vari ni madwali ni maphuvbo nya guvivbe gasi uye, khu magana yaye, a di ma tutumisa, gumogo ni gu hawulugisa vadwali. 17Gu tadzisega, kharati, iso si nga ganedwago khu muphrofeti Isaya, nya gukhuye: "Uye dzegide madwali yathu, a gu rwala wuvi wathu." 18Jesu na wonide gu khuye randredwe khu vathu nya vangi, a di vbweta gu hongola tshatugo. 19Khavbo avbo, a di khingwa khu muhevbudzi nya Nayo a nga mu embelago, khuye: "Muhevbudzi, nyi na gu landrela ni hayini avbo u na gu hongolago." 20Jesu a di mu hakha khuye: "Migehe yi na ni mavbala yawe; sinyoni sa ndzadzini si na ni sihaga sawe. Aholu Mwamana wa Muthu mwalo avbo nya gukhihimele hungo waye." 21Mumbe mupizane a di mu embela khuye: "Pfhumu, nyi dige, guphela, nyi ya dzinga babe wangu." 22Jesu a di mu hakha, khuye: "Uwe nyi landre. Va dige vafi va dzinge vafi vakwawe." 23Khavbo avbo, a di bela ngalavani gumogo ni vapizane vaye. 24Avbovbo gi di duga gingulu nya gikhongolo, gi nga gira gu ngalava yi pfhuledwa khu mavimbi. Gikhati gyogyo Jesu a di lade. 25Vapizane va di ya mu wusa khavo: "Pfhumu, hi vbanyise, hi ngufa!" 26Jesu a di va embela, khuye: "Mwa gu thava ginani, vathu nya gukhodwe vbadugwana?" Na khugide, a di kawuka phuvbo ni mavimbi. Khavbo avbo, gu di manega malenga nya makhongolo. 27Vathu vale va di liwuga, khavo: "Gasi khu mani oyu nya gu ambari phuvbo ni yipwha si mu yingela?" 28Na va vbohide tshatugo tigoni ga Vagadharenu, a di yedwa khu vama vavili va nga bani vari ni maphuvbo nya guvivbe vama vava va di gu vbanyela marowoni. Va di gu garadza gule nya gu mwalo a nga bani a gu tiya guvbindra khu ndzila yoyo. 29Na va mu wone, va di gulumela, khavo: "Ginani hi nga gu ghohela, Mwamana wa Nungungulu? Wa gu hi tutumisela ginani, na gi si gu vbohi gikhati gyakone?" 30Dzi di romo vbafuvbyana vbale dzikhumba dzi nga bani dzi gu haviswa. 31Maphuvbo yale ma di mu lomba, khayo: "Wa gu hi tutumisa, hi rumele mu dzikhumbani mule." 32Jesu a di ma embela khuye: "Indrani!" Khavbo avbo, na ma dugide, ma di ya bela mu dzikhumbani, dzi nga tutumago dzi ya bela nondrwani, umo dzi nga ya mbembago dzatshavbo. 33Vahavisi vakone va di tutuma, va gu hongola dhoropani va ya tivisa iso si nga dugelela vama vale nya maphuvbo nya mandriki. 34Vathu vatshavbo va dhoropani va di yela Jesu gasi gu ya mu lomba gu khavo a khuge tigoni gwawe.

will be added

X\