MATEWU 7

1"Mu nga hingegedzeli guvivba vakwanu, gasi mu si hingegedzedwi nenu. 2Kholu, idzo mu na hingegedzelago khidzo vakwanu, mu na hingegedzedwa nenu khidzo. Ndronga mu na pimago khiyo vakwanu, khiyo mu na pimwago nenu khiyo. 3Khu ginani u khedzago gitoti gi guromo lisoni ga ndriyago, u si khedzi vhambala a guromo lisoni gwago? 4U na dzi kodza kharini gu embela ndriyago, khuwe: 'Wandruye, hidzimela nyi gu dusa gitoti lisoni gwago,' nuri ni vhambala lisoni gwago? 5Nya maliphawe! Dusa guphela vhambala wu guromo lisoni gwago, khavbo u na dzi kodzago gu dusa gitoti gi guromo lisoni ga ndriyago. 6"Mu nga dzegi silo nya gukatege mu ninga dzimbwa, dzinga mi wugelani dzi mi hodza; kha nga gambe, mu nga dzegi dzindralama dzanu mu ninga dzikhumba, dzi nga gandredzedwa. 7"Lombani, mu na ningwa; vbwetani, mu na si mana; khokhothani, mu na tuledwa. 8Kholu muthu watshavbo a lombago a ngu ningwa; uye a vbwetago a ngu si mana, ni uye a khokhothago a ngu tuledwa. 9Khu wevbi melegi, vbakari gwanu, a ningago giwindri gyanana gyaye gya gu mu lomba gibaba? 10Mwendro gu gi ninga nyoga gya gu mu lomba ndzandzi? 11Nga wonani: ambari enu nya gukhenu mu vivbedwe khu monyo mu dzi kodzago gu ninga silo nya sadi sanana sanu, ahati Babe wanu a guromo ndzadzini a na gira kharini? 12Khu kharato, iso mu vbwetago gu khenu va mi girele, va gireleni nenu, kholu khidzo kharati wu hevbudzago Nayo wa Mosi ni sihevbudzo nya vaphrofeti. 13"Belani khu mwanya nya dugwana! Kholu ndzila yi yisago gumbembani yi anamide ngudzu; mwanya wakone nuwo. Nya vangi khavo va belago khiyo! 14Gasi ndzila yi yisago guvbanyani yi hongide ngudzu; mwanya wakone nuwo. Vadugwana va belago khiyo. 15"Dzi woneleni ni vaphrofeti nya malipha, va tago vbakari gwanu kha nga dzinvuta, gasi khu ndrani masolwa nya guvbelele. 16Mu na va ti khu mihandro yawe. Ina gu ngu hawa dziuvha mu sikakaradzani, mwendro maguyu mu sigangarabwani, gani? 17Simbo watshavbo nya wadi wa gu thela mihandro nya yadi; gasi uye nyamba wadi wa gu velega iyo nyamba yadi. 18Simbo nya wadi kha wu dzi kodzi gu velega mihandro nyamba yadi. Kha nga simbo nyamba wadi wu si dzi kodzigo gu velega mihandro nya yadi. 19Simbo watshavbo wu si velegigo mihandro nya yadi wu ngu kokwa wu gu rinywa niloni. 20Khu kharato, mu na vati khu mihandro yawe." 21"Khandri wule a gu khuye: 'Pfhumu, Pfhumu,' a na belago mufumuni wa ndzadzini. Aholu a na bela basi uye a girago gugola ga Babe wangu a guromo ndzadzini. 22Nya vangi va na nyi embela litshigu lolo, khavo: 'Ama Pfhumu, ina kamwe khu hi dundrugi ethu hi nga bani hi phrofeta khu lina lago, hi nga bani hi tutumisa maphuvbo nya guvivbe, gumogo ni gu gira siliwugiso nya singi khu lina lago?' 23Gasi eni nyi na va hakha, kheni: kha nyi mu tini ne vbadugwana. Leyani mbeli gwangu, enu mwatshavbo mu girago guvivba. 24"Uye a pwago mahungo yangu a ma landrisa, a gu fana ni mwama nya mapimo a nga vbaha nyumba yaye mu giwindrini. 25Yi diwa ndzadzi nya yingi, yi gugumugisa mati nya mitsongo, gu manega talo; gumogo ni gu vetwa khu phuvbo nya gingulu nyumba yile; aholu kha ya thega, kholu yi tsitsidwe gwadi mu giwindrini. 26Gasi uye a pwago mahungu yangu a si ma landrisi, a gu fana ni gipumbu gi nga vbaha nyumba yaye mu lipfuleni. 27Yi di wa ndzadzi nya yingi, yi gugumugisa mati nya mitsongo, gu manega talo; gumogo ni gu vetwa khu phuvbo nya yikhongolo; nyumba yile yi di dzegela gu pfhungunuga yi thega wufendretiri." 28Na vbedzide gu ganela, gidzemo gi di liwuga mahungo yaye. 29Kholu a di gu va hevbudza kha nga uye a gu ni fanelo nya guhevbudze, nasiri kha nga vahevbudzi nya Nayo.

will be added

X\