MATEWU 6

1"Mwa gu gira thumo nya wadi mu nga dwaneli gu wonwa khu vathu. Mwa gu gira kharato kha mu na ningwa tshatshazelo khu Babe wanu a guromo ndzadzini. 2Khu kharato, wa gu ningela zomola, u nga wombi pundru, kha nga idzo va girago va nya matshandza mu dzinyumbani nya nombelo ni mu dzindzilani, na va gufela guzundzwa khu vathu. Khu lisine, nyi ngu mi embelani nya gukheni, va hakhide tshatshazelo wawe. 3Wa gu ningela zomola, zama gu gyandza gyago gya nyambade gisi giti igyo gi girwago khu gyandza gya nyamudye, 4gasi zomola yago yi si tidwi khu muthu. Kharati, Babe wago, a gu uye a wonago iso si sihadego, a na gu ninga tshatshazelo. 5"Mwa gu vbweta gulombelela, mu nga giri kha nga va nya matshandza, va golago gulombelela na va emide dzinyumbani nya nombelo ni mahandzakanyani nya dzindzila, na va gufela gu wonwa khu vathu. Khu lisine nyi ngu mi embelani nya gukheni va hakhide tshatshazelo wawe. 6Gasi uwe wa gu vbweta gu lombelela, sega lidimba, u bela makhuvini gwago u lomba ga Babe wago, nu si wonwi khu muthu, gasi uye a wonago iso si sihadego, a na gu ninga tshatshazelo. 7"Milombeloni yanu mu nga tadzi mahungo nya mangi, kha nga idzo ma girago mahedheni, na ma gu pimisa nya gukhayo kharati khavbo ma no pwidwago. 8Enu mu nga girini kharato, kholu Babe wanu a guromo ndzadzini a ngu si ti iso si mi kenelelago na mu si gu mu lombi. 9"Khu kharato, lombelelani kharati:'Baba wathu u guromo ndzadzini,lina lago li na rungudzwe. 10Mufumu wago wu nate gwathu;Gudzina gwago gu na girege mafuni kha nga ndzadzini. 11Guhodza gwathu nya litshigu ni litshigu hivbe muhuno. 12Hi pwele sihoso sathu,kha nga ethu hiva pwelago ava va hi hoselago. 13U nga hi digi hi gu thega mu gusengwani,aholu hi vbulugise guvivbani 14"Kholu mwa gu divalela sihoso sa avo va nga mi hoselago, Babe wanu a guromo ndzadzini a na mi divalela nenu. 15Aholu mwamba divalela sihoso sa avo va mi hoselago, Babe wanu a guromo ndzadzini kha na mi divalela nenu sihoso sanu. 16"Mwa gu halani, mu nga hungi giswedzo, kha nga va nya matshandza, na va gufela gu wonwa khu vathu pwani va ngu hala. Khu lisine nyi ngu mi embelani nya gukheni va hakhide tshatshazelo wawe. 17Gasi uwe wa gu hala, hamba khovbe, u phorola mafura hungoni, 18gasi u si tidwi khu muthu pwani u ngu hala, vbavbandze ga Babe wago a guromo gusihalani. Uye a wonago iso si sihadego, a na gu ninga tshatshazelo. 19"Mu nga hengeledzeli thomba mafuni mumu, umo yi dzi kodzago gu pfhurela, ni gu hodzwa khu muwha ni gu phangwa khu dzimbafa. 20Hengeledzelani thomba ndzadzini, umo yi si dzi kodzigo gu pfhurela, ni gu hodzwa khu muwha, mwendro gu phangwa khu dzimbafa. 21Kholu avbo yi guromo thomba yago, khavbo wu na bani romo nu monyo wago. 22"Kandriya nya givili khu liso. Liso lago la gu bani li wona gwadi, givili gyatshavbo gi na wenengedzwa. 23Aholu la gu bani li dwala, givili gyago gyatshavbo gi na khala mu gidemani. Khu kharato, wa gu dzega gidema u gi gira mwenge wago, igyo gi na engedzelana gu sivbala! 24"Mwalo a dzi kodzago gu thumela dzipfhumu dzimbili. Kholu a na zondra mweyo a gu gola yimbe; mwendro saye gu girela ndruda mweyo a gu nyenya yimbe. Kha mu dzi kodzi gu thumela Nungungulu ni dzithomba. 25"Khu kharato nyi ngu mi embelani, kheni: mu nga garadzegi khu guvbanya gwanu, na mu gu pimisa, khenu: Ginani hi na hodzago, mwendro ginani hi na selago mwendro sanu gu sanisekani khu givili gyanu, na mu gu pimisa, khenu: Ginani hi na ambalago. Ina givili kha gi phasi guvbindra guambala, gani? Ni guvbanya kha gu vbindri guhodza, gani? 26Nga wonani sinyoni sa ndzadzini. Kha si yali, kha si vbweri, gambe kha si hengeledzeli gilo sisangalani. Ambari ulo, Babe wanu a guromo ndzadzini a ngu si hodzisa. Ina enu kha mu vbindri sinyoni, gani? 27Khu mani, vbakari gwanu, a dzi kodzago gu dzi engedzela matshigu nya guvbanye, khu kota nya gu dzi garadze gwaye? 28"Khu ginani mu dzi garadzago khu guambala? Nga wonani senge nya likhabi, idzo si dandrago khidzo! Kha si thumi gambe kha si lugi dzitshalu. 29Aholu nyi ngu mi embelani, kheni: Ambari Salomoni, gufumani gwaye gwatshavbo, kha ambala kha nga gimwegyo gyakone. 30Ambari nya gukhenu mwasi, nya gu muhuno womo thembweni, mindru wu rinywa niloni, wu ambagiswago kharati khu Nungungulu, ahati enu, vathu nya gukhodwe vbadugwana? 31Mu nga garadzegi, khenu, hi na hodza ginani? Hi na sela ginani? 'Hi na ambala ginani?' 32Mahedheni khayo ma dzi garadzago khu isoso. Aholu Babe wanu a guromo ndzadzini a ngu dziti nya gukhuye mu ngu si vbweta satshavbo soso. 33Guphela dwanelani mufumu wa Nungungulu ni gugola gwaye; gasi simbe mu na ningwa kha nga libhaso. 34Khu kharato, mu nga dzi garadzi khiso sa mindru, kholu litshigu la mindru li nagya ni sigaradzo saye, kha nga mu dzitigo nya gukhenu litshigu ni litshigu la gugya ni dzaye.

will be added

X\