MATEWU 5

1Na wonide mwandra, a di gwela mu gigomoni a ya khala. Vapizane vaye va di mu landra. 2Khavbo avbo, a di khusedza lito a gu va hevbudza, khuye: 3"Si kategide sisiwana monyoni,kholu khwawe Mufumu wa ndzadzini. 4Va kategide vale va lilago,kholu va na tangadziswa. 5Va kategide va nya gurula,kholu va na hodza thomba nya litigo nya sisambanyo. 6Va kategide vale va gu ni ndzala ni lidora nya ndruda,kholu va na khuriswa. 7Va kategide va nya wuhindzi,kholu va na giredwa wuhindzi. 8Va kategide va nya myonyo nya yadi,kholu va na wona Nungungulu. 9Va kategide vakhongoteli nya vathu,kholu va na ranwa sanana sa Nungungulu. 10Va kategide vale va saniswago khu gu landra ndruda, kholu khwawe mufumu wa ndzadzini. 11"Mu kategide, mwa gu vadwa, mu saniswa, mu singedzwa guvivba gwatshavbo khu kota yangu. 12"Nengelani mu ghiya, kholu tshatshazelo wanu wu na bani wuri wukhongolo ndzadzini. Khidzo kharati va nga sanisago khidzo vaprofeti va gale. 13"Enu mu munyu nya litigo! Aholu munyu wa gu phusa, wu na lungwa khu ginani? Kha wu nga gu phasa gilo; wa gu vbaladzwa, wu gandredzedwa khu vathu. 14"Enu mu wenengedzo nya litigo! Kha li kodzegi gu tshirwa lidhoropa li vbahidwego mu gigomoni. 15Kha yi rotwhi kandriya yi fenengedzwa khu gitundru, aholu ya gu vegwa avbo yi dzi kodzago gu wenengedza khavbo vatshavbo va guromo nyumbani. 16Khu kharato wu na dzure mwenge wanu mahoni nya vathu, gasi, va wone mithumo yanu nya yadi, va dhumise Babe wanu a guromo ndzadzini. 17Mu nga pimisi nya gukhenu nyi tede guta tshipisa Nayo wa Mosi, mwendro sihevbudzo sa vaprofeti: Khandriso nyi nga si tela; aholu, nyi tede guta tadzisa. 18Kholu, khu lisine nyi ngu mu embelani, kheni: kala yi gu vbindra ndzadzi ni mafu, gimwalo ni gimwegyo gi na gu duswago Nayoni nyamba girega. 19Khu kharato, uye a na gu kanyisago siguruvedzo sesi nya sidugwana, a kutsedzela vakwawe gu gira navo nga uye, a na bani ari dugwana mufumuni wa ndzadzini. Aholu uye a si landrisago ni gu si hevbudza mu vathuni, a na bani ari khongolo mufumuni wa ndzadzini. 20Kholu nyi ngu mu embelani; gululama gwanu gwamba vbindra ugo nya vahevbudzi nya Nayo ni Vafarisi, gima kha mu na bela mufumuni wa ndzadzini. 21"Mu pwide iso va nga embedwa va gale: 'U nga songi muthu; uye a songago a na ningwa nandru.' 22Gasi eni nyi ngu mi embelani, kheni: uye a zangarelago ndriyaye a na thethiswa; uye a ranago muthu kwawe khuye mbeveve fanede gu lamudwa khu madhota. Uye a ranago muthu kwawe khuye gipumbu a na rinywa phalani nya nilo. 23Khu kharato, wa guya gira nombelo wago vbagiluvelotunu, nuri vbakari, u dundruga gu khuwe u hoselane ni ndriyago, 24diga ningelo wago vbagiluvelotunu, uya phela khu gu khongotelana ni ndriyago; khavbo u wuyago gwadi u ta gira ningelo wago. 25"Wa gu hongola ni nala wago pfhumutunu, zama gu mu khongotela na mungari ndzilani; a nga ya gu ningela ga mulamuli, mulamuli a gu ningela ga vanyakasane, vanyakasane va ya gu khothela pasoni. 26Nyi ngu gu embela, kheni: khu na duga khu mule nu si gu livbi mangava yatshavbo. 27"Mu pwide iso si nga ganedwago pwani: 'U nga bhayi.' 28Gasi eni nyi ngu mi embelani, kheni: watshavbo uye a khedzago nyamayi, khu gu mu dogolela, bhayide naye monyoni gwaye. 29Khu kharato, wa gu wona nya gukhuwe liso lago li ngu gu tshunganisa, li duse u dzudzuga, kholu i tshukwana gu luza givbango gimwegyo, guvbindra gu dzega givili gyago gyatshavbo gi rinywa phalani nya nilo. 30Wa gu wona nya gukhuwe gyandza gyago gya nyamudye gi ngu gu tshunganisa, gi pile u dzudzuga, kholu i tshukwana gu luza givbango gimwegyo, guvbindra gu dzega givili gyago gi rinywa phalani nya nilo. 31"Gu ganedwe gambe gu pwani: 'Uye a hulago mwangadzi waye, a na mu ni nge musi nya guhulane.' 32Gasi eni nyi ngu mi embelani, kheni: watshavbo uye a hulago mwangadzi waye, vbavbandze nya dzegano nya guloledziswe, a ngu mu girisa gibhayi. Mwama a na mu dzegago a na khala nuye gibhayi. 33"Mu pwide gambe iso va nga embedwago va gale. 'U nga sambanyi malipha, aholu u na landrisa gisambanyo u na girago ga Pfhumu.' 34Gasi eni nyi ngu mu embelani kheni: mu nga phazamini sanu mu gu sambanya, ambari khu ndzadzi, kholu gikhalo nya Mufumu wa Nungungulu; 35ambari khu litigo, kholu khavbo a vegago avbo migondro yaye; ambari khu Jerusalema, kholu lidhoropa la mufumeli khongolo, 36mwendro khu hungo wago wunene, kholu khu dzi kodzi gu vbindrugedza ndzudzu wago, moyo basi, wu aga mwendro gu sivbala. 37Guganela gwanu gu na khale ina nya gutiye, a gu bani ari ina; ahihi nya gutiye, a gu bani ari ahihi. Iso si hambanago nesi sa gu vangwa khu liphuvbo nya guvivbe. 38"Mu pwide iso si nga ganedwa, nya gupwani: 'Liso khu liso, likhwaha khu likhwaha.' 39Gasi eni nyi ngu mi embelani gu kheni: mu nga dzi vhikeli ga valala vanu. Wa gu thedwa pama gihaya gya nyamudye, ningedzela gambe gya nyambade. 40Uye a vbwetago gu gu ketsari, na gufela gu gu dzegela ngandzu yago, mu ninge gambe libhadzi. 41Uye a gu gurumedzago gu mu pharela sombo saye pfhuka nya kilometru mweyo, engedzela gu mu vbwegedza mumbe pfhuka yi khala mivili. 42Uye a gu lombago mu ninge. U nga gikhi marundra uye a gu fiyarigo. 43"Mu pwide iso si nga ganedwa nya gupwani: 'U na gola va na gyanu, u zondra nala wago.' 44Gasi eni nyi ngu mi embelani gu kheni: golani valala vanu; lombelelani khu vale va mi sanisago. 45Mwa gu gira kharato mu na khala sanana sa Babe wanu a guromo ndzadzini. Kholu uye a ngu gisa lidambo ga va nya gululama ni va nya guvivbedwa khu monyo; a wisa ndzadzi ga va nya ndruda ni sighohi. 46Kholu, mwa gu gola basi avo va mi golago, tshatshazelo muni mu na gu wu manago? Kha va ngu gira navo vakhuphisi? 47Mwa gu losa basi vandriyanu, gilo muni nya giphya mu girago? Kha ma ngu gira nayo mahedheni? 48Khu kharato, lulamani mu lisineni kha nga Babe wanu wa ndzadzini a lulamidego.

will be added

X\