MATEWU 4

1Khavbo avbo, a di dzegwa khu Liphuvbo, li mu yisa giwulani, iyo a nga ya lingwago khu Sathane. 2A di hala magumi mana matshigu, wutshigu ni mihani. Khavbo avbo, a di pwa ndzala. 3A di vbohedwa khu Sathane, ata khuye: "Wa gu bani uri Mwamana wa Nungungulu, ruma siwindri sesi si vbindrugedze si khala guhodza." 4Jesu a di mu hakha, khuye: "Gu lovidwe gu pwani: 'Muthu kha vbanyi khu guhodza basi, aholu, khu mahungo yatshavbo matago khu ga Nungungulu.' " 5Khavbo avbo, Sathane a di mu dzega a gu hongola naye dhoropani nya gukatege; na gwede naye gikolitunu nya Nyumba ya Nungungulu, 6a diya mu embela khuye: "Wa gu bani uri Mwamana wa Nungungulu, nga dzi digedza khavba, kholu gu lovidwe pwani: 'Nungungulu a na ruma sirumwa saye gasi si gu hakhe, gasi usi tshongiswi migondro khu siwindri.' " 7Jesu a di mu embela khuye: "Gu lovidwe gambe pwani: 'U nga lingi Pfhumu Nungungulu wago!' " 8Khavbo avbo, Sathane a di mu dzega a gu hongola naye mu gigomoni nya gulapshe ngudzu, avbo a ngaya mu leyedza mifumu yatshavbo nya mafu ni dzithomba dzakone, 9a gu mu embela khuye: "Nyi na gu ninga satshavbo sesi, wa gu khidzima u nyi khozela." 10Khavbo avbo, Jesu a di mu hakha khuye: "Suka, Sathane, kholu gu lovidwe, pwani: 'U na khozela Pfhumu Nungungulu wago; khuye basi u na gu mu thumelago.' " 11Khavbo avbo, Sathane a di mu diga a hongola; dzingilozi dzi dita dzita mu khozela. 12Na pwide nya gupwani Johane khothedwe pasoni, Jesu a di khuga a gu hongola Galileya; 13a diga, kharati, Nazareta, gasi guya khala Khafarnawume, a gu lidhoropa li manegelago siwoni ga Galileya, litigo la Zabhuloni ni Nafitali. 14Kharato gu di tadzisega magana ya muphrofeti Isaya, nya gukhayo: 15"Litigo la Zabhuloni ni litigo la Nafitali,funguni wa tshatugo ga Jordhani,Galileya nya mahedheni. 16Vathu va nga bani va gu vbanyela mu gidemani, va wonide wenengedzo nya khongolo ni avo va nga bani va gu vbanyela mu gusivbalani nya lufu,va tumbulugedwe khu wenengedzo." 17Khavbo avbo, Jesu a di phela gu hevbudza, na gu ganela khuye: "Vbindrugedzani mavbanyelo, kholu mufumu wa ndzadzini womo vbafuvbi." 18Na gu gimbila siwoni ga Galileya, a di wona Simoni, a ranwago pwani khu Pedro, ni ndriyaye Andreya, va nga bani va gu thesa dzikhoga, kholu va diri vagogi. 19Jesu a di va embela khuye: "Nyi landreni, nyi na mu gira vagogi nya vathu." 20Va di dzegela gu diga dzikhoga, va gu mu landra. 21Na gimbide pfhukanyana, a di wona Jakobe ni ndriyaye Johane, sanana sa Zebhedhewu, va nga bani va andza dzikhoga ngalavani. A di va rana navo. 22Va di dzegela gu tshiya babe wawe ngalavani, va gu mu landra. 23Khavbo avbo, Jesu a di phela gu gimbila tigoni gwatshavbo ga Galileya, na gu hevbudza mu dzinyumbani nya nombelo, gumogo ni gu tivisa Mahungu Yadi nya mufumu, na gu hawulugisa vathu dzingumbe dzawe dzatshavbo, ni madwali. 24Ndruma yaye yi di phalalega ni Siriya gwatshavbo. Va di mu resela vatshavbo avo va nga bani vari ni madwali ni simbe sigaradzo; avo va nga bani vari ni maphuvbo nya guvivbe, va nya guhandruga ni va nya sitshira, ni sikhurubwa. A di va hawulugisa vatshavbo. 25A di landrisedwa khu mwandra nya vathu, nya gute khu Galileya, khu Dhekapoli, khu Jerusalema, khu Judheya ni tshatugo ga Jordhani.

will be added

X\