MATEWU 3

1Khu matshigu yayo, Johane mubhapatisi a di romo mu giwulani a hevbudza, khuye: 2"Vbindrugedzani mavbanyelo, kholu Mufumu wa ndzadzini womo vbafuvbi gwanu." 3Khuye oyu a nga mu thula muphrofeti Isaya, gikhati a nga khuye: "Lomo lito li huwelelago mu giwulani, khilo:'Dongiselani ndzila ya Pfhumu,lulamisani sindzilana saye.' " 4Guambala gwa Johane gu diri gwa mawoya nya kameli; libhandri a nga bani a gu hunga mu giwununi gwaye a diri lidowo; guhodza gwaye a diri dzimbera ni wulombe nya likhabi. 5Va di ya iyo gwaye vathu va Jerusalema, va Judheya gwatshavbo ni va tigoni gwatshavbo ga Jordhani, 6gasi guya bhapatiswa khuye tsongoni wa Jordhani, na va gu dawulela sighoho sawe. 7Aholu, na wonide nya gukhuye Vasadhusi nya vangi ni Vafarisi va di guta navo gasi guta bhapatiswa, a di va embela, khuye: "Enu livelego nya dzinyoga! Khu mani a nga mi ruma gu thava likhulo litago? 8Wonegisani mihandro yi yeyedzago guvbindrugedza gwanu. 9Mu nga dzi pembi sanu, khenu: 'Hi na ni babe Abrahama!' Kholu, nyi ngu mi embelani gukheni, Nungungulu a ngu dzi kodza gu tumbulugisa sanana sa Abrahama khu mu siwindrini momu. 10Ambari ulo, gibhewula gi vegidwe tshinani nya simbo; watshavbo wu si ningigo mihandro wu na kokwa, wu gu rinywa niloni. 11Eni nya gu mi bhapatisa khu mati, gasi mu vbindrugedze; aholu uye a tago hwane gwangu a na ni tshivba gu nyi vbindra; eni nyi mwalo fanelo nya gutshule dzingodzi nya silato saye. Uye a na mi bhapatisa khu Liphuvbo nya gu Age ni nilo. 12A na ni gisalava mandzani gwaye; a na vbiyela githala gyaye, a vbevbera dzimbewu a thela mu gisangalani, gasi mafisi a na ma vbisa niloni nyamba tshimega." 13Khavbo avbo, khu Galileya Jesu a dita tsongoni wa Jordhani ga Johane gasi guta bhapatiswa khuye. 14Johane a di bomba, khuye: "Eni kheni nyi gu ni fanelo nya gubhapatiswe khuwe, ni olu u tago gwangu!" 15Aholu Jesu a di mu hakha, khuye: "Si dige isoso. Gu vbwetega hi landrise, kharati, nayo watshavbo." Khavbo avbo Johane a di dzumela. 16Jesu na bhapatisidwe, a di duga khu matini. Avbovbo ndzadzi yidi tulega, a wona Liphuvbo la Nungungulu na li gu relela kha nga lituva, li ta mbaka vbatshani gwaye. 17Lito li nga bani a li guta khu ndzadzini li di khilo: "Oyu khu Mwamana wangu nya guhaladzege ngudzu, a nengedzisago monyo wangu."

will be added

X\