MATEWU 28

1Na yi vbindride Sabhado, khu mambagugya nya litshigu nya guphele nya semana, Mariya wa Madalene ni mumbe Mariya va di ya holela lithowo. 2Avbovbo, khu githugedza, gi di manega girevareva, kholu girumwa gya Pfhumu, gidi tshiga khu ndzadzini gita niginya giwindri, gi khala khu vbatshani gakone. 3Girumwa gya Nungungulu gi di wonega kha nga gulasa nya ndzadzi; 4guambala gwaye gu di aga nga hunguva. Masotshwa ma nga bani ma ghadha lithowo ma di ndrendremela, ma gu dzima, khu hwanga. 5Aholu girumwa gi di khusa lito, gi embela vanyamayi vale, khiyo: "Mu nga thavi; nyi ngu dziti nya gukheni mwa gu vbweta Jesu a nga khokhothedwago. 6Mwalo avba. Wugide, kha nga idzo a nga ganelago khidzo. Deluni muta wona avbo a nga bani a romo. 7Olu indrani khu guvbiredza muya tivisa vapizane vaye, khenu: 'Uye wugide khu gufani, a na mu hegudzani gu vboha Galileya. Iyo mu na guya mu wonago.' Khiso esi nyi nga vbweta gu mu tivisani!" 8Vanyamayi vale, na va tade khu hwanga, gumogo ni gunengela, va di khuga khu vbale khu guvbiredza, va gu tutuma, gasi guya tivisa vapizane. 9Jesu a di va khinga, a va losa, khuye: "Nungungulu a na mi endredzeni." Avo va di mu hidzimelela, vaya dzi thesa migondroni gwaye va gu yi dandramela. 10Jesu a di va embela, khuye: "Mu nga thavi gilo; indrani muya tivisa vandriyangu va hongole Galileya, va na nyi wonela iyoyo." 11Na va nga romo ndzilani vanyamayi vava, vambe vaghadhi va di tutuma va hongola dhoropani va ya tivisa vakhongolo nya vaphasi satshavbo iso si nga dugelelago. 12Ava va di gira tshangano ni madhota, va gu pwana gu livba dzitsapawu nya dzingi masotshwa yale, 13va ma laya, khavo: "Indrani khenu vapizane vaye va di ta ni vbakari nya wutshigu vata mu ba na hi lade. 14Sa gu tidwa isoso khu mwamangulu Pilato, mu nga thavi, ethu khethu hi na gu si tigo. Kha na mu gira gilo." 15Na va hakhide dzitsapawu, va di gira kha nga idzo va nga embedwago khidzo. Khidzo kharati va embeledzanago khidzo vajudha kala matshigu ya muhuno. 16Vale nya likhumi na moyo va di hongola Galileya, gigomoni gile va nga bani va leledwe khu Jesu. 17Na va mu wone, va di mu khozela; vbakari gwawe va di romo vambe va nga bani va gu kanakana. 18Khavbo avbo, Jesu a di hidzimela ga vapizane, a va embela, khuye: "Nyi ningidwe tshivba yatshavbo nya gufume ndzadzini ni mafuni. 19Khu kharato, indrani mu gimbila mu hevbudza mayigo yatshavbo, mu bhapatisa vathu khu lina la Babe, ni la Mwamana, ni la Liphuvbo nya gu Age. 20Va hevbudzeni gu landrisa satshavbo iso nyi nga mi hevbudzani. Gasi eni nyi na bani nyiri nanu gikhati gyatshavbo, kala guhegisani nya litigo."

will be added

X\