MATEWU 20

1"Mufumu wa ndzadzini wu ngu fana ni mune gipeto a nga vindrugelago gu gimbila a vbweta vathu nya guta lime thembweni gwaye nya miuvha. 2Na pwane navo gu va livba tsapawu mweyo khu litshigu, a di va rumela petoni gwaye nya miuvha. 3Na dugide gambe ni mihani a di ya mana vambe va nga bani varomo dhoropani nyamba thuma gilo; 4a di va embela, khuye: 'Indrani nenu muya lima petoni gwangu, nyi na mu hakhisani tengo wu enelago.' 5Va di hongola. A di duga nya luphye khu midiya ni muphindrelo aya vbweta vambe. 6Na dugide gambe ni silambo, a di mana vambe, a nga va embelago, khuye: 'Khu ginani mu khalago avba litshigu rumba nyamba thuma gilo?' 7Va di mu hakha, khavo: 'Ha gu hamuga muthu nya gu mu thumele.' A di khuye: 'Indrani nenu petoni gwangu.' 8Na li hwide, mune gipeto a di ruma ghadhi, khuye: 'Rana valimi u va livba; phela khavo va nga hegisela gu vboha, u hegisela khavo va nga phela.' 9Na va vbohide avo va nga belago ni silambo, muthu ni muthu a di hakhiswa tsapawu. 10Va di vboha navo vale va nga phelago khavo gu bela, na va gu alakanya gu khavo mwendro va na hakhiswa guvbindra avo va nga belago hwane gwawe, aholu moyo ni moyo wawe a di hakhiswa nuye tsapawu mweyo. 11Na va hakhide, va di phela gu bhongela mune gipeto, khavo: 12'Ava va nya guhegisela va thumide wora mweyo basi; aholu u va hakhiside idzo saye ni ethu hi nga thumago litshigu rumba na hi dahulekelana khu lihani.' 13Mune gipeto a di phindrula moyo wawe, khuye: 'Kha nyi gu kalaveli gilo, wandruye. Gasi khandri hi di pwana gu gu livba tsapawu mweyo? 14Ina ka, dzega tsapawu yago u hongole. Nyi gode gu ninga nuye oyu nya mahegisela tengo nya gufane nuye nyi nga gu ningago. 15Ina nyi mwalo fanelo nya gugire iso nyi sinago khu silo sangu gani? Ina khandri wuhindzi wangu wu gu tshunganedzisago?' 16Kharati, va nya guhegisela va na bani vari va nya guphela; va nya guphela va na bani vari mahegisela. Kholu vangi va ranwago, aholu sihathwa si dugwana." 17Na va ga gwela gu hongola Jerusalema, a di rana vale nya likhumi na vavili, a va embela, khuye: 18"Olu nya guhongola Jerusalema, iyo Mwamana wa Muthu a na ya ningedwago ga vaphasi nya vakhongolo ni ga vahevbudzi nya Nayo, avo va na lamulago gu khavo a songwe, 19va na mu ningela ga mahedheni va mu vala, va mu kwamula ni gu mu khokhothela. Aholu khu litshigu nya wuraru a na wuga khu ga vafudego." 20A di hidzimela ga Jesu mayi wa sanana sa Zebhedhewu gumogo ni sanana saye, aya khidzima migondroni gwaye, gasi gu ya mu lomba gilo nya gukari. 21Jesu a di mu wudzisa, khuye: "Wa gu vbweta ginani?" Uye a di mu hakha, khuye: "Dzumela khuwe, mufumuni gwago, sanana sesi sangu sa sivili, si khale gimwegyo khu nyamudye, gimbe khu nyambade gwago." 22Jesu a di mu phindrula, khuye: "Nigyo mu lombago kha mu giti. Ina enu mu ngu dzi kodza gu sela gikombe nya gusaniseke nyi vbwetago gu sela, gani?" Va di khavo: "Ina, hi ngu dzi kodza." 23Jesu a di khuye: "Nyi ngu dziti nya gukheni mu na selani gikombe nyi na selago; aholu gu khala nyamudye gwangu mwendro nyambade gwangu, kha si tidwi kheni; isoso sa gu lumba vale va hathidwego khu Babe wangu." 24Na va pwide esi, vambe va likhumi, va di wugela vandruye vale va vavili. 25Jesu a di va rana, a va embela, khuye: "Kha nga mu dzitigo, vafumeli nya mayigo va gu ma fuma khu tshivba; ni dzindruna dzakone dza gu gola gu tidwa nya gupwani khidzo dzi rumago. 26Gu nga giregi kharato vbakari gwanu. Aholu oyu a golago gu khala khongolo vbakari gwanu, a na khale githumi gyanu. 27Oyu a golago gu khala nari nya guhegule vbakari gwanu, a na khale khumbi yanu. 28Kholu Mwamana wa Muthu nuye kha tela guta thumedwa, aholu guta thumela ni gu ningela womi waye gasi gudzegisa va nya gutala." 29Na va gu khuga khu Jeriko, a di landrwa khu gidzemo nya gingi. 30Avbovbo, sikhumu sivili si nga bani si khade bambe nya ndzila, na si pwide nya gupwani khu Jesu a vbindrago, si di khusedza lito, si gulumela, na si gu lomba, khiso: "Pfhumu, Mwamana wa Dhavide, hi pwele wuhindzi!" 31Gidzemo gi di va kawuka, gasi gu va degudza, aholu avo va di vbindrisa gu rana, khavo: "Pfhumu, Mwamana wa Dhavide, hi pwele wuhindzi!" 32Jesu a di ema a va ranisa. Na va vbohide, a di va wudzisa, khuye: "Mwa gu vbweta khenu nyi mi rini?" 33Va di hakha, khavo: "Pfhumu, ha gu vbweta gu khethu maho yathu ma tulege!" 34Na pwide gisiro, Jesu a di va kuha maho. Ma di dzegela gu tulega, va gu mu landra.


Copyright
Learn More

will be added

X\