MATEWU 2

1Na velegidwe Jesu tigoni la Bhetlehema ga Judheya matshiguni ya mufumeli Herodhi, va di vboha Jerusalema vagengeli va nga bani va guta khu khuga-dambo. 2Va di ya wudzisa, khavo: "Mufumeli wa Vajudha a ngarigo gu velegwa, a gu manegela hayi? Hi wonide nyeledzi yaye khuga-dambo, hi dzude gasi guta mu khozela." 3Mufumeli Herodhi, na pwide mahungu maphya yaya, a di thuruga, gumogo ni vathu va Jerusalema gwatshavbo. 4Na tombaniside vakhongolo vatshavbo nya vaphasi nya mhamba ni vahevbudzi nya Nayo, a di va wudzisa, khuye: "Khu hayini a na gu velegedwago avbo Kristo?" 5Va di khavo: "Khu Bhetlehema ga Judheya, kholu khidzo gu nga lowago khidzo khu muphrofeti, a nga khuye: 6'Uwe Bhetlehema, litigo la Judha, khu vbindrwi khu mayigo nya makhongolo ya Judha, kholu muthangeli a na gu thangelago vathu vangu va na Israeli a na duga khu gwago!' " 7Khavbo avbo, Herodhi a di ranisa khu gisihaledza vathu vale va nya gugengela, a va wudzisela gwadi matshigu muni ma vbindridego hwane nya gu na va tumbulugedwe khu nyeledzi yile. 8A di va rumela Bhetlehema, a va embela, khuye: "Indrani muya vbweta guti gwadi gyanana gyogyo. Mwagu gi mana, deluni muta nyi embela, gasi eni neni nyi ya gi khozela." 9Na vbedzide gu ganela mufumeli Herodhi, va di phara ndzila yawe. Khavbo avbo, nyeledzi yile va nga bani va guta nayo khu khuga-dambo yi di wonega mbeli gwawe. Na yi vbohide avbo gi nga bani gi romo gyanana, yi di ema. 10Na va wone nyeledzi yile, va di tala khu gunengela. 11Va di bela nyumbani, va ya wona gyanana ni mayi waye Mariya; va di khidzima va gi khozela; va di tula sikhwama sawe, va gi luva khu ndralama, khu libani ni mafura. 12Na va layidwe khu Nungungulu khu ndroro a pwa va nga bweleli ga Herodhi, va di bwelela tigoni gwawe khu yimbe ndzila. 13Na va hongode, ngilozi ya Pfhumu gi di tumbulugela Josefe khu ndroroni, gi mu embela, khiyo: "Khuga u dzega gyanana ni mayi waye, u thavela Egipito. Indra khala iyoyo kala nyi gu tivise, kholu Herodhi a na vbweta gyanana, gasi gu gi songa." 14Josefe a di wuga, ni wutshigu wowo, a gu dzega gyanana ni mayi waye a gu hongola Egipito, 15iyo a nga ya khala kala gufa ga Herodhi. Gutadzisega kharati iso si nga ganedwago khu Pfhumu khu muphrofeti, khuye: "Khu Egipito nyi ranide Mwamana wangu." 16Khavbo avbo, Herodhi, na wonide khuye pembidwe khu vagengeli vale a di garadzega ngudzu, a ruma gusongedwa sanana satshavbo nya sikhwathana sa Bhetlehema ni mayigwana yaye yatshavbo, iso si nga bani si si gu vbindrisi myaga mivili, gulandrisa matshigu a nga embedwago khu vagengeli, gikhati a nga va wudzisago. 17Gu di tadzisega, kharati, iso si nga ganedwago khu muphrofeti Jeremiya, khuye: 18"Li di pwala lito tigoni ga Rama,lito nya dzihuwa nilo nya gililo: 'Khu Rakeli a lilago sanana saye;kha vbweti gu khongotedwa, kholu sanana saye si mwalo gambe, si di bhi!' " 19Na fude Herodhi, ngilozi ya Pfhumu yi di tumbulugela Josefe khu ndroroni, tigoni ga Egipito, khiyo: 20"Khuga u dzega gyanana ni mayi waye, u gu hongola tigoni ga Israeli, kholu va fude avo va nga bani a va gu vbweta gu songa gyanana." 21Josefe a di khuga a gu dzega gyanana ni mayi waye a wuya tigoni ga Israeli. 22Aholu, na pwide nya gupwani khu Arkelawo a nga tshikedzago wulanga wa babe waye kha nga mufumeli wa ya Judheya, a di khala hwanga gu hongola Judheya. Na layidwe khu Nungungulu khu ndroro, a di hongola tigoni ga Galileya. 23Iyo a nga ya khalago dhoropani ga Nazareta. Gu tadzisega, kharati, iso si nga ganedwago khu vaphrofeti, khavo: "A na ranwa Munazarenu."


Copyright
Learn More

will be added

X\