MATEWU 19

1Na vbedzide gu ganela esi, Jesu a di khuga khu Galileya a gu hongola Judheya, khisi kheyi nya tsongo wa Jordhani. 2A di landrwa khu sidzemo nya singi; uye a di hawulugisa vatshavbo va nga bani va gu dwala. 3Va di manega Vafarisi va nga ta mu wudzisa, gasi gu mu linga, khavo: "Ina gu ngu kodzega gu mwama a hula mwangadzi waye khu gigaradzo nya gukari, gani?" 4Jesu a di va hakha, khuye: "Ina mu si gu hevbulini milowo yi gu khiyo: Gukhugela guhegulani, Nungungulu a di vanga mwama ni nyamayi, gani? 5Bwelo khavbo a ganela, khuye: 'Khu kharato, mwama a na diga babe ni mayi aya patana ni mwangadzi waye, va gu khala va vavili muthu moyo,' gani? 6Khu kharato, khandri vavili gambe, aholu moyo basi. Nari kharato, muthu kha dzi kodzi gu tshula egi gi hungidwego khu Nungungulu." 7Va di wudzisa, khavo: "Khu ginani Mosi a nga rumago gu nyamayi a ningwe musi nya guhulane gikhati a hudwago?" 8Jesu a di phindrula, khuye: "Mosi a di mi dzumedzisani gu hula vagadzi vanu khu kota nya guvivbe nya myonyo yanu; aholu guhegulani khandri kharato. 9Eni nyi ngu mi embalani, kheni: uye a hulago mwangadzi waye, vbavbandze nya dzegano nya guloledziswe, a gu dzega wa walo, a ngu bhaya." 10Vapizane va di mu embela, khavo: "A gu bani ari isoso siguruvedzo nya mwama ni mwangadzi waye, gwadi khu gu mba dzega!" 11Jesu a di va hakha, khuye: "Khandri vatshavbo va ma hakhago gwadi mahungu yaya; ma gu hakhwa basi khu vale va gu ni giningwa gyogyo. 12Vomo va nga velegwa na va thenidwe, navo va nga khu gu thenwa khu vathu vakwawe, navo va nga dzi thenago vabune khu gufela mufumu wa ndzadzini. Uye a dzi kodzago gu ma pwisisa, a na ma pwisise!" 13Khavbo avbo, va di mu yisela sanana, gasi a si handzege mandza ni gu si lombelela. Aholu vapizane va di si himbedzela. 14Jesu a di va embela, khuye: "Digani sanana soso, mu nga si himbedzeli guta eno gwangu, kholu khwawe mufumu wa ndzadzini." 15Na si handzegide mandza, a di phara ndzila yaye a gu hongola. 16A di yedwa khu lidzaha limwedo li nga ya mu wudzisa, khilo: "Muhevbudzi, ginani nya gyadi nyi fanedego gu gira gasi gu mana guvbanya nya gupindruge?" 17Jesu a di mu hakha, khuye: "Khu ginani u nyi wudzisago khigyo gi gu gyadi? Moyo basi a gu wadi. Aholu wa gu vbweta gu mana guvbanya nya gupindruge, landrisa milayo." 18Lidzaha li di mu wudzisa khilo: "Yevbini?" Jesu a di li hakha, khuye: "U nga songi muthu, u nga bhayi; u nga bi; u nga singedzi muthu; 19rungudza babe ni mayi; gola muthu kwanu kha nga idzo u dzi golago khidzo." 20Lidzaha li di mu embela, khilo: "Nyi ngu landrisa satshavbo soso; ginani gi nga tshadego?" 21Jesu a di mu embela, khuye: "Wa gu vbweta gu khala muthu a vbeledego, indra u ya rengisa satshavbo u gu naso, u ninga sisiwane, gasi u mane thomba ya ndzadzini. Hwane nya isoso, delu uta nyi landrela." 22Na li pwide mahungo yaya, lidzaha lile li di hongola na li gutshaniseka monyoni, kholu li diri ni dzithomba nya dzingi. 23Khavbo avbo, Jesu a di embela vapizane vaye, khuye: "Khu lisine nyi ngu mi embelani: gu na garadza ngudzu ga muthu nya gitetema gu bela mufumuni wa ndzadzini. 24Nyi ngu engedza gambe, kheni: gu vbevbugide gu vbulela lidzoki vbatshinganotunu guvbindra gu dzega gitetema gi bela mufumuni wa ndzadzini." 25Na va pwide esi, vapizane va di liwuga, khavo: "Kharati khu mani a na gu vbulugago?" 26Jesu a di khedzisa gwadi vatshavbo, a va embela, khuye: "Ga vathu kha si kodzegi, aholu ga Nungungulu satshavbo si ngu kodzega." 27Pedro a di khusa lito a mu embela, khuye: "Ethu hi digide silo sathu satshavbo hi gu landra. Libhaso muni hi na gu li manago?" 28Jesu a di va hakha, khuye: "Khu lisine nyi ngu mi embelani: mufumuni wa Nungungulu, gikhati Mwamana wa Muthu a na khalago vbagikhalotunu gwaye nya gutale khu gidhumo, enu mu nga nyi landrela, mu na khalani vbasikhalotunu, gasi gu lamulani mahundzu yatshavbo nya likhumi na mavili ya Israeli. 29Gasi watshavbo wule a nga digago ndranga, vandruye, babe, mayi, sanana ni sipeto khu kotani nya lina langu, a na si mana na si engedzedwe lizana dzinyondro, bwelo khavbo a mana guvbanya nya gupindruge. 30Nya vangi va nya guphela va na bani vari mahegisela; gasi nya vangi va gu mahegisela va na bani vari va gu phela.


Copyright
Learn More

will be added

X\