MATEWU 18

1Gikhati gile, vapizane va di ya ga Jesu vaya mu wudzisa, khavo: "Khu mani a gu khongolo mufumuni wa ndzadzini?" 2Uye a di rana gyanana a gi vega vbakari gwawe, khuye: 3"Khu lisine nyi ngu mi embelani, kheni: mwamba vbindrugedza mu khala nga sanana, kha mu na bela mufumuni wa ndzadzini. 4Khu kharato, uye a dzi sodzisago kha nga gyanana gegi a na bani ari khongolo mufumuni wa ndzadzini. 5Uye a hakhago gyanana nya nga egi, khu lina langu, kheni a nyi hakhago. 6"Gasi uye a khunguvanyisago gimwegyo nya sanana sesi si khodwago gwangu, a diri tshukwana gu a hungwe thamoni giwindri nya gikhongolo nya gitshindro, gile nya gutshindrwe khu dziburu, a gu rinywa nondrwani. 7Libango ga litigo khu kotani nya sikhunguvanyiso! Nyi ngu dziti nya gukheni iso si mwalo gu vhikedwa; aholu, libango li na ni wule a si vangago! 8Wa gu wona nya gukhuwe mandza yago mwendro ngondro wago si ngu gu tshunganisa, si pile u dzudzuga, kholu i tshukwana gu u bela guvbanyani nya gupindruge nuri ni gimbobo mwendro na wu ndzodola, guvbindra gu rinywa niloni nya gupindruge nuri ni mandza ni migondro yago ya mivili. 9Wa gu wona gu khuwe liso lago li ngu gu tshunganisa, li duse u dzudzuga, kholu i tshukwana gu bela guvbanyani nya gupindruge nuri ni gidzogo, guvbindra gu rinywa niloni wa Ghehena nuri ni maho yago ya mavili. 10Dzi woneleni, mu nga nyenyini sanana sesi, ne gimwegyo, kholu nyi ngu mi embelani: sirumwa sa Nungungulu si va sayisago, somo gikhati gyatshavbo mahoni ga Babe wangu a guromo ndzadzini. [ 11Kholu Mwamana wa Muthu atide guta vbanyisa iso si nga bani si dzimede.] 12Nga nyi embelani: ina muthu a gu ni lizana dzinvuta, a gu dzimeledwa khu mweyo, kha ngu diga idzo nya livbandre na mana magumi ni livbandre na dzina mu gigomoni, a gimbila a gu vbweta iyo yi nga dzimela, gani? 13Na yi mane, khu lisine nyi ngu mi embelani, kheni a ngu tsakiswa khiyo guvbindra dzile nya livbandre na mana magumi ni livbandre na dzina dzi nga mba dzimela. 14Kharati nuye Babe wanu a guromo ndzadzini kha vbweti gu khuye ni gimwegyo nya sanana sesi gi dzimele. 15"Wa gu wona gu khuwe ndriyago ghohide, indra u ya mu kawuka na muri enu mwa vavili basi. A gu yingisa, u na bani u vbanyiside ndriyago. 16Amba gu yingisa, dzega muthu moyo mwendro vathu vavili u hongola navo, gasi gu satshavbo si lamudwe khu vafakazi vavili mwendro vararu. 17Amba va yingisa, mu ningele ga libandla; amba vbweta gu yingisa libandla, mu vege kha nga muhedheni mwendro kha nga mukhuphisi. 18"Khu lisine nyi ngu mi embelani, kheni: satshavbo mu no si dzumedzisago mafuni si na dzumedziswa niyo ndzadzini; niso mu na gu si himbedzelago mafuni si na himbedzedwa niyo ndzadzini. 19Nyi ngu mu embelani gambe, kheni: Va gu tshangana vavili vanu, mafuni, gasi gu lomba gilogyo, va na ningwa khu Babe wanu a guromo ndzadzini. 20Kholu avbo va manegago vavili mwendro vararu na va tshanganide, khu lina langu, eni nyi na bani nyi romo vbakari gwawe." 21Khavbo avbo, Pedro a di hidzimela ga Jesu a mu wudzisa, khuye: "Pfhumu, nya guhosedwa khu ndriyangu, nyi na ni fanelo nya gu mu tsetselele nyondro ngani? Nyi na mu tsetselela kala livbandre na dzimbili dzinyondro?" 22Jesu a di mu hakha, khuye: "Kha nyi gu embeli, kheni: livbandre na dzimbili dzinyondro, aholu, livbandre na mavili magumi ma bweledzedwago livbandre na dzimbili dzinyondro. 23Khu kharato, mufumu wa ndzadzini wu ngu fananiswa ni mufumeli moyo a nga vbweta guti magimbidziselo nya thumo ga sithumi saye. 24Githumi a nga phelago khigyo gi diri ni mangava nya lizana mazana dzitalenta (10.000). 25Kha nga ulo a nga bani ari mwalo dzitsapawu nya gulivbe khidzo, pfhumu yile yi di ruma khiyo a rengiswe uye ni mwangadzi waye, ni sanana, ni thomba yaye yatshavbo, gasi gu mana iso nya gulivbe khiso mangava. 26Githumi gile gi di dzi thesa migondroni gwaye, gi gu mu lomba, khigyo: 'Nyi dige nyi ya thuma, nyi nata gu livba mangava yatshavbo.' 27Pfhumu yile yi di pwa gisiro, yi mu tsetselela mangava yatshavbo. 28Na dugide khu vbale, a di mana mungana waye a nga bani a mu fiyaride lizana dzitsapawu. A di mu dzwinya ngolo, a mu sokhovedza, na gu khuye: 'Livba mangava yago!' 29Wule a di dzi thesa vbavbatshi, a mu lomba, khuye: 'Nyi dige nyi ya thuma, nyi nata gu livba mangava yatshavbo.' 30Aholu uye kha nga dzumela; a di ruma gu a modwe kala a gu livba mangava yatshavbo. 31Vangana vaye, na va wone esi, va di garadzega, vaya tivisa pfhumu yawe iso si nga giregago. 32Pfhumu yile, khavbo avbo, yi di mu ranisa yita mu embela, khiyo: 'Githumi nya guvivbe! Nyi gu tsetselede mangava u nga bani uri nawo, kholu u nga nyi lombago. 33Khu ginani u nga mba tsetselela nuwe mungana wago kha nga eni nyi nga gu tsetselelago?' 34Pfhumu yile, yi di garadzega, yi di mu ningela ga muthangeli nya lipaso a khothedwa kala a gu livba mangava yatshavbo. 35Khidzo kharati a na gu mi girago Babe wangu a guromo ndzadzini, mwamba tsetselelana khu gyanu."


Copyright
Learn More

will be added

X\