MATEWU 17

1Hwane nya livbandre na limwedo matshigu, Jesu a di dzega Pedro, Johane ni ndriyaye Jakobe, a gu hongola navo venga gigomoni nya gulaphe. 2A di vbindrugedza giemo mahoni gwawe. Khovbe yaye yi di ngangamela nga lidambo; dzingandzu dzaye dzi di aga ngudzu. 3Avbovbo a di tumbuluga Mosi ni Eliya, na va gu bhula naye. 4Pedro a di khusa lito, khuye: "Pfhumu, gwadi gu hi khale avba; wa gu dzina nyi na gira mitshatsha miraru: moyo wago, mumbe wa Mosi, mumbe wa Eliya." 5Na nga gu ganela, li dita lipfhi nya gungangamele lita va fenengedza khu mwedzi waye; khu vbakari nya lipfhi gu di pwala lito, na li gu khilo: "Oyu khu Mwamana wangu nya gu mu haladze ngudzu, a tsakisago monyo wangu; mu yingiseni." 6Na va pwide mahungo yaya, vapizane va di thega vbavbatshi khu khovbe na va tade khu hwanga. 7Jesu a di va yela aya va phara, khuye: "Khugani mu eme, mu nga thavi." 8Na va hapfhude, va di wona basi Jesu nyambana mumbe muthu. 9Na va gu tshiga khu mu gigomoni, Jesu a di va laya, khuye: "Mu nga embeli muthu iso mu ngari gu si wonago, kala Mwamana wa Muthu a wuga khu ga vafudego." 10Vapizane va di mu wudzisa, khavo: "Khu ginani vahevbudzi nya Nayo va gu khavo Eliya a na phela khuye a wuya?" 11Uye a di va hakha, khuye: "Ina, Eliya a na wuya ata lulamisa satshavbo. 12Aholu eni nyi ngu mi embelani, kheni: Eliya dzude, aholu kha va mu tugula. Va di mu phara idzo va nga dzinago khidzo. Kharati nugo, va na sanisa Mwamana wa Muthu." 13Vapizane va di dziti nya gukhavo a gu thula Johane Mubhapatisi. 14Na va dzude avbo gi nga bani gi romo gidzemo, a di duga mwama moyo a nga ya dzi thesa migondroni ga Jesu a mu embela, khuye: 15"Pfhumu, pwela wusiwana mwamana wangu, kholu a na ni gitshira gi mu sanisago ngudzu. Dzinyondro dzingi a thegelago niloni ni matini. 16Nyi di mu reside ga vapizane vago, aholu kha va dzi kodza gu gira gilo." 17Jesu a di khuye: "Mela nya vathu nyamba khodwa, mu si gitigo nigyo mu girago! Nyi na khala na nu kala lini? Nyi na mi timiselani kala lini? Mu reseni eno gwangu." 18Khavbo avbo, Jesu, a di kawuka liphuvbo nya guvivbe li gu duga ga gikhwathana gile li gu hongola. Gi gu hawulugisa guralo. 19Vapizane va di ya wudzisa Jesu, khu phuvbo, khavo: "Khu ginani ethu hi nga tandrwa khilo gu li tutumisa?" 20A di va hakha, khuye: "Khu kotani nya gukhodwe gwanu a gu gudugwanana. Khu lisine nyi ngu mi embalani, kheni: gukhodwa gwanu gwa gu fana ni mbewu nya ginapi, mu na rumani gigomo gegi, khenu: 'Siguga khavba uya khala vbale;' gi na mu yingisani. Khu kharato, gimwalo gi na mi tandrago. [ 21Lifumbu leli nya maphuvbo la gu tutumiswa basi khu tshivba nya nombelo ni guhala."] 22Na va tshanganide Galileya, Jesu a di va embela, khuye: "Mwamana wa Muthu a na ni fanelo nya guningedwe mandzani nya vathu, va mu songa; 23aholu khu litshigu nya wuraru a na wuga." Na va pwide esi, vapizane va di swihala ngudzu. 24Na va vbohide Khafarnawume, vakhuphisi va nyumbani ga Nungungulu va di ya ga Pedro, vaya mu wudzisa, khavo: "Ina muhevbudzi wanu kha livbi khupho nya Nyumba ya Nungungulu gani ?" 25A di hakha, khuye: "A ngu livba." Na vbohide gaya, Jesu a di thangulela gu mu wudzisa, khuye: "Nga nyi embela, Simoni: Khu vamani va khuphelago ni gu girela mihengo vafumeli nya mafu? Khu ngamo yawe, mwendro khu valombo?" 26Kha nga ulo a nga phindrulago, khuye: "Khu valombo," Jesu a di mu embela, khuye: "Khu kharato, ngamo yawe yi mwalo giguruvedzo nya gukhuphe. 27Ambari ulo, gasi hi si tshunganisi muthu, indra phwani uya lova. Ndzandzi u na gu phelago khiyo gu mola, yi tule likana, u na mana dzitsapawu. Dzi dzege uya livba khidzo khupho wago ni wangu."


Copyright
Learn More

will be added

X\