MATEWU 16

1Khavbo avbo, Vafarisi ni Vasadhusi va di mu yela, gasi guya mu lomba gu a va girele giliwugiso gya ndzadzini. 2Uye a di va hakha, khuye: "Vba gupfolani nya lidambo, mu ngu khenu: 'Wutshigu wa muhuno wu na bani wuri wadi, kholu damboni gu fuvide.' 3Na gu ngari dzimindru dzikhongolo, mu ngu khenu: 'Muhuno gu na bani guri ni phuvbo, kholu idzo gu fuvidego khidzo damboni gwa gu patedzela ni gusivbala.' Kha nga mu wonago, mu ngu kodza gu tshamusela makhalelo ya damboni, aholu kha mu kodzi gu tshamusela siyeyedzo nya dzinango! 4Mela yoyu nya vathu nya guvivbe, va si khodwigo, wa gu lomba giyeyedzo! Hulo kha va na ningwa gimbe giyeyedzo vbavbandze nya giyeyedzo gya Jona." Khavbo avbo, a di va ditsha a khuga a gu hongola. 5Vapizane, gikhati va nga tshatugago, va di divala gu dzega sibaba. 6Jesu a di va embela, khuye: "Gwadigwadi ni mela nya Vafarisi nuye nya Vasadhusi." 7Khavbo avbo, va di vbweta guti, tshamuselo nya magana yoyo, na va gu dzi wudzisa khavo: " Mwendro khulo hi nga diga sibaba." 8Aholu Jesu, a nga bani a wona mapimo yawe, a di va embela khuye: "Vathu nya gukhodwe vbadugwana, khu ginani mu emago dzikhana khu gu khenu kha mwa dzega sibaba? 9Mu si gu si pimi iso nyi si thulago? Ina kha mu dundrugi sibaba sile nya livbandre si nga enedzago livbandre magumi mazana nya vathu, ni tengo nya situndru mu nga tadzago khu sipandre si nga tshalago, gani? 10Kha mu ngo dundruga gambe sibaba sile nya livbandre na sivili si nga enedzago magumi mana mazana nya vathu, ni tengo nya situndru mu nga tadzago khu sipandre si nga tshalago, gani?" 11Khu ginani mu nga mba tugula nya gukhenu khandri nyi di thula gibaba gikhati nyi nga mu embelani, kheni: Gwadigwadi ni mela nya Vafarisi nuye nya Vasadhusi. 12Khavbo avbo, va di dziti nya gukhavo Jesu khandri a di vbweta gu khuye va dzi wonele ga mela nya sibaba; aholu va dzi wonele ga sihevbudzo nya Vafarisi ni Vasadhusi. 13Na vbohide tigoni ga Sezareya gwa Filipi, Jesu a di wudzisa vapizane vaye, khuye: "Vathu vari khavo khuye mani Mwamana wa Muthu?" 14Va di hakha, khavo: "Vomo va gu khavo khu Johane Mubhapatisi; vambe vari khavo khu Eliya; vambe khavo khu Jeremiya mwendro moyo nya vaprofeti." 15Jesu a di wudzisa: "Ahati enu, mwari khenu kheni mani?" 16Simoni Pedro a di khusa lito a gu phindrula, khuye: "Uwe khuwe Kristo, Mwamana wa Nungungulu a vbanyago." 17Jesu a di mu hakha, khuye, "U kategide, Simoni, mwamana wa Jona, kholu isoso khandri u di tiviswa khu muthu; aholu, u di tiviswa khu Babe wangu a guromo ndzadzini. 18Eni neni nyi ngu gu embela, kheni: Uwe khuwe Pedro; vbatshani nya giwindri gegi nyi na vbaha libandla langu. Tshivba nya mufumu nya lufu kha yi na li gira gilo. 19Nyi na gu ninga dzipfhungulo nya mufumu wa ndzadzini; igyo uno gi dzumedzisago mafuni gi na dzumedziswa niyo ndzadzini; igyo uno gi himbedzelago mafuni gi na himbedzedwa niyo ndzadzini." 20Khavbo avbo, a di laya vapizane vaye gu vasi embeli muthu khavo uye khu Kristo. 21Gukhugela litshigu lile, Jesu a di phela gu yeyedza vapizane vaye khuye na ni fanelo nya guhongole Jerusalema aya saniswa ngudzu khu madhota, ni vakhongolo nya vaphase ni vahevbudzi nya Nayo; a songwa; aholu a wuga khu litshigu nya wuraru! 22Pedro a di mu rana khu phuvbo, aya mu kawuka, khuye: "Ugo gu nga giregi gwago, Pfhumu! Silo nya nga isoso gima kha si na gu dugelela!" 23Gasi uye, a di thendregedza, a embela Pedro, khuye: "Leya, Sathane! U womo kha nga mutshunganisi wangu, kholu mapimo yago kha mati khu ga Nungungulu; aholu, khu vathu!" 24Jesu a di embela vapizane vaye, khuye: "Uye a vbwetago gu nyi landrela, a na dzi nyenye wutumbu waye, a vbagare gihambano gyaye a nyi landrele. 25Uye a vbwetago gu vbanyisa womi waye, a na wu luza; gasi uye a luzago womi waye khu kotani yangu, a na wu mana. 26Giphaso muni a gi manago muthu a fumelago litigo rumba, a gu hegisa khu gu dzimeledwa khu hefemulo waye? Mwendro saye, ginani muthu a dzi kodzago gu ningela gasi gu dzegisa khigyo hefemulo waye? 27Kholu Mwamana wa Muthu a nata ni sirumwa sa Nungungulu, na tade khu gidhumo gya Babe waye, ata ninga moyo ni moyo, tshatshazelo waye gu khedza khu mithumo yaye. 28Khu lisine nyi ngu mi embelani nya gukheni: vomo hi gu navo avba va na gumba linga lufu, kala va gu wona Mwamana wa Muthu na guta ni mufumu waye."


Copyright
Learn More

will be added

X\