MATEWU 15

1Vafarisi ni vahevbudzi nya Nayo va nga bani va dzude khu Jerusalema, va dita ga Jesu vata mu wudzisa, khavo: 2"Khu ginani vapizane vago va si landrisigo mavbanyelo ya va gale, olu va hodzago nyamba hamba mandza?" 3Gasi Jesu a di va wudzisa, khuye: "Ahati enu, khu ginani mu si landrisigo nayo wa Nungungulu khu kotani nya mavbanyelo yanu? 4Khu lisine, Nungungulu ganede, khuye: 'Rungudza babe ni mayi,' ni gu khuye: 'Uye a hembululago gani babe waye, gani mayi waye, a nafe.' 5Gasi enu mwari khenu: 'Ni wevbini uye a embelago babe waye, mwendro mayi waye, khuye: Iso nyi nga bani nyi fanede gu gu phasa khiso si phasedwe ga Nungungulu,' 6muthu yoyo tshulegide mahoni gwanu. Mwalo gambe giguruvedzo nya guphase babe mwendro mayi waye. Mu tshipisa, kharati, nayo wa Nungungulu khu kota nya mavbanyelo yanu. 7Vapfhadzi! Khidzo kharati a nga profetago khidzo Isaya na gu thula enu, khuye: 8'Vathu va vava gu nyi rungudza khu likana,aholu myonyo yawe yomo hwindzo ni eni. 9Milombelo va nyi girelago khya malipha,kholu milayo va hevbudzago khya vathu.' " 10Khavbo avbo, a di rana gidzemo, gasi gi hidzimele vbafuvbi gwaye. A di gi embela, khuye: "Nyi yingiseni gwadi mwatshavbo, gasi mu si mane gwadi iso nyi vbwetago gu mu embela. 11Khandri gile gi belago khu kanani gi nyenyezisago muthu, aholu igyo gi dugago khu kanani gwaye khigyo gi mu nyenyezisago." 12Vapizane vaye va di mu yela vaya mu embela, khavo: "Ina u ngu dziti nya gukhuwe Vafarisi va zangaride khu maganelelo yale u nga ganelago khayo, gani?" 13Uye a di va hakha, khuye: "Simbo watshavbo wu nga mba yadwa khu Babe wangu a guromo ndzadzini wu na sigudwa. 14Va digeni; sikhumu si vbwetago gu phara kunga sikhumu sikwawe! Mu ngu dziti nya gukhenu gikhumu gya gu vbweta gu phara kunga gikhumu gikwawe, sa sivili si ngu ya thegela phalani." 15Pedro a di khusa lito, khuye: "Hi tshamusela gipimaniso gegi." 16Jesu a di mu hakha, khuye: "Gasi enu nenu mungari ni mihungo nya gulemele? 17Ina kha mu dziti nya gukhenu gyatshavbo igyo gi belago khu kanani gya gu hongola kala mu gisusuni, gi gu hegisa khu gu duga vbavbandze khu ndzila yaye, gani? 18Gasi gyatshavbo igyo gi dugago khu kanani gya guta khu monyoni; egi khigyo gi nyenyedzisago muthu. Kha mu si ti isoso? 19Khu monyoni ma ngu duga mahingigedzo nya guvivbe, wughevenga, wubhayi, wuphuphulu, wuvafa, gusingedza ni mahungo yatshavbo nya guhembulule Nungungulu. 20Esi khiso si nyenyedzisi muthu. Gasi gu hodza nyamba hamba mandza, isoso kha si nyenyedzisago muthu." 21Jesu a di khuga khu vbale a gu hongola phuvbo ga Tiro ni Sidhoni. 22Khavbo avbo, nyamayi moyo nya mukananewu, a nga bani a guta khu phuvbo ga iyoyo, a di phela gu gulumela, khuye: "Pfhumu, Mwamana wa Dhavide, nyi pwele wusiwana. Nyamahegyane wangu a ngu saniswa ngudzu khu liphuvbo nya guvivbe." 23Aholu uye kha mu hakha gilo. Vapizane va di ya ga Jesu, vaya mu lomba, na va mu khongotela, khavo: "Mu embele, a hongole, kholu a ngu hi gulumela." 24Uye a di va hakha, khuye: "Eni nyi di rumedwa guta vbanyisa basi dzinvuta dzi dzimedego dza Israeli." 25Aholu nyamayi wule a di ta khidzima migondroni gwaye, khuye: "Nyi phase, Pfhumu." 26Uye a di mu hakha, khuye: "Khandri gwadi gu dzega guhodza nya sanana u ninga simbwana." 27Nyamayi a di khuye: "Khidzo u ganelago, Pfhumu. Aholu dziti nya gukhuwe simbwana si ngu roledzela dzitshetana dzi thegelago khu vbamezatunu ya vamune ndranga." 28Khu kharato, Jesu a di mu hakha, khuye: "Nyamayi, gukhodwa gwago gukhongolo! Gu na girege kha nga guhaladza gwago." Gu khugela gikhati gile nyamahegyane waye a di hawuluga. 29Na khugide khu vbale, Jesu a di hongola phwani gwa Galileya, iyo a nga ya gwela gigomoni a khala. 30A di tedwa khu vathu nya vangi ngudzu, na vari ni sikhurubwa, silima, sikhumu, sidudu ni vambe vadwali, vangata va vega migondroni gwaye. Uye a di va hawulugisa vatshavbo. 31Vathu vale va di liwuga khu gu wona sidudu na si gu ganela, silima na si gu gimbila gwadi na si lulamide, sikhurubwa na si gimbila, sikhumu na si gu wona. Va di dhumisa Nungungulu wa Israeli. 32Jesu, na ranide vapizane vaye, a di va embela, khuye: "Nyingu pwa gisiro khu vathu vava, kholu va na ni matshigu mararu na nyiri navo, nyamba hodza gilo. Kha nyi vbweti gu va diga va gu hongola nyamba hodza gilo, va nga rereka ndzilani." 33Vapizane va di mu phindrula, khavo: "Hi na va ninga va hodza ginani giwulani mumu nyambana ndranga, olu a gu vathu va tadego kharati?" 34Jesu a di va wudzisa, khuye: "Sibaba singani mu gu naso?" Va di hakha, khavo: "Livbandre na sivili, ni sindzandzyanyana." 35A di ruma vathu vatshavbo va khala vbavbatshi, 36a dzega sibaba sile nya livbandre na sivili ni sindzandzyana sakone, a bonga, a si pilela, a si ningela ga vapizane, gasi va si kabanisela vathu. 37Vatshavbo va di hodza, va khura, va bwe la khavbo va rolela, va gu tadza livbandre na sivili situndru khu sipandre si nga tshalago. 38Avo va nga hodzago va diri tengo nya magumana mazana nya vathu, nyamba valela vanyamayi ni sanana. 39Na va dugide va gu hongola gaya vatshavbo, Jesu a di bela ngalavani a gu hongola tigoni ga Magadhani.


Copyright
Learn More

will be added

X\