MATEWU 14

1Khu matshigu yoyo, ndruma ya Jesu yi di vboha mu dzindzeveni dza mufumeli Herodhi; 2uye a di embela madhota yaye, khuye: "Muthu yoyo khu Johane mubhapatisi a nga wugago khu ga vafudego! Khu kharato a manago tshivba nya gugire khiyo siliwugiso satshavbo sesi!" 3Khaguva khuye Herodhi a nga rumela gu modwa Johane a hungwa dzitshinga, a thedwa pasoni, khu kotani ya Herodhiya, mwangadzi wa ndriyaye, Filipi, 4kholu Johane a di gu mu embela, khuye: "U mwalo fanelo nya gudzege mwangadzi wa ndriyago." 5A di dogorede gu mu songa, aholu a di thava vathu, va nga bani va gu muti kha nga muprofeti. 6Litshigu Herodhi a nga enedzago myaga nya guvelegwe gwaye, nyamahegyane wa Herodhiya a di hana vbakari nya vathu, a gu tsakisa Herodhi, 7Herodhiya di sambanya khuye a na mu ninga ni gevbini igyo a na gu mu lombago. 8Na kutsedzedwe khu mayi waye, nyamahegyane wule a di mu embela, khuye: "Nyi ninge, mbiyani momu, hungo wa Johane mubhapatisi." 9Mufumeli Herodhi a di garadzega aholu, khu kota nya gisambanyo a nga girago vbakari nya vathu, a di ruma gu khuye va mu resele. 10A di ruma, gu pidwa hungo wa Johane mubhapatisi a nga bani aromo pasoni. 11Na va reside hungo khu mbiyani, va di wu ningela ga nyamahegyane, a wu yisa ga mayi waye. 12Vapizane va Johane, va dita dzega girumbi va ya dzinga. Khavbo avbo va di ya tivisa ga Jesu. 13Jesu, na pwide esi, a di bela ngalavani a khuga khu vbale a gu hongola wulangani nya giwula, gu nga bani guri hwindzwana; aholu vathu, na va dzi tide, va di mu landra khu mawundru, gu khugela madhoropani gwawe. 14Na gu tshiga khu ngalavani, Jesu a di wona gidzemo nya gingi. A di pwa gisiro, a gu hawulugisa vadwali vawe. 15Ni silambwana, vapizane va di ya ga Jesu va ya khavo: "Lidambo li hwide, nari gu wulanga wowu giwula; va bweledze, gasi va kodze gu gimbila va renga gilogyo nya guhodze dzindrangani dza vbafuvbyana mumu." 16Aholu Jesu a di va hakha, khuye: "Va nga hongoli; va ningeni enu guhodza." 17Va di hakha, khavo: "Avba igyo hi gu nagyo livbandre sibaba ni dzindzandzi dzimbili basi." 18Jesu a di va embela, khuye: "Si reseni eno gawangu." 19Hwane nya gu bani a rumide gidzemo gu khala vbavbatshi, avbo wu nga bani wu romo mwasi, a di dzega sibaba sile nya livbandre ni dzindzandzi dzimbili, a gu khusedza maho, a si kategisa; a di pilela sibaba a gu si ningela ga vapizane, avo va si kabanisela gidzemo. 20Vatshavbo va di hodza, va khura. Khu sipandre si nga tshalago va di tadza likhumi na sivili situndru. 21Avo va nga hodzago va diri tengo nya livbandre magumi mazana nya vathu, nyamba valela vanyamayi ni sanana. 22Khavbo avbo, Jesu a di ruma vapizane vaye gu bela ngalavani va bani va tshatuga, uye na nga gu phalalegisa vathu. 23Na va phalalegide, a di gwela gigomoni, gasi guya lombelela enga. A di pfoledwa khu lidambo vbale, nari uye enga. 24Gikhati gyogyo, ngalava yi di romo vbakari nya mati, na yi gu vetwa khu mavimbi, kholu va di hambana ni phuvbo. 25Ni marandra gugya Jesu a di va yela, na gu gimbila khu vbatshani nya mati. 26Na va mu wone na gu gimbila khu vbatshani nya mati, vapizane va di thuruga, va gulumela, khavo: "Gikono!" 27Khavbo avbo, Jesu a di va embela, khuye: "Rulani, mu nga thavi, kheni!" 28Pedro a di mu hakha, khuye: "Wa gu bani uri uwe, Pfhumu, nyi rane nyite iyoyo gwago khu vbatshani nya mati." 29Jesu, khuye: "Delu." Pedro, na tshigide khu ngalavani, a di khinga Jesu khu vbatshani nya mati. 30Aholu, na pwide tshivba nya phuvbo yi nga bani yi gu furugedza ngudzu, a di khala hwanga, a gu phela gurika. Khavbo avbo, a di womba huwa, khuye: "Nyi vbanyise, Pfhumu!" 31Jesu a di mu phara khu libogo, a gu mu embela, khuye: "Muthu nya gukhodwe vbadugwana, khu ginani u nga kanakanago?" 32Na va bede ngalavani, phuvbo yi di degula. 33Vatshavbo va nga bani varomo ngalavani, va di khidzima migondroni ga Jesu, va gu mu embela, khavo: "Khu lisine u Mwamana wa Nungungulu!" 34Na va tshatugide, va di tshigela tigoni ga Jenezare. 35Na va mu tide khavo khuye, vathu va tigoni mule, va di tivisana vatshavbo. Khavbo avbo, va di mu resela vadwali vawe vatshavbo. 36Vata mu lomba gu khavo a va dzumedzise gu kuha tshoka nya libhadzi laye. Vatshavbo avo va nga yi kuhago, va di hawulugiswa madwali yawe yatshavbo.


Copyright
Learn More

will be added

X\