MATEWU 13

1Litshigu lile, Jesu a di khuga khu ndrangani a hongola siwoni aya khala. 2A di ya randredwa khu vathu nya vangi ngudzu, gu nga mu girago gu a bela ngalavani a khala, a tshiya gidzemo siwoni. 3Khu vbale, a di va hevbudza silo nya singi khu sipimaniso, a gu va embela, khuye: "Nga wonani, a di khuga muthu nya gukari gasi guya yala mbewu yaye. 4Na gu swaya, yimbe yi di thegela bambe nya ndzila; si dita sinyoni sita yi rothela. 5Yimbe yi di thegela mu siwindrini, u mo manga bani mari mwalo mafu nya mangi; mbewu yi di vbiredzela gu buga, kholu mafu yakone kha ma nga bani ma etide ngudzu. 6Aholu, na li vbiside lihani, yi divbya. Kha nga ulo yi nga bani yiri mwalo mikhamba, yi di banga. 7Yimbe yi di thegela mibani; miba yi di dandra yi gu midza mbewu yile. 8Gasi iyo yi nga thegela mu wulimeni nya wadi, yi di thela mihandro: dzomo dzi nga thela lizana; dzimbe, livbandre na limwedo magumi; dzimbe, magumi mararu dzimbewu. 9Uye a gu ni dzindzeve nya guyingise, a na pwe!" 10Khavbo avbo, vapizane va di mu yela vaya mu wudzisa, khavo: "Khu ginani u ganelago navo khu sipimaniso?" 11A di va hakha, khuye: " Ga enu, Nungungulu a ngu tivisa misihalo nya mufumu wa ndzadzini, gasi avo va mwalo giningwa gyogyo. 12Kholu uye a gu naso a na engedzedwa, a gu mana nya singi; gasi uye a gu mwalo gilo ambari iso a gu naso, a na dzegedwa. 13Khiso isoso si nyi girago gu eni nyi ganela navo khu sipimaniso, kholu va ngu ronoga nyamba wona gilo; ni gu yingisa nyamba pwa gilo. 14Ma ngu tadzisega gwawe mahungu ya muphrofeti Isaya, ma gu khayo: 'Gupwa mu, na pwa aholu kha mu na pima gilo;na mu khedzide, mu na ronoga, aholu kha mu na wona gilo. 15Kha nga ulo myonyo nya vathu vava yi vivbidego, dzindzeve ni maho yawe si segegidego niso,va nga wona khu maho, va pwa khu dzindzeve,ni gu mana gwadi tshamuselo wakone,va vbindrugedze mavbanyelo, gasi eni nyi va vbanyise.' 16"Gasi enu sanu, mu kategide kholu mungu wona; ni dzindzeve dzanu, kholu dzingu pwa. 17Khu lisine nyingu mi embelani nya gukheni: vaprofeti nya vangi ni vanya ndruda va vbwetide gu wona iso mu si wonago, aholu kha va si wona; gu pwa iso mu si pwago, aholu kha va si pwa gilo. 18"Yingisani, nyi mi embele tshamuselo nya, gipimaniso nya muyali. 19Muthu a pwago mahungu nya mufumu asi mapimi ma gu thula ginani, khu wule a nga hakhago mbewu bambe nya ndzila. Na vbohide Sathane, a ngu ta dzega mbewu yi nga bani a yi yadwe monyoni gwaye. 20Wule a nga hakhago mbewu mu siwindrini, khu wule apwago mahungu, a ma hakha khu gunengela gikhatyana gyogyo. 21Kha nga ulo a gu mwalo mikhamba, kha tiya: Sa gu vboha sigaradzo ni sisaniseko khu kotani nya mahungu, a gu dzegela gu ma diga. 22Wule a nga hakhago mbewu mibani, khu wule a pwago mahungu; aholu sigaradzo nya guvbanye ni dzithomba nya mafu si midza mahungu, ma hegisago khu gu mba thela gilo. 23Wule a nga hakhago mbewu mu wulimeni nya wadi, khu wule a pwago mahungu a ma ti ma gu thula ginani: Oyu a ngu thela mihandro nya yingi: lizana, livbandre na limwedo magumi, magumi mararu." 24Jesu a di va ninga gimbe gipimaniso, khuye: "Mufumu wa ndzadzini wu ngu fana ni muthu a nga yalago mbewu nya yadi thembweni gwaye. 25Ni wutshigu, na va lade, a di ta nala waye a ta yala nyasavare vbakari nya mavbila, a gu hongola. 26Na ma dandride mavbila, ma thela mihandro, wu di manega nuwo nyasavare. 27Sithumi sakone si diya ga mune ndranga si ya khiso: 'Pfhumu, khandri u di yala basi mbewu nya yadi thembweni gwago, gani? Nyasavare wa guta khu hayi?' 28A di va hakha, khuye: 'Nala wangu khuye a giridego isoso.' Sithumi si di mu wudzisa, khiso: 'U ngu dzina gu khuwe hi ya wu kulela, gani?' 29A di va hakha, khuye: 'Ahihi, mu nga phazamani mu gu kula gumogo ni mavbila. 30Si digeni si dandre satshavbo kala gu vboha nango nya guvbwere; gikhati gyogyo nyi na embela vavbweri, kheni: Dusani guphela nyasavare, mu wu hunga khu dzinyandra mu vbisa; gasi mavbila, ma pileni, mu ma thela gisangalani gwangu.' " 31Jesu a di va ninga gimbe gipimaniso, khuye: "Mufumu wa ndzadzini wu ngu fana ni mbewu nya ginapi, muthu a nga yi dzegago a yala thembweni gwaye. 32Iyo yi dugwana guvbindra dzimbewu dzatshavbo, aholu, na yi dandride, yi ngu vbindra mitongwe yatshavbo ya thembweni, yi gu khala simbo nya khongolo, wu thela matamo sita mbakelago umo sinyoni si hefemula." 33Jesu a di va ninga gambe gimbe gipimaniso, khuye: "Mufumu wa ndzadzini wu ngu fana ni mela wu nga dzegwago khu nyamayi moyo a wu pfanga ni ndrengo tharu nya wuguvbi, kala wu gugumugisa wuguvbi watshavbo." 34Jesu a di ganela satshavbo sesi khu sipimaniso vbakari nya gidzemo; gimwalo a nga ganela vbakari gwawe nyamba khu gu pimanisa. 35Ma di tadzisega kharati, mahungu ya muprofeti, a nga khuye: "Nyi na ganela khu sipimaniso,gasi gu tivisa silo si nga bani si sihalegide gukhugela guvangwa nya litigo." 36Khavbo avbo, a di diga gidzemo a gu hongola gaya; vapizane va di mu yela vaya khavo: "Hi tshamusele gipimaniso nya nyasavare thembweni." 37Uye a di va hakha, khuye: "Wule a yalago mbewu nya yadi, khu Mwamana wa Muthu. 38Lithembwe khu litigo; mbewu nya yadi khu sanana nya mufumu wa Nungungulu; nyasavare khu sanana sa Sathane; 39nala a nga yalago nyasavare khu Sathane. Gu vbwera khu guhegisa nya litigo; vavbweri khu sirumwa sa Nungungulu. 40Khu kharato, kha nga nyasavare wu kokedwago wu vbiswa niloni, kharato nu go gu na girega guhegisani nya litigo: 41Mwamana wa Muthu a na rumela sirumwa saye si dusela wufumuni gwaye satshavbo sikhunguvanyiso ni a va va girago guvivba, 42si va rinya niloni, umo va na guya lilago ni gu ketsa magwaha. 43Gasi va nya ndruda va na ngangamela kha nga lidambo, mufumuni wa Babe wawe. Uye a gu ni dzindzeve a na yingise. 44"Mufumu wa ndzadzini wu ngu fana ni thomba yi nga sihwago mahangeni yi gu tugudwa khu muthu, a yi fulusa a yi siha wumbe wulanga. Na tade khu gunengela, a di ya rengisa satshavbo a nga bani ari naso, gasi gu renga mahange yale. 45Mufumu wa ndzadzini wu ngu fana gambe ni muthu nya wugwewo, a vbwetago dzindralama nya dzadi. 46Na mane ndralama mweyo nya gurengwe khu dzitsapawu nya dzingi, a gu rengisa satshavbo a gu naso, gasi gu renga ndralama yile. 47"Mufumu wa ndzadzini wu ngu fana gambe ni dzikhoga dzi theswago matini dzi mola mafumbu yatshavbo nya dzindzandzi. 48Na dzi tade, dzi ngu ndrindredwa dzi duswa funguni, avbo vagogi va hathelago dzi ndzandzi, idzo nya dzadi va thela mu lisengweni, idzo nyamba dzadi va dzi dzudzuga. 49Khidzo kharati gu na giregago guhegisani nya litigo: Si na duga sirumwa sa Nungungulu sita hambanisa avo nyamba vadi vbakari nya va nya ndruda, 50si va rinya niloni, umo va na gu lilago ni gu khukhurusa magwaha. 51"Mu si mane satshavbo sesi nyi mi embedego, gani?" Va di hakha, khavo: "Ina." 52Khavbo avbo, a di va embela, khuye: " Khu kharato, muhevbudzi nya Nayo watshavbo a hevbudego iso si lumbago mufumu wa ndzadzini a ngu fana ni mune ndranga a dusago khumo nya thomba yaye silo nya siphya niso sa gale." 53Hwane nya gu na vbedzide gu va ninga sipimaniso sesi, Jesu a di khuga khu vbale. 54Na vbohide tigoni gwawe, a di hevbudza nyumbani nya nombelo. Vatshavbo va di tala khu guliwuga, va gu wudzisana, khavo: "A gu mana hayi guti gogu ni tshivba nya gugire siliwugiso? 55Ina khandruye oyu mwamana wa muvati, gani? Ina mayi waye khandri Mariya? Vandriyaye khandri Jakobe, ni Josefe, ni Simoni ni Judha? 56Vandriyaye nya vanyamayi khandravo hi vbanyago navo tigoni mumu? A gu si mana hayi satshavbo sesi?" 57Khu kharato, va di hiwa khuye. Aholu, Jesu a di va embela, khuye: "Muprofeti a gu nyenywa basi tigoni ni ndrangani gwawe." 58Kha dzi kodza gu gira vbale siliwugiso nya singi khu kotani nya gumba khodwa nya vathu vale.

will be added

X\