MATEWU 12

1Tshigu mwedo nya Sabhado a di vbindra Jesu khu thembweni gu nga bani guri ni dzimbewu. Vapizane, khu gu pwa ndzala, va di vbulula dzidugwana va gu hodza. 2Vafarisi, na va wonide esi, va di mu embela, khavo: "Va phelegede vapizane vago gu gira iso si himbedzedwago khu nayo litshigu nya Sabhado!" 3Aholu uye a di va hakha, khuye: "Mu si gu hevbuli iso a nga girago Dhavide, gikhati a nga pwago ndzala, uye ni avo a nga bani ari navo, gani? 4Idzo a nga belago khidzo nyumbani ga Nungungulu, aya hodza sibaba nya miphaso, si nga bani si si faneli gu hodzwa khuye, ni avo a nga bani ari navo, aholu si nga na si gu fanela gu hodzwa basi khu vaphasi nya mhamba, gani? 5Kha mu dziti nya gukhenu umo nya Nayo gu lovidwe pwani khu litshigu nya Sabhado vaphasi nya mhamba va ngu ndraga nayo nya Sabhado, khu gu thuma nyumbani ga Nungungulu, va gu khala nyambana gighoho, gani? 6Nyi ngu mu embelani nya gukheni avba womo uye a gu khongolo guvbindra Nyumba ya Nungungulu. 7Nari pwani mu ngu wuti tshamuselo nya mahungo ma gu khayo: eni nya gu hatha wuhindzi guvbindra mhamba, na mu si ningi nandru avo va gu mwalo nawo. 8Mwamana wa Muthu mune nya Sabhado yinene." 9Khu vbale a di ya bela nyumbani nya nombelo, 10umo a nga bani aromo muthu nya guhase libogo. Va di gira giwudziso gegi, gasi gu mana igyo nya gu mu ninge khigyo nandru: "Ina gu ngu dzumedziswa gu vbanyisa muthu khu litshigu nya Sabhado, gani?" 11Aholu uye a di va wudzisa, khuye: "Khu mani, vbakari gwanu, a wonago nvuta yaye na yi thegede namboni khu Sabhado, a si yigo aya yi nula? 12Ina muthu kha phasi guvbindra nvuta, gani? Khu kharato, yomo fanelo nya gugire ogu gu gu gwadi khu Sabhado." 13Khavbo avbo, a di embela muthu wule, khuye: "Thawuludza gyandza gyago." A di gi thawuludza, gi hawuluga, gi fana ni gimbe. 14Vafarisi, na va dugide khu vbale, va di ya hunga gikungu nya gu mu songe. 15Jesu, na dzitide, a di khuga khu vbale. Vathu nya vangi va di mu landra. Uye a di vbanyisa vatshavbo, 16a gu va laya gu va si mu pwadzi. 17Ma gu tadzisega, kharati, mahungo ya muphrofeti Isaya, a nga khuye: 18"Khigyo egi githumi gyangu, nyi gi hathidego, gigodwa gyangu, igyo gi nengedzisago monyo wangu, nyi na gi ninga Liphuvbo langu, gasi gi tivise va nya mayigo khigyo gomo gulamudwa. 19Kha gi na dwanisa, ambari saye gu gulumela; mwalo a na gu pwago lito laye mu dzindzilani. 20Kha gi na vbedzisa gufanya tshava nya gupfharege, ne kha gi na tshima litirisida li nga gu tuvigago, kala gi yisa Nayo waye gupalani. 21Va nya mayigo vatshavbo va na liti lina laye!" 22Khavbo avbo, va di mu resela moyo a nga bani ari ni liphuvbo nya guvivbe nari gikhumu, ni wududu. Jesu a di mu hawulugisa, a dzegela gu wona ni gu ganela. 23Gidzemo gi di liwuga, khigyo: "Ina khandruye oyu Mwamana wa Dhavide, gani?" 24Aholu Vafarisi, na va pwide esi, va di khavo: "Uye a gu tutumisa maphuvbo nya guvivbe khu tshivba ya Bhelzebhu, khongolo nya maphuvbo nya guvivbe." 25Na wonide mapimo yawe, Jesu a di va hakha, khuye: "Mufumu watshavbo wu dzi kabanisago khu mitsawa yi wugelana khu gyawe, mufumu wowo kha wu yi danga; lidhoropa latshavbo, mwendro ndraga yi dzi kabanisago khu mitsawa yi wugelana khu gyawe, kha yi dzi kodzi gu pindruga. 26Kharati nugo, Sathane a gu wugela Sathane kwawe, a ngu dzi kabanisa abune. Wuna pindruga kharini mufumu waye? 27Nya gu bani nyi tutumisa maphuvbo nya guvivbe khu tshivba ya Bhelzebhu, ahati sanana sanu sa gu ma tutumisa khu tshivba ya mani? Khu kharato, avo va na bani vari valamuli vanu. 28Aholu nya gu bani nyi tutumisa maphuvbo nya guvivbe khu tshivba nya Liphuvbo la Nungungulu, giyeyedzo nya gupwani mufumu wa Nungungulu wu mi vbohedeni. 29Nga nyi embelani, ka: Gu kodzega kharini gu muthu aya bela ndrangani nya ndrena a gu yi phanga silo saye satshavbo, nyamba phela khu gu yi hunga? Hwane nya gu bani a yi hungide, khavbo a dzi kodzago gu yi phanga ndranga yaye yatshavbo. 30Uye a si emigo ni eni a ngu nyi wugela; uye a si hengeligo ni eni a ngu phalalegisa. 31Khu kharato, nyi ngu mi embelani, kheni: muthu watshavbo a ngu dzi kodza gu tsetseledwa sighoho ni guvivba gwatshavbo a gu ganelago. Aholu uye a hembululago Liphuvbo nya gu Age gima kha na tsetseledwa. 32Uye a valago Mwamana wa Muthu a na tsetseledwa; gasi uye a valago Liphuvbo nya gu Age kha na tsetseledwa, tigoni momu, ambari ni tigoni gu na tago. 33"Kha nga mu dzitigo, simbo nya wadi wa gu velega mihandro nya yadi; gasi uye nyambasi wadi wa gu velega mihandro nyamba yadi. Khu kharato, simbo wa gu tidwa khu mihandro yaye. 34Enu livelego nya dzinyoga, mu na dzi kodza kharini gu ganela khu silo nya sadi, olu mu vivbedwego khu myonyo? Kholu likana la gu dusa iso si tadego monyoni. 35Muthu nya wadi a gu dusa khu monyoni gwaye silo nya sadi; gasi uye a vivbidego a gu dusa khu monyoni gwaye silo nya guvivbe. 36Eni nyi ngu mi embelani, kheni: Magana yatshavbo nyamba yela vathu va talago gu ma ganela va na ma livba litshigu nya gulamudwe. 37Kholu muthu watshavbo a na lamudwa khu mahungo yaye; nandru nuwo a na wu mana khu mahungu yaye." 38Khavbo avbo, va di duga Vafarisi ni vahevbudzi nya Nayo va nga mu lombago, khavo: "Muhevbudzi, ha gu vbweta gu khethu u hi girele giliwugiso gimwegyo, gasi hi gi wone." 39Uye a di va hakha, khuye: "Mela nya vathu nya guvivbe ni gumba khodwa! Mwa gu vbweta giyeyedzo gya Nungungulu; gimwalo gimbe giyeyedzo mu na gu ningwago, vbavbandze nya giyeyedzo gya muphrofeti Jona. 40Kha nga Jona a nga khalago mu girumbuni nya nyatudwi matshigu mararu wutshigu ni mihani, kharato nuye Mwamana wa Muthu a na khala vbavbatshi nya mafu matshigu mararu wutshigu ni mihani. 41Gikhati vaninivhita va na gu emago gumogo ni mela yoyu, khu litshigu nya gulamudwe, va na wu wugela, va wu ninga nandru, kholu avo va dzi vbindrugedzile gikhati va nga tshumayedwago khu Jona. Avba womo uye a gu khongolo guvbindra Jona! 42Pfhumugadzi ya marandzi yi na wugela mela yoyu, yi gu wu ninga nandru. Kholu yi dzude khu mahegiso litigo, gasi guta pwa guti ga Solomoni. Avba womo uye a gu khongolo guvbindra Solomoni! 43"Liphuvbo nya guvivbe la gu duga khu ga muthu la gu legalega ni giwula, li gimbila li gu vbweta wulanga nya guhefemule, li wu hamuga. 44Khavbo avbo, la gu ganela khilo: 'Nyi na bwelela nyumbani gwangu, mule nyi nga dugago khumo.' Na li wide lita yi mana na yiri liphanga, na yi vbiyedwe gwadi, ni gu dongisedwa satshavbo, 45la gu dzega mambe livbandre na mavili maphuvbo nya guvivbe guvbindra ilo, mata bela nyumbani momo ma khala yatshavbo. Khavbo avbo, mavbanyelo nya muthu yoyo ma gu nyenyeza guvbindra idzo a nga bani aromo khidzo guhegulani. Khiso esi sino dugelelago mela yoyu nya guvivbedwe khu monyo." 46Na nga gu ganela vbakari nya gidzemo, a di vboha mayi Waye ni vandriyaye, va ngata khalago khu vbavbandze va mu ranisa, gasi gu ganela naye. 47Moyo wawe a di mu embela, khuye: "Mayi wago ni vandriyago vomo vbavbandze; va gu vbweta gu ganela nago." 48Jesu a di phindrula uye a nga mu tivisago, khuye: "Khu mani mayime wangu ni vandriyangu?" 49A di khusa libogo a nonedza vapizane, khuye: "Mayi wangu ni vandriyangu kha mu va woni ava. 50Kholu, watshavbo uye a girago guhaladza ga Babe wangu a guromo ndzadzini, khuye a gu ndriyangu ni mayi wangu."

will be added

X\