MATEWU 11

1Na vbedzide gu ninga sileletelo sesi ga vapizane vaye nya likhumi na vavili, Jesu a di khuga khu vbale, gasi gu gimbila a hevbudza madhoropani. 2Johane, khu pasoni, adipwa ndruma nya sigiro sa Kristo. A di rumela vapizane vaye, gasi guya mu wudzisa, khavo: 3"Khuwe wule a vbwetago guta, mwendro hi nga gu lindrela mumbe?" 4Jesu a di va hakha, khuye: "Indrani muya tivisa Johane iso mu nga si pwago ni gu si wona: 5sikhumu si ngu wona, sikhurubwa si ngu gimbila, va nya sokono va ngu agiswa, sivbwiri si ngu pwa, vafi va ngu wuga, Mahungu nya Yadi ma ngu hevbudzwa sisiwana. 6Kategide saye wule a si tshunganiswigo kheni." 7Na si hongode sirumwa sile, Jesu a di wudzisa gidzemo khu mahungu ya Johane, khuye: "Ginani mu ngaya gi wona giwulani? Tshava nya guhanahaniswe khu phuvbo? 8Gasi ginani mu ngaya gi wona? Muthu nya guambale sombo nya gumbure? Avo va ambalago sombo nya gumbure va gu dugela mu dzindrangani nya wufumu. 9Gasi ginani mu nga ya gi wona, na? Muphrofeti? Ina. Khidzo nyi mi embelago, guvbindra ni muphrofeti. 10Khuye oyu a thudwago khu Milowo, pwani: 'Nyi na thangisa mbeli gwago mwango wangu, gasi guya gu dongisela ndzila.' 11Khu lisine nyi ngu mi embelani, kheni: vbakari nya vathu vatshavbo va velegidwego khu nyamayi, mwalo a gu khongolo guvbindra Johane. Aholu muthu nya mahegisela mufumuni wa ndzadzini khongolo gu mu vbindra. 12Gukhugela matshiguni ya Johane Mubhapatisi kala muhuno, Mufumu wa ndzadzini wu ngu dwanedwa khu tshivba ni tshivba. Avo va gu ni tshivba vaya gu khu gu wu wandra. 13Kholu vaphrofeti vatshavbo ni Nayo wa Mosi va di hevbudza kala gu vboha Johane. 14Mwa gu dzinani gu khodwa khiso nyi mi embelago, dzitini nya gukhenu uye khuye Eliya a nga bani a gu vbweta guta. 15Uye a gu ni dzindzeve nya guyingise, a na pwe. 16"Aholu nyi na va fananisa ni mani vathu nya mela yayu? Va ngu fana ni sanana sile nya gu, na siromo mwandrani nya vathu, si ganedzisana, khiso: 17'Hi wombide sitoliyo, kha mwa hana! Hi embide dzindzimo nya wusiwane, kha mwa lila!' 18Dzude Johane Mubhapatisi, a si hodzigo gilo ni gu sela wadwa, mwari khenu: 'A na ni liphuvbo nya guvivbe!' 19Dzude Mwamana wa Muthu, a hodzago ni gu sela, mwari khenu: 'Nani limidzo, bewudzi, pari nya vakhuphisi ni sighohi!' Aholu guti ga Nungungulu gwa gu dzi yeyedza khu mithumo yaye." 20Khavbo avbo, a di phela gu hembulula madhoropa yale a nga girago umo siliwugiso saye nya singi, khu gumba vbindrugedza gwawe, khuye: 21"Libango lago, Khorozayine! Libango lago, Bhetisayida! Kholu nari pwani Tiro ni Sidhoniya va di wonide siliwugiso nya nga iso mu nga si wonago enu, na va dzi vbindrugedzile gale khu gu ambala dzisaku ni gu phorola nguma. 22Khu kharato, nyi ngu mi embelani, kheni: litshigu nya gulamudwe, gu na vbebugisedwa Tiro ni Sidhoniya guvbindra enu. 23Ahati uwe, Khafarnawume! Wa gu hingigedza khuwe u na khusedzwa kala ndzadzini? U dzi pembide! U na rinywa phalani nya nilo, kholu, nari pwani siliwugiso si nga girwago mahoni gwago si di giredwe tigoni ga Sodhoma, nolu litigo lolo na li nga romo. 24Ambari ulo nyi ngu mi embelani, kheni: litshigu nya gulamudwe, gu na vbevbugisedwa Sodhoma guvbindra uwe." 25Gikhati gyogyo, Jesu a di khusa lito, khuye: "Nyi ngu gu rungudza, Baba, Pfhumu nya ndzadzi ni mafu, kholu u sihede vanya guti ni vanya gugengela silo sesi, u si yeyedza ga va nya gusolega. 26Ina, Baba, kholu khidzo si nga gu nengedzisago khidzo mbeli gwago. 27Satshavbo nyi ningidwe khu Babe wangu. Mwalo a mu tigo Mwamana vbavbandze ga Babe ekha, gambe mwalo a mu tigo Babe vbavbandze ga Mwanaye ekha ni wule Mwamana a dzinago gu mu tivisa. 28Deluni gwangu, enu mwatshavbo mu garadego ni gu lemedwa; eni nyi na mu hefemudza. 29Rwalani pingwi wangu, mu hevbula kheni nyi gu ni monyo nya gurule nuwo nya du dzi sodzise, gasi mu mane gutangala nya myonyo yanu. 30Kholu sileletelo sangu kha si garadzi, ni pingwi wangu wu vbevbugide."

will be added

X\