MATEWU 10

1Jesu a di rana vapizane, nya likhumi na vavili a gu va ninga tshivba nya gututumise maphuvbo nya guvivbe ni gu hawulugisa madwali ni mafumbu yatshavbo nya dzingumbe. 2Malina yawe khaya: Nya guphele khu Simoni, a ranwago pwani khu Pedro, ni ndriyaye Andreya; Jakobe ni ndriyaye Johane, sanana sa Zebhedhewu; 3Filipi ni Bhartolomewu; Tomasi ni Matewu, mukhuphisi; Jakobe, gyanana gya Alifewu, ni Tadhewu; 4Simoni Mukananewu, ni Judha Sikarioti, a gu uye a nga mu ningelago. 5Jesu a di rumela vatshavbo nya likhumi na vavili, whane nya gu na va ningide sileletelo sesi. "Mu nga gimbilelini dzindrangani nya mahedheni, mu nga belini dhoropani nya Vasamariya. 6Phelani khu gu yela dzinvuta dzi dzimedego dza nyumbani ga Israeli. 7Gimbilani na mu guhuwelela, khenu: 'Wufumu wa ndzadzini womo vbafuvbi.' 8Hawulugisani vadwali, wusani va nya gufa; hawulugisani va nya sokono ni gu tutumisa maphuvbo nya guvivbe. Mu ningidwe mahala; ningelani nenu mahala. 9Mu nga pharini dzitsapawu nya ndralama, mwendro nya parata, mwendro nya sugu dziborisani gwanu; 10mu nga pharini mirava nya dzimbuva, mwendro dzingandzu dzimbili, silato ni ndronga; kholu githumi gi na ni fanelo nya guhodziswe. 11Ni levbi lidhoropa mwendro talala mu na gu belago, vbwetani guti mwendro womo muthu nya gutumbege. Khalani ndrangani gwaye kala mu gu vbindra. 12Ndrangani mu na gu belago, va loseni kharati: 'Gurula gu na manege ndrangani mamu.' 13Ndranga yoyo ya gu bani yiri ni fanelo, gurula gwanu gu na khale avbo; aholu ya gu bani yiri mwalo fanelo, gu na bwelele gwanu. 14Gasi avbo mu si yingedwigo, mwendro gumba hakhwa mahungo yanu, mwa gu duga khu ndrangani momo, mwendro dhoropani momo, phuphuthani kudzudzwane migondroni gwanu. 15Khu lisine nyi ngu mi embelani, kheni litshigu nya lamulo, lidhoropa lolo li na dayiswa guvbindra Sodhoma ni Ghomora. 16"Nya gu mu rumelani kha nga dzinvuta vbakari nya masolwa; khu kharato, gengelani kha nga dzinyoga; mu rula kha nga matuva. 17Gwadigwadi ni vathu! Va na mi yisani vbakari nya madhota, va mi kwamula mu dzinyumbani gwawe nya nombelo; 18mu na yiswa mbeli nya vafumeli ni dzipfhumwana khu kota yangu, mufela guya fakaza mahoni gwawe ni mahoni nya mahedheni. 19Aholu, mwa gu ningedwani, mu nga dzi garadzi khiso mu na gu ya ganelago ni maganelelo ya kone; gikhati gyogyo mu na embedwa igyo mu na ganelago. 20Kholu khandrenu mu na ganelago, Liphuvbo la Babe wanu khilo li na mi ganelelago. 21Ndruye a na songisa ndriyaye; babe a songisa mwanaye; sanana si na wugela vavelegi si va songisa. 22Gasi enu mu na zondrwa khu vatshavbo khu kota nya lina langu. Aholu uye a tsaramago kala mahegiso a na vbanyiswa. 23Mwa gu tutumiswa dhoropani nya gukari, thavelani ga limbe. Khu lisine nyi ngu mi embelani, kheni: kha mu na vbedza gu dzuwulugela madhoropa ya Israeli na si gu vbohi Mwamana wa Muthu. 24"Mupizane kha vbindri muhevbudzi waye, ni githumi kha gi vbindri mune yaye. 25Gu enede ga mupizane a gu dzi kodza gufana ni muhevbudzi waye, ni githumi gu godza mune waye. Ambari nya gukhuwe khu mune ndranga va nga mu vala khavo khuye Bhelzebhu, va na khavo ginani khu ngamo yaye? 26"Khu kharato, mu nga thavi gilo, kholu gi mwalo gi nga sihwa gi na gumba tugudwa; kha nga gambe, mwalo sihalo a na gumba tidwa. 27Iso nyi mi embelago mu gidemani, si tiviseni safani nya mihani; niso muyago khu gu lembedwa, si pwadzeni khu vbatshani nya dzinyumba. 28Mu nga thavi avo va songago givili, na va si dzi kodzi gu songa hefemulo. Thavani, uye a dzi kodzago gu rinya givili ni hefemulo phalani nya nilo. 29Ina kha si ngu rengiswa sinyoni sivili khu kinyeta mweyo basi, gani? Ambari ulo gimwalo ni gimwegyo gi fago nyamba dzumedziswa khu Babe wanu! 30Ahati enu, nya gukhenu ni ndzudzu wa hungoni gwanu wu valedwe watshavbo! 31Khu kharato, mu nga thavi mu ngu phasa ngudzu guvbindra sinyoni nya singi. 32"Watshavbo uye a nyi dzumelago vbakari nya vathu, nyi na mu dzumela neni mahoni ga Babe wangu a guromo ndzadzini. 33Gasi uye a nyi dangago vbakari nya vathu, nyi na mu danga neni mahoni ga Babe wangu a guromo ndzadzini. 34"Mu nga pimisi nya gukhenu nyi di resa gurula mafuni; kha nya resa gurula, aholu nyimbi. 35Kholu nyi dzude nyita hambanisa mwamana ni babe waye, nyamahegyane ni mayi waye, ngadzamwane ni mayinasale waye. 36Khu kharato, valala nya muthu va na dugela mu valongoni gwaye. 37"Uye a golago babe mwendro mayi guvbindra idzo a nyi golago khidzo, kha nyi faneli. Ni uye a golago mwanaye nya gikhwathana mwendro nya gyagadzyana guvbindra idzo a nyi golago khidzo, kha nyi faneli. 38Uye a si rwaligo gihambano gyaye a nyi landra, kha nyi faneli. 39Uye a zamago gu vegedza womi waye, a na dzimeledwa khuwo, ni wule a na gu dzimedzago womi waye khu kota yangu a na wu mana. 40"Uye a mi hakhago, kheni a nyi hakhago; gasi uye a nyi hakhago a ngu hakha wule a nga nyi rumelago. 41Uye a hakhago muphrofeti kha nga muphrofeti, a na hakha tshatshazelo nya nga wa muphrofeti; uye a hakhago muthu nya ndruda kha nga muthu nya ndruda, a na hakha tshatshazelo nya nga wa muthu nya ndruda. 42Uye a ningago khokho nya mati nya gudzidzile ga moyo nya vapizane vangu nya gusolege, khu gu mu ti nya gukhuye mupizane wangu, khu lisine nyi ngu mi embelani, kha na dzimeledwa khu tshatshazelo."

will be added

X\