MATEWU 1

1Longoloko nya lihundzu la Jesu Kristo, gyanana gya Dhavide, gyanana gya Abrahama. 2Abrahama a di velega Isaki; Isaki a velega Jakobe; Jakobe a velega Judha ni vandriyaye; 3Judha a velega, ni Tamari, Faresi ni Zara; Faresi a velega Esrome; Esrome a velega Aroni; 4Aroni a velega Aminadhabhi; Aminadhabhi a velega Nasoni; Nasoni a velega Salmoni; 5Salmoni a velega, ni Rahabhe, Bhowazi, Bhowazi a velega, ni Rute, Obhedhe; Obhedhe a velega Jese; 6Jese a velega mufumeli Dhavide. Dhavide a velega, ni ngadza Uriya, Salomoni; 7Salomoni a velega Rohobhoamu, Rohobhoamu a velega Abhiya; Abhiya a velega Asa; 8Asa a velega Josafati; Josafati a velega Jorami; Jorami a velega Oziya; 9Oziya a velega Jotamu; Jotamu a velega Akhazi; Akhazi a velega Hezekhiya; 10Hezekhiya a velega Manase; Manase a velega Amoni; Amoni a velega Josiya; 11Josiya a velega Jekoniya ni vandriyaye, gikhati va nga vbagedwago va gu yiswa Bhabhiloniya. 12Na va wide khu Bhabhiloniya, Jekoniya a di velega Salatiyeli; Salatiyeli a velega Zorobhabheli; 13Zorobhabheli a velega Abhiyude; Abhiyude a velega Eliyakhime; Eliyakhime a velega Azore; 14Azore a velega Sadoke; Sadoke a velega Akhime; Akhime a velega Eliyude; 15Eliyude a velega Eliyazare; Eliyazare a velega Mathane; Mathane a velega Jakobe; 16Jakobe a velega Josefe, mwama wa Mariya, a gu uye a nga velega Jesu, a ranwago Kristo. 17Khu kharato, mimela yatshavbo, gukhugela Abrahama kala Dhavide, likhumi na mina. Gukhugela Dhavide kala guvbagedwa gwawe va gu yiswa Bhabhiloniya, likhumi na mina. Gukhugela guvbagedwa gwawe kala Kristo, likhumi na mina. 18Guvelegwa ga Jesu Kristo gu di girega kharati: Mariya mayi waye, a nga bani a tumbisidwe khu Josefe, a di khura mimba khu tshivba nya Liphuvbo nya gu Age, nasi tshangani ni mwama waye, Josefe. 19Josefe, a nga bani ari muthu nya ndruda, kha nga vbweta gu mu thela dzitshoni; a di vbweta gu mu hula khu gisihaledza. 20Na nga gu vinga mano yakone, a di tumbulugedwa khu ngilozi ya Pfhumu khu ndroroni, yita khiyo: "Josefe, mwamana wa Dhavide, u nga kanakani gu hakha Mariya, ngadzago, kholu mimba a gu nayo khya Liphuvbo nya gu Age. 21Uye a na velega gyanana nya gikhwathana u na gi thangisago lina la Jesu, kholu gi na vbanyisa vathu mu sighohoni sawe." 22Satshavbo sesi si giregide, gasi gu landrisa iso si nga ganedwago khu Pfhumu, si gu tiviswa khu muphrofeti, khuye: 23"Dzitini nya gukhenu gyagadzyana nya mbiri gi na khura mimba, gi velega gyanana nya gikhwathana gi na ranwago pwani khigyo Emanuweli" (gu tshamusago, pwani: "Nungungulu womo vbakari gwathu.") 24Na khendzugide khu ligovbeni, a di gira kha nga idzo a nga embedwago khidzo khu ngilozi ya Pfhumu a gu hakha mwangadzi waye. 25Nyamba hengela naye lidawu, Mariya a di velega gyanana gyaye nya gikhwathana, igyo Josefe a nga gi thangisago lina la Jesu.

will be added

X\