MARKO 9

1Jesu a di va embela gambe khuye: "Khu lisine nyi ngu mi embela gambe gu kheni, vbakari gwanu vomo va na gu mba linga gufa kala va ta manwa khu Mufumu ni tshivba ya Nungungulu." 2Hwane nya livbandre na limwedo matshigu, Jesu a di dzega Pedro, ni Jakobe ni Johane a gu gwela navo gigomoni. Na vbohide, a di vbindruga mahoni gwawe. 3Dzingandzu Dzaye dzi di ngangamela, dzi gu aga, nya gu mwalo muhandzi mafuni a dzi kodzago gu dzi agisa kharato. 4Khavbo avbo, vapizane va vararu va di wona Eliya ni Mosi na va gu bhula ni Jesu. 5Pedro a di embela Jesu Khuye: "Muhevbudzi, gwadi gu hi khale avba! Hi na vbaha mitshatsha miraru, moyo wago, mumbe wa Mosi ni wa Eliya." 6Pedro a di si giti ni egi a nga bani a gu ganela, kholu vapizane va di tade khu hwanga. 7Khavbo avbo, li di tshiga lipfhi li nga ta va fenengedza. Khu vbakari nya lipfhi li di pwala lito na li gu khilo: "Oyu khu Mwamana wangu nya gigodwa, mu yingiseni." 8Na va hapfhude, va di khedza maphuvbo yatshavbo va si woni muthu vbavbandze ga Jesu basi. 9Gikhati va nga bani va gu tshiga khu gigomoni, Jesu a di va laya khuye: "Mu nga embeli muthu esi mu nga si wonago kala Mwamana wa Muthu a gu wuga khu gufani." 10Khu kharato, va di degula naso nyamba embela muthu. Aholu va di wudzisana khu gyawe khavo: "Sa gu tshamusela ginani guwuga khu gufani?" 11Khavbo avbo, va di wudzisa Jesu khavo: "Khu ginani vahevbudzi nya Nayo va gu khavo a na phela khu Eliya ata?" 12Jesu a di va phindrula khuye: "Khidzo. Eliya a na phela khuye ata gasi guta lulamisa silo satshavbo. Milowo gasi yari khiyo ginani khu Mwamana wa Muthu, khandri yari khiyo guvbwetega a saniseka ngudzu ni gu nyenywa? 13Dzitini nya gukhenu Eliya dzude. Gikhati a ngatago, va dita mu gira edzi va nga dzinago, kha nga edzi gu lovidwego khidzo." 14Na va bwelede avbo va nga bani varomo vambe vapizane, va di wona vathu nya vangi gumogo ni vahevbudzi nya Nayo na va randrede vapizane va gu ganedzisana navo. 15Na va wonide Jesu, vatshavbo va di liwuga va tutuma va ya mu losa. 16Khavbo avbo, a di va wudzisa khuye: "Ginani mu ganedzisanago navo?" 17Moyo wawe a di khuye: "Muhevbudzi, nyi ngu gu resela mwamana wangu a saniswago khu liphuvbo nya guvivbe, li mu giridego gidudu. 18Ni evbini avba li gunago, la gu mu dugela, li mu thesa vbavbatshi, a pupuma liguvi khu kanani ni gu khukhurusa magwaha, a banga sivbango. Nyi di lomba vapizane vago gu li tutumisa, aholu kha va li kodza." 19Jesu a di khuye: "Vathu nyamba khodwa! Nyi na khala nanu kala lini? Nyi na mi timisela kala lini? Mu reseni eno." 20Va di mu yisa gwaye. Liphuvbo nya guvivbe, na li wonile Jesu li di dzudza gikhwathana khu tshivba ni tshivba, li gi thesa vbavbatshi gi gu kuya ni gu pupuma liguvi khu kanani. 21Jesu a di wudzisa babe wakone khuye: "Phedwe vbanyalini?" Babe wule a di mu hakha khuye: "Gu khugela wanana waye. 22Dzinyondro dzingi la gu mu thesa matini ni niloni li dwanela gu mu songa. Khu kharato, wa gu dzina gu hi phasa, hi girele wuhindzi." 23Jesu a di khuye: "Wa gu dzina! Satshavbo si ngu kodzega ga wule a khodwago." 24Khavbo avbo, babe nya gikhwathana gile a di khusedza lito a ganela khuye: "Nyi ngu khodwa! Ambari ulo nyi phase, u engedzela gukhodwa gwangu." 25Jesu, na wonile gu khuye va ngu vboha vathu nya vangi a di kawuka liphuvbo nya guvivbe khuye: "Uwe liphuvbo nya givbwiri ni wududu, nyi ngu gu ruma: duga ga gikhwathana gegi, u nga wuyi gambe uta bela." 26Liphuvbo li di womba huwa, li gi dzudza khu tshivba ni tshivba, li duga. Gikhwathana gi di dzima. Nya vangi va di pimisa gu khavo gi fude. 27Aholu, Jesu a di gi phara khu libogo a gi wusa. Gikhwathana gi di khuga gi ema. 28Khavbo avbo, Jesu, na bede nyumbani, vapizane vaye va di mu wudzisa vari venga khavo: "Khu ginani ethu hi nga tandrega gu li tutumisa?" 29A di va hakha, khuye: "Maphuvbo nya lifumbo leli ma gu kodzwa khu nombelo ni gu hala." 30Na va khugile khu bale va di tsemakanya litigo la Galileya. Jesu a di si vbweti gu tidwa khu vathu, 31kholu a di gu hevbudza vapizane vaye mahungu nya gukhuye: "Mwamana wa Muthu a na ningedwa mandzani nya vathu, va gu mu songa; aholu, na va mu songide, a na wuga khu litshigu nya wuraru." 32Avo kha va nga pima tshamuselo aholu va di khala hwanga gu mu wudzisa. 33Na va vbohide dhoropani ga Khafarnawume, Jesu a di bela navo nyumbani a wudzisa khuye: "Ginani mu nga bani mu gu ganedzisana khigyo ndzilani?" 34Avo va di degula kholu va di gu ganedzisana khu gu vbweta guti khu mani a gu khongolo vbakari gwawe. 35Khavbo avbo, Jesu a di khala vbavbatshi a rana vale nya likhumi na vavili, a gu va embela khuye: "Oyu a vbwetago gu khala nya guhegule, a na khala uye mahegisela ni githumi gya vatshavbo." 36A di dzega gyanana a gi vega vbakari gwawe, a gi wugarela a va embela khuye: 37"Oyu a hakhago gyanana nya nga egi khu lina langu, kheni a nyi hakhago. Aholu, oyu a nyi hakhago, kha hakhi eni basi, a gu hakha ni wule a nga nyi rumelago." 38Johane a di khuye: "Muhevbudzi, womo hi nga mu mana na gu tutumisa maphuvbo nya guvivbe khu lina lago, hi mu himbedzela, kholu kha lumbi tsawa wathu." 39Jesu a di khuye: "Mu nga mu himbedzeli, kholu mwalo a dzi kodzago gu gira siliwugiso khu lina langu a wuya khavbo a nyi wugela. 40Kholu oyu a si hi wugeligo khwana gyathu. 41Khu lisine nyi ngu mi embela gu kheni oyu a na mi ningago gani khokho nya mati, khu lina la Kristo, gima kha na nga hamuga tshatshazelo waye. 42Libango ga oyu a khunguvanyisago sanana nya nga esi, adiri tshukwana gu hungeledwa thamoni gwaye giwindri nya gikhongolo nya libwe, nya nga esi si tshindrwago khu mbongola, a rinywa nondrwani. 43Mandza yago ma gu khala gikhunguvanyiso ma pile, kholu i tshukwana gubela guvbanyani nya gupindruge ni gimbobo, guvbindra gubela ni mandza ya mavili phalani nya nilo nyamba tshimega.[ 44Avbo siwungu si si figo, nilo wakone wu si tshimegigo.] 45Ngondro wago wa gu khala gikhunguvanyiso, wu pile. I tshukwana gubela guvbanyani nya gupindruge nuri gighwiri guvbindra gu rinywa phalani nya nilo ni migondro yago ya mivili. [ 46Avbo siwungu si sifigo, nilo wakone wu si tshimegigo.] 47Ni liso lago la gu khala gikhunguvanyiso gwago li duse vbavbandze, i tshukwana gubela mufumuni wa Nungungulu uri ni liso limwedo guvbindra gu rinywa ni maho ya mavili phalani nya nilo 48avbo siwungu si si figo, nilo wakone wu si tshimegigo. 49"Muthu watshavbo a na agiswa khu nilo, kha nga mhamba yi agiswago khu munyu. 50Munyu khwadi, aholu wa gu phusa wu na lungwa khu ginani? Khalani nenu munyu nya wundruye vbakari nya vathu mu vbanya khu gurula khu gyanu."

will be added

X\