MARKO 8

1Khu matshigu yale, gidzemo gi di ta mu randrela gambe. Kha nga ulo gu nga bani gu ri mwalo gilo nya guhodze, Jesu a di rana vapizane vaye a va embela khuye: 2"Nyi ngupwa gisiro khu vathu vava kholu va na ni matshigu mararu na nyiri navo, nyamba hodza gilo. 3Nya gu va diga va hongola gaya va na gimbila va gu rereka ndzilani, kholu vambe va guta khu hwindzo." 4Vapizane va di mu hakha khavo: "Hi na si mana hayi sibaba nya gu va ninge va hodza giwulani momu, gani?" 5Jesu a di va wudzisa khuye: "Sibaba singani mu gu naso?" Va di khavo: "Livbandre na sivili." 6A di va ruma gu khala vbavbatshi, a gu dzega sibaba sile satshavbo a si kategisa, a si kabanisa, a ninga vapizane vaye va kabanisela gidzemo. 7Va diri gambe ni dzindzandzyana, Jesu a di dzi kategisa a va ruma va kabanisela gambe. 8Vatshavbo va di hodza va gu khura, bwelo khavbo va gu tadza livbandre na sivili situndru khu sipandre si nga tshalago. 9Ava va nga hodzago vadiri gipimo nya magumi mana mazana. Khavbo avbo, Jesu a di va diga va gu hongola gaya. 10Gasi Jesu a di bela ngalavani ni vapizane vaye a gu hongola tigoni ga Dalmanuta. 11Khavbo avbo, va di vboha Vafarisi va ta ganedzisana naye, na va gu vbweta gu mu linga. Va di vbweta gu khavo a gire giliwugiso nya gukari, gasi gu wona mwendro tshivba yaye ya guta kamwe khu ga Nungungulu. 12Jesu a di tala khu gugaradzega monyoni, a ganela khuye: "Khu ginani vathu vava va lombago giliwugiso? Khu lisine nyi ngu ganela gu kheni, vathu nya melego yoyu, gimwalo ne giliwugiso gimwegyo va na ningwago." 13A di va diga a gu bela gambe ngalavani a gu hongola tshatugo. 14Vapizane va di divade gu dzega sibaba. Gibaba gimwegyo basi va nga bani vari nagyo. 15Khavbo avbo, Jesu a di va embela, khuye: "Gwadigwadi ni mela nya Vafarisi nuwo wa Herodhi!" 16Va di pimisa gu khavo mwendro a gu thula ulo va nga divalago sibaba. 17Aholu, Jesu na tugude mapimo yawe, a di khuye: "Khu ginani mu gu khenu mu mwalo sibaba. Mu si gu si pimi iso nyi si thulago? Mapimo yanu ma nga lemede kharati? 18Khu ginani mu si woni na muri ni maho, mu sipwi na muri ni dzindzeve? 19Ina kha mu nga gu dundruga gambe situndru mu nga tadzago khu sipandre si nga tshala, litshigu lile nyi nga kabanisago livbandre sibaba, nyi hodzisa livbandre magumi mazana vathu?" Va di hakha khavo: "Likhumi na sivili." 20Jesu a engedza gambe khuye: "Ahati iso mu nga tadzago litshigu lile nyi nga kabanisago livbandre na sivili sibaba nyi hodzisa magumi mana mazana nya vathu?" Va di khavo: "Livbandre na sivili." 21Khavbo avbo, a di va wudzisa, khuye: "Ambari ulo mapimo yanu ma si gu tulegi?" 22Jesu ni vapizane va di vboha Bhetisayida. Va di mu resela mwama nya gikhumu, va gu mu lomba gu mu hawulugisa 23A di mu phara khu libogo, a gu duga naye vbavbandze nya talala. A di mu todza dzindrura mahoni a mu handzega mandza, a mu wudzisa, khuye: "U ngu wona gilogyo, gani?" 24Mwama nya gikhumu, na tude maho, a di khuye: "Nya gu wona vathu kha nga misimbo yi gimbilago." 25A di mu khuha nya luphye maho khu mandza; mwama a gu wona gwadi. A gu hawulugisa guralo. 26Khavbo avbo, Jesu a di mu ruma gu hongola gaya gwaye. A di mu laya, khuye: "U nga vbindri gambe khu talalani mule." 27Jesu a di duga ni vapizane vaye, a gu hongola tigoni ga Sezareya gwa Filipi. Vbakari nya ndzila a di wudzisa vapizane vaye, khuye: "Vathu vari khavo kheni mani?" 28Va di mu hakha, khavo: "Vomo va gu khavo khuwe Johane Mubhapatisi; vambe vari khavo khuwe Eliya; gasi vambe vari khavo u moyo nya vaprofeti." 29A di va wudzisa, khuye: "Ahati enu mwari khenu kheni mani?" Pedro a di hakha, khuye: "Uwe khuwe Kristo." 30Khavbo avbo, a di va laya gu khuye va si embeli muthu khavo khuye Kristo. 31Khavbo avbo, a di phela gu va hevbudza khuye: "Mwamana wa Muthu na ni fanelo nya gusaniseke ngudzu, a gu nyenywa khu madhota, ni vakhongolo nya vaphasi nya mhamba, ni vahevbudzi nya Nayo. A na songwa. Aholu, khu litshigu nya wuraru a na wuga." 32A di va embela esi nyamba siha gilo. Pedro, a di mu rana khu phuvbo a ya mu kawuka. 33Aholu, Jesu a di thendregedza a khedza vapizane, a gu kawuka Pedro khuye: "Leya mbeli gwangu, Sathane, kholu khu theli kota khu silo sa Nungungulu, wa gu thela kota khu silo sa vathu basi." 34Na ranide gidzemo gumogo ni vapizane vaye a di va embela khuye: "Oyu a vbwetago gu nyi landrela a na dzi dige wurumba waye, a gu rwala gihambano gyaye a nyi landre. 35Kholu, oyu a dwanelago gu vbanyisa womi waye a na wu luza; gasi oyu a luzago womi waye khu kotani yangu ni Ivhangeli, a na wu vbanyisa. 36Giphaso muni a na gi manago wule a fumelago litigo rumba a gu hegisa khu gu dzimela ni hungo waye? 37Gimwalo gilo muthu a dzi kodzago gu livba khigyo gasi a mana nya luphye guvbanya gwaye nya lisine. 38Oyu a khalago dzitshoni khu eni ni Ivhangeli yangu vbakari nya melego yoyu nya vathu nya sibhayi ni sighohi, Mwamana wa Muthu a na mu khalela nuye dzitshoni litshigu a na wuyago na tade khu wudhumo wa Babe waye, vbakari nya sirumwa nya guage sa Nungungulu."

will be added

X\