MARKO 7

1Vafarisi ni vahevbudzi nya Nayo, va ngatago khu Jerusalema, va di tombana naye. 2Na va wone gu khavo vapizane vaye va di hodza nyamba hamba mandza, 3Vafarisi, ni Vajudha vatshavbo, khu nayo wawe, kha va hodzi nyamba hamba mandza, khu gulandra giolovedzo nya mikhuwo ya vagale. 4Gikhati va wuyago khu wugwewoni, kha va hodzi nyamba phela khu gu dzi agisa, yomo yimbe milayo nya yingi ya gale va yi landrisago, kha nga: guhandza dzikhokho, dzikhali nya mati, sikalango ni simbe gambe. 5Vafarisi ni vahevbudzi nya Nayo va di mu wudzisa khavo: "Khu ginani vapizane vago va si landrisigo tumbunuko wa vagale, olu va hodzago nyamba hamba mandza?" 6Jesu a di va hakha khuye: "Khidzo muprofeti Isaya a nga ganelago na thula enu vapfhadzi nenu khuye: 'Ava vathu va gu nyi rungudza khu magana aholu myonyo yawe yomo hwindzo ni eni. 7Milombelo va nyi girelago khya malipha kholu, milayo va hevbudzago khya gu yi khugela.' 8Mwa gu diga milayo ya Nungungulu mu gu landrisa tumbunuko nya vathu." 9A di engedza gambe khuye: "Mu ngu kodza gwadi gu tshipisa milayo ya Nungungulu, gasi mufela gu landrisa tumbunuko wanu. 10Kholu, Mosi a di khuye: 'Rungudza babe wago ni mayi wago.' Bwelo khavbo khuye: 'Uye a hembululago babe, gani mayi waye, tsayiso waye khu gufa!' 11Gasi enu mwa gu hevbudza gu khenu: 'Muthu a gu embela babe ni mayi waye khuye: kha nyi kodzi gu gu phasa khu esi nyi gu naso kholu khya Korbani, gu tshamusago pwani si phasedwe ga Nungungulu;' 12enu kha mu mu dzumedzisi gu gira simbe silo nya guphase babe ni mayi waye. 13Khu kharato, mu ngu tshipisa Nayo wa Nungungulu khu kota nya mikhuwo ya vakokwe vanu mu hevbudzago. Mu ngu gira gambe simbe silo nya singi nya guvbindre esi." 14Na ganede esi a di rana nya luphye gidzemo a gi embela khuye: "Nyi yingiseni mwatshavbo gasi mu si mane gwadi esi nyi vbwetago gu mi embela! 15Muthu kha nyenyeziswi khu silo sa vbavbandze si belago ndrani gwaye, aholu a gu nyenyeziswa khu esi si dugago khu ndrani. [ 16Oyu a gu ni ndzeve nya guyingise a napwe.]" 17Na digile gidzemo a gu bela nyumbani, vapizane va di mu wudzisa tshamuselo nya gipimaniso gile. 18A di va hakha khuye: "Gasi enu nenu mu lemede mihungo? Ina kha mu dziti nya gukhenu egi gi belago ndrani nya muthu kha gi dzi kodzi gu mu nyenyezisa, 19kholu kha gi beli monyoni, gya gu bela girumbuni gi gu duga vbavbandze khu ndzila yaye, gani?" (Khu magana yaya a gu hevbudza gu khuye guhodza gwatshavbo gu agile gu ngu yela gu hodzwa.) 20A di engedza gambe khuye: "Igyo gi dugago khu ndrani nya muthu khigyo gi mu nyenyezisago. 21Kholu, khu monyoni nya muthu, khumo gu dugago mahingigedzo nya guvivbe, wubhayi, wuvafa, wughevenga, 22wuphuphulu, gumba khodwa, lidiwo, milembo, matshandza ni wupumbu. 23Guvivba gogu gwatshavbo gwa gu duga khu ndrani, khugo gu nyenyezisago muthu." 24Na khugide khu vbale, Jesu a di hongola tigoni ga Tiro ni Sidhoniya. Na bede ndrangani nya gukari, kha nga vbweta gu tidwa khu muthu, aholu kha sa kodzega. 25Nyamayi moyo, nyamahegyane waye a nga bani a gu saniswa khu liphuvbo nya guvivbe, na dzitide, a dita dzi thesa migondroni gwaye. 26Nyamayi adiri muhedheni, kholu adiri Musiro-fenisa, a di mu lomba khuye a tutumise liphuvbo nya guvivbe ga mwanaye. 27Uye a di khuye: "Nga ema kala si gu hodza sanana guphela, kholu khandri gwadi gu dzega guhodza nya sanana nyi ningela simbwana." 28Nyamayi a di khuye: "Khidzo u ganelago, Pfhumu, aholu dziti nya gukhuwe simbwana niso si ngu roledzela khu vbavbatshi nya meza dzitsheta dzi theswago khu sanana." 29Jesu a di mu embela khuye: "Khu kota nya isoso u ganedego, indra basi; liphuvbo nya guvivbe li dugide ga mwanago." 30A di hongola gaya aya mana mwanaye na lade vbadawutunu; liphuvbo nya guvivbe na li mu digide li gu hongola. 31Na khugide khu tigoni ga Tiro a di vbindra khu Sidhoniya, a gu hongola phwani ga Galileya a tsemakanya khu tigoni ga Dhekapoli. 32Va di mu resela muthu nya givbwiri nyamba ganela gwadi, va mu lomba gu mu handzega mandza. 33Na ndreyide naye mwandrani nya vathu, a di bedza dzinyala mu dzindzeveni gwaye, a hetsha dzindrura a mu todza khidzo lidimi. 34Khavbo avbo a di khusa maho, a hefemula khu tshivba, a mu embela khuye: "Efata" gutshamusago pwani, "Tulega." 35Dzindzeve dzaye dzi di tulega, lidimi li gu tshulega, a gu ganela gwadi nyamba khukhumela. 36Jesu a di va laya gu mba embela muthu esi si nga girega; aholu avo va di simama gu laledza ndruma yaye. 37Vatshavbo va di liwuga ngudzu va gu ganela khavo: "Satshavbo a ngu gira gwadi: a ngu tula dzindzeve sivbwiri, ni gu tulela gu ganela sidudu"

will be added

X\