MARKO 6

1Khavbo avbo, Jesu a di khuga khu vbale a gu hongola tigoni gwaye gumogo ni vapizane vaye. 2Na li vbohide litshigu nya Sabhado, adiya bela nyumbani nya nombelo a phela gu hevbudza; nya vangi, na va mu pwide, va di liwuga, va wudzisana khavo: "A gu siti ni mani satshavbo sesi? Guti gwatshavbo gogu a gu mane hayi? A ha siliwugiso si girwago khu mandza yaye, sa guta khu hayi? 3Ina khandruye oyu hi mu tigo kha nga muvati, mwamana wa Mariya, ndruye wa Jakobe ni Josefe ni Judha ni Simoni, gani? Vandriyaye nya vanyamayi, khandravo hi vbanyago navo tigoni momu, gani?" Va di mu diga nyamba mu thela kota. 4Jesu a di va embela khuye: "Muprofeti a gu nyenywa basi tigoni gwawe, ni valongoni ni ndrangani gwawe." 5Kha dzi kodza gu gira giliwugiso ni gimwegyo, a di hegela gu handzega mandza vadwali vadugwana va nga bani varomo bale, a va hawulugisa. 6A di liwuga khu gumba khodwa nya vathu vale. Ambari ulo a di gimbilagimbila mu dzindrangani dza vbafuvbi a gu hevbudza. 7Jesu a di rana vale nya likhumi na vavili, a va rumela khu thumo vavili vavili, a va ninga tshivba nya gututumise maphuvbo nya guvivbe. 8A di va laya va si phari gilo khu ndzila, vbavbandze nya ndronga basi; khuye va nga dzegi gibaba, mwendro gikhwama, mwendro dzitsapawu mabhandrini. 9A di va embela gambe khuye va ambale dzitangu, aholu va si phari dzingandzu dzimbili. 10A di va embela khuye: "Ni evbini mu na gu hongolago, ndrangani mu na gu belago, khalani avbo kala mu gu khuga khu dhoropani momo. 11Ni evbini va na gumba mi hakha ni gu mi yingisa, gikhati mu dugago, phuphuthani kudzudzwane vbavbatshi nya migondro yanu gasi gu khala wukustumunyu gwawe." 12Va di phara ndzila va gu gimbila va hevbudza khavo vathu vatshavbo gu vbwetega va vbindrugedza mavbanyelo. 13Va di tutumisa maphuvbo nya guvivbe, va gu hawulugisa vadwali nya vangi khu gu va todza mafura. 14Ni mufumeli Herodhi a dipwa ndruma ya Jesu. Kholu lina laye li di pwade ngudzu, gambe vambe va di gu khavo khu Johane Mubhapatisi a wugidego khu ga vafudego khavbo a manago tshivba nya gugire satshavbo sesi. 15Vambe va di khavo "Khuye muprofeti Eliya." Gasi vambe va di gu khavo: "Uye muprofeti kha nga moyo nya vaprofeti va gale." 16Herodhi, na pwide silo sesi, a di ganela khuye: "Johane nyi nga ruma gu a pidwa ngolo, khuye a wugidego khu ga vafudego." 17Kholu uye Herodhi, khuye a nga ruma gu mola Johane mubhapatisi a khothedwa pasoni, khu kota ya Herodhiya mwangadzi wa ndriyaye Filipi; a nga mu dzega. 18Kholu Johane a di gu mu kawuka khuye: "Khu yeli gu dzega mwangadzi wa ndriyago." 19Herodhiya a di gu venga Johane, a vbweta ndzila nya gu mu songe a yi hamuga. 20Kholu Herodhi adiri ni githawo ga Johane khu gu muti khuye muthu nya ndruda a agidego, a di mu vhikela. Uye, khu gupwa basi Johane na gu ganela a di hambanega mapimo, aholu, a di mu yingisa khu gunengela. 21Na li vbohide litshigu nya gunengele khu gu dundruga guvelegwa gwaye Herodhi, Herodhiya a di mana ndzila nya gusonge Johane, kholu Herodhi a di gira buzo a gu rana madhota, ni vathangeli nya dzinyimbi ni vakhongolo va Galileya. 22Nyamahegyane wa Herodhiya a di bela vbakari a gu hana, khu mahanelo ma nga tsakisago Herodhi ni vatshavbo va nga bani varomo vbabuzotunu. Khavbo avbo, mufumeli a di embela nyamahegyane khuye: "Nyi lombe egi u ginago nyi na gu ninga." 23A di sambanya gwaye, khuye: "Ni gevbi u na nyi lombago nyi na gu ninga, ambari nari gipandre nya mufumu wangu!" 24Nyamahegyane adiya wudzisa mayi waye khuye: "Ginani nyi na gu lombago?" Uye a di mu hakha khuye: "Indra lomba hungo wa Johane Mubhapatisi." 25A di bela khu gu vbiredza umo a nga bani aromo mufumeli Herodhi, a ya khuye: "Nya gu vbweta gu kheni u nyi ninge khu mbiyani, nugunugu olu, hungo wa Johane Mubhapatisi." 26Mufumeli Herodhi a di garadzega ngudzu; aholu kha dzi kodza gu mu bombela khu kota nya gisambanyo a nga girago na gu pwidwa khu vathu a nga va rambago. 27Mufumeli, khu gu vbiredza, a di ruma nyakasane moyo nya ghadhi yaye gu mu resela hungo wa Johane. Uye a diya pasoni a ya mu pila ngolo, 28a gu resa hungo waye khu mbiyani a ningela nyamahegyane, nyamahegyane aya ninga mayi waye. 29Na va dzi tide vapizane va Johane, va di ta dzega girumbi gyaye va ya dzinga thowoni. 30Na va wide, vapostoli va di ta tshangana ni Jesu va gu mu tshamusela iso va nga gimbila va gira ni esi va nga hevbudza. 31Jesu a di va embela khuye: "Hongoleni giwulani mu ya hefemula vbadugwana." A di gira kharato kholu va di si mani gikhati nya guhodze khu kota nya vathu va nga bani va gu bela ni gu duga khu gipitipiti. 32Va di hongola vonga khu ngalava wulangani nya giwula. 33Vathu nya vangi va di va wona na va gu hongola, va di guti avba va yago, khu kharato, va di duga khu mitalalani yatshavbo, va gimbila khu mbiri nya litsiva va gu va khinga, va gu va hegudza gu vboha. 34Gikhati Jesu a nga tshiga khu ngalavani, a di wona gidzemo nya gingi, a va pwela wuhindzi, kholu va di khala nga dzinvuta nyambana muhavisi. A di phela gu va hevbudza silo nya singi. 35Na li hwide lidambo, vapizane va di hidzimela ga Jesu va ya khavo: "Lidambo li hwide, na ri gu wulanga wowu giwula; 36va dige va hongole tigoni ni mitalalani vafela gu ya dzi rengela gilogyo nya gugodze." 37Jesu a di hakha khuye: "Va ningeni enu guhodza." Vapizane va di khavo: "Ina wa gu pimisa nya gukhuwe khu mazana mavili nya dzitsapawu hi nga dzi hodza gu renga sibaba nya guenedze vathu, gani?" 38Jesu a di va hakha khuye: "Sibaba singani mu gu naso? Indrani mu ya wona." Vapizane, na va wudziside va di hakha khavo: "Livbandre sibaba ni dzindzandzi dzimbili." 39Khavbo avbo, a di va ruma gu khala khu sikwata mwasini nya gunyuge. 40Va di khala vbavbatshi khu sikwata nya lizana vathu niso nya livbandre magumi. 41Na dzegide sibaba sile nya livbandre ni dzindzandzi dza dzimbili, a di khedzisa vbatshani ndzadzini, a kategisa, a pila sibaba a si ningela ga vapizane vaye gasi gu kabanisela vathu. A di kabanisela gambe vatshavbo dzindzandzi dza dzimbili. 42Va di hodza vatshavbo va khura. 43Na va rolede sipandre nya sibaba ni dzindzandzi si nga thegelago, va di tadza likhumi na sivili situndru. 44Ava va nga hodzago sibaba adiri livbandre magumi mazana vama. 45Khu hwane nya iso, Jesu a di ruma vapizane vaye gu bela ngalavani va thanga guya tshatugo ga Bhetisayida, uye na ngu gu vbanganana ni gidzemo. 46Na va vbanganide, a di gwela gigomoni aya lombelela. 47Na li hwide lidambo, ngalava na yiri vbakari nya mati, Jesu a di tshade enga siwoni. 48Na wonide nya gukhuye va garade khu gu dzuwa makasiya gasi gu pala phuvbo yi nga bani yi gu veta khu thonvutunu, a di va yela ni mambagugya na gu gimbila khu vbatshani nya mati, a gira gu khwatshi a gu va thangela. 49Na va mu wone na gu gimbila khu vbatshani nya mati, va di pimisa nya gukhavo githusa. Khu kharato, va di womba dzihuwa. 50Kholu va di mu wona vatshavbo va tedwa khu hwanga. Uye a di va embela khuye: "Tiyani, mu nga thavi! Kheni." 51Na bede ngalavani, phuvbo yi di degula. Avo va di liwuga ngudzu, 52kholu va di bani va si gu mani tshamuselo nya giliwugiso nya sibaba, kholu mapimo yawe ma di segegide. 53Na va tshatugide va di ya tshigela tigoni ga Genezareta, va rika ngalava siwoni. 54Na va dugile khu ngalavani, vathu va di dzegela gu muti Jesu. 55Va di gimbila tigoni mule gatshavbo, va gu resa vadwali khu mathatho, gasi gu va yisa avbo a nga bani aromo Jesu. 56Ni evbini a nga bani a gu bela, mitalalani, madhoropani ni dzindrangani, va di vega vadwali dzindzilani, gasi a va hawulugise, va mu lomba gu va dzumedzisa gu khuha tshoka nya ngandzu yaye. Ava va nga mu khuha, vatshavbo va di hawuluga.

will be added

X\