MARKO 5

1Jesu ni vapizane va di tshatugela tigoni ga Vagerazi Khisi-kheyi nya litsiva la Galileya. 2Me ni gu duga khu ngalavani, Jesu a di khingwa khu mwama moyo a nga bani a gu dugela marowoni. Mwama yoyu adiri ni maphuvbo nya guvivbe. 3A di vbanyela marowoni. Mwalo a nga bani a gu kodza gu mu mola, ambari maphili a di pandra. 4Dzinyondro dzingi a nga thedwago maphili mawundruni ni gu hungwa mawogo khu makhetshe, a di pandra maphili, a kavila makhetshe. Mwalo muthu a nga bani ari ni tshivba nya gu mu mole. 5Wutshigu ni mihani a di legalega marowoni ni mu sigomoni, na gu womba dzihuwa, ni gu dzi bayisela khu siwindri. 6Na wonile Jesu khu hwindzo a di mu khinga khu mazambo a ya khidzima migondroni gwaye, 7a khusedza lito a ganela khu tshivba khuye: "Ginani nyi nga gu ghohela, uwe Jesu Mwamana wa Nungungulu a guromo ndzadzini? Nyi ngu gu lomba khu lina la Nungungulu gu kheni u nga nyi sanisi!" 8A di ganela kharato kholu Jesu a nga khuye: "Diga muthu yoyo uwe liphuvbo nya guvivbe!" 9Khavbo avbo, Jesu a di mu wudzisa khuye: "Gasi khuwe mani lina lago?" Uye a di mu hakha khuye: "Kheni lidhuma, kholu hi vangi." 10A di mu lomba wuhindzi a si tutumisi maphuvbo yale tigoni mule. 11Vbafuvbi vbale dzi di romo dzikhumba nya dzingi na dzi gu haviswa gigomoni. 12Maphuvbo yale ma di lomba ga Jesu khayo: "Hi dzumedzise gu ya bela dzikhumbani mule." 13Uye a di dzumela. Khavbo avbo, maphuvbo nya guvivbe ma di duga ga muthu wule, ma gu ya bela dzikhumbani dzi nga bani dzi gu ningana tengo nya magumi mavili mazana. Dzikhumba dzi di tutuma dzi ya bela matini dzi gu mbemba dzatshavbo. 14Vahavisi va di thava va ya tivisa mahungu yaya dhoropani ni mu dzindrangani. Vathu nya vangi va di ya wona iso si nga dugelelago. 15Na va vbohide avba a nga bani aromo Jesu, va di wona muthu wule a nga bani ari ni maphuvbo nya guvivbe na khade, na ambade dzingandzu dzaye, nari ni mapimo yaye yatshavbo, va di khala hwanga. 16Avo va nga si wonago va di fakaza satshavbo si nga dugelelago ga muthu wule a nga bani ari ni maphuvbo nya guvivbe, niso si nga dugelelago dzikhumba. 17Khavbo avbo, va di lomba Jesu gu a khuge tigoni gwawe. 18Gikhati Jesu a nga bela ngalavani muthu wule a nga duswago maphuvbo nya guvivbe a di mu lomba gu hongola Naye. 19Gani olu, Jesu kha mu dzumela. A di mu embela khuye: "Indra gaya gwago, u ya embela valongo vago vatshavbo iso Pfhumu a gu giredego ni wuhindzi u wu manego." 20Na hongode, a di gimbila a ganela dzindrangani gwatshavbo dza Dhekapoli iso a nga giredwago khu Jesu. Vatshavbo va di liwuga. 21Gikhati Jesu a nga wuyago khu tshatugo a di randredwa khu vathu nya vangi; a gu khala navo funguni. 22A di vboha moyo nya khongolo nya nyumba nya nombelo, lina laye pwani khu Jayiro. Na wonile Jesu; adiya khidzima migondroni gwaye. 23A di mu lomba wuhindzi nya wukhongolo khuye: "Nyamahegyane wangu a ngufa, delu uta mu handzega mandza yago gasi a vbanye." 24Jesu a di hongola naye, a landrwa khu gidzemo nya gingi gi nga bani gi mu gundra maphuvbo yatshavbo. 25Vbakari gwawe a di romo nyamayi moyo a nga bani a gu dwala khu gu dugelela novba gipimo nya likhumi na mivili myaga. 26A di gimbide mu dzin'yangani nya dzingi, umo a nga gimbila a phalalegisela thomba yaye yatshavbo, aholu gima kha sa mu phasa gilo, madwali ma diya na ma gu engedzelana. 27Nyamayi yoyu a di pwide gu ganedwa khu mahungu ya Jesu. A di hidzimela khu hwane gwaye a gunyula vathuni a ya mu khuha guambala gwaye. 28Kholu a di gu pimisa kharati, khuye: "Nya nga khuha guambala gwaye nyi na hawuluga." 29Khu lisine, gikhati gile novba wu di hegisa gu duga, a gu dzipwa milini gwaye nya gukhuye hawulugide madwali yaye. 30Khavbo avbo, Jesu, a na dzipwide gu khuye tshivba yaye yi vbungugide a di thendregedza a wudzisa, khuye: "Khu mani a nga khuha guambala gwangu?" 31Khavbo avbo, vapizane vaye va di khavo: "U ngu wona nya gukhuwe vathu vangi va gu gundrago, ni olu u wudzisago gu khuwe khu mani a nga nyi khuha?" 32Aholu Jesu a di simama gu khedza maphuvbo yatshavbo gasi gu wona khu mani a nga mu khuha. 33Nyamayi wule, khu hwanga ni gu ndrendremela khu guti esi si nga mu dugelelago, adiya khidzima migondroni gwaye a mu embela lisine latshavbo. 34Jesu a di mu embela khuye: "Mwanangu, gukhodwa gwago gu gu vbanyiside. Indra khu gurula, madwali yago ma hawulugide." 35Na nga gu ganela wu dita mwango khu ndrangani ga muthangeli nya nyumba nya nombelo guta mu tivisa khavo: "Nyamahegyane wago fude. Khu ginani u nga gu garadzago Muhevbudzi?" 36Aholu, Jesu kha nga thela kota khu mwango wule. A di embela muthangeli nya nyumba nya nombelo khuye: "U nga thavi gilo, khodwa basi." 37Kha nga dzumela gu landrwa khu muthu, vbavbandze ga Pedro ni Jakobe ni ndriyaye Johane. 38Na vbohide ndrangani ga muthangeli nya nyumba nya nombelo, adiya mana ligwaha nya vathu na va gu womba dzihuwa. 39Na bede nyumbani a di khuye "Khu ginani mu wombago dzihuwa ni gu lila kharati? Nyamahegyane khafa, a di lala." 40Aholu va di mu hega. Uye a di ruma gu duga vatshavbo, gu tshala basi vavelegi, ni vale a ngata navo, a bela navo umo a nga bani aromo nyamahegyane. 41A di mu phara khu libogo a mu embela khuye: "Talitha, Kumi" gu tshamusago pwani: "Nyamahegyane, nyi ngu gu ruma, wuga." 42Nyamahegyane a di dzegela gu khuga a gimbila kholu adiri ni likhumi na mivili myaga. Gidzemo gyatshavbo gi di liwuga ngudzu. 43Aholu Jesu a di va laya va si embeli muthu, a va ruma gu ninga guhodza nyamahegyane wule.

will be added

X\