MARKO 4

1Jesu na gu hevbudza nya luphye siwoni a di randredwa khu gidzemo nya gingi. Khu kharato, a di bela ngalavani yi nga bani yiri matini, gasi gidzemo gi di khala siwoni. 2A di va hevbudza silo nya singi ngudzu khu sipimaniso, a gu va embela khuye: 3"Nga yingisani! Muyali nya gukari a di hongola a ya yala mbewu yaye. 4Na gu yala, yimbe yi di thegela bambe nya ndzila, si guta sinyoni si ta rothela. 5Yimbe yi di thegela mu siwindrini, umo ma nga bani mari mwalo mafu nya mangi; mbewu yi di vbiredza gu buga, kholu mafu yakone kha ma nga eta ngudzu. 6Aholu, na li vbiside lihani, yi di vbya yi banga, khu gumbana mikhamba. 7Yimbe yi di thegela mibani; miba yi di dandra yi gu midza mbewu yeyi. Khu kharato kha ya thela mihandro. 8Gasi mbewu yi nga thegela mu wulimeni nya wadi yi di dandra nya dzadi, yi thela mihandro nya yadi dzimbe dzimbewu dzi di thela magumi mararu mihandro, dzimbe, livbandre na limwedo magumi, dzimbe lizana." 9Khavbo avbo a di khuye: "Uye a gu ni dzindzeve nya guyingise a napwe." 10Na va tshade venga, ava va nga bani va mu randrede gumogo ni vale nya likhumi na vavili, va di wudzisa Jesu tshamuselo nya gipimaniso gegi. 11A di va hakha khuye: "Ga enu, Nungungulu a ngu tivisa misihalo nya Mufumu waye, gasi vale va gomo khu vbavbandze, satshavbo va gu embedwa khu sipimaniso, 12gasi:'Va khedzisa, aholu va si woni gilo; vapwa, aholu va si si mani;kholu, va nga vbindrugedza mavbanyelo va gu tsetseledwa siwono sawe.' " 13Jesu a di va wudzisa khuye: "Ina kha mu wuti tshamuselo nya gipimaniso gegi, gani? Mu na wuti kharini tshamuselo nya simbe sipimaniso? 14Muyali a gu yala mahungu ya Nungungulu. 15Dzimbewu dzi nga thegelago bambe nya ndzila, khu vale va nga hevbudzwa mahungu. Aholu, khu gu vbiredza a vboha Sathane a ta dusa mahungu ma nga yadwago myonyoni gwawe. 16Kharato nugo, mbewu yi thegelago siwindrini, khu vale va pwago mahungu, va vbiredza gu ma hakha khu gutsaka. 17Aholu va mwalo mikhamba, khu kharato, kha va tiya. Va gu mana silingo ni sigaradzo khu kota nya mahungu ya Pfhumu, va gu dzegela gu ma diga. 18Mbewu yi thegelago vbakari nya miba khu vale va hakhago mahungu, 19aholu, va gu dzi garadza khu silo nya litigo, va gu padwa khu dzithomba ni gudogorela mafumbu yatshavbo nya silo; satshavbo esi si ngu midza mahungu ma si theli mihandro myonyoni gwawe. 20Mbewu yi thegelago wulimeni nya wadi khu vale va pwago mahungu va gu ma hakha, va gu thela mihandro, yimbe yi gu ninga magumi mararu, yimbe livbandre na limwedo ni yimbe lizana dzimbewu." 21Jesu a di engedza gambe khuye: "Ina gu ngu kodzega gu rothwa kandriya yi fenengedzwa khu gitundru, mwendro gu vegwa khutshini, gani? Khandri ya gu vegwa wulangani yi dzi kodzago gu wenengedza nyumbani gatshavbo, gani? 22Kholu gi mwalo gi sihadego gi na gumba wonegiswa; kha nga gambe gi mwalo gi sihadego gi na gumba tugudwa. 23Oyu a gu ni dzindzeve nya guyingise a napwe." 24A di engedza gambe, khuye: "Yingisani gwadi: Ndrengo mu na gu pimago khiyo mu na pimedwa nenu khiyo khu Nungungulu bwelo khavbo mu gu tadzisedwa. 25Kholu oyu a gu naso a na engedzedwa, gasi uye a gu mwalo gilo, ambari iso nya sidugwana a gu naso, a na dzegedwa." 26A di ganela gambe khuye: "Mufumu wa Nungungulu wu ngu fana ni muthu a yalago mbewu thembweni. 27Gani lade, gani a ngu wona, gani wutshigu gani mihani, iyo mbewu ya gu buga yi dandra na si dziti magirelo muni. 28Mafu khayo ma gu ni tshivba nya gubugise, gu hegula ya gu buga litshina, guhandzamedza mahongwe, gu landrela makonva a gu ayo ma thelago dzimbewu. 29Na dzi vidzidwe dzimbewu dza gu vbwerwa, kholu nango gu bani yi vbohide. 30"Hi na wu fananisa ni ginani mufumu wa Nungungulu? Gipimaniso muni hi na wu fananisago khigyo? 31Wu ngu fana ni thanga nya ginapi yi yadwago thembweni na yiri yidugwana ga dzimbewu dzatshavbo dza tigoni. 32Aholu, na yi yadwe, yi ngu buga yi gu dandra guvbindra mitongwe yatshavbo, yi gu thela matamu nya makhongolo, ma girago mutsa, sinyoni si dzi kodza gu ta girela umo sihaga sawe." 33Khu sipimaniso nya singi nya nga esi, Jesu a di va hevbudza mahungu ya Nungungulu, kha nga idzo mapimo yawe ma nga bani ma gu lomba khidzo. 34Vbakari nya vathu a di ganela khu sipimaniso basi, aholu, khu phuvbo a di tshamusela satshavbo vapizane vaye. 35Tshigu mwedo, na li hwide, Jesu a di embela vapizane vaye khuye: "Hongoleni tshatugo nya litsiva." 36Khavbo avbo, va di tshiya gidzemo, va gu tshatuga ni Jesu khu ngalava a nga bani aromo umo. Dzimbe dzingalava dzi di mu bangaladza. 37Yi di duga phuvbo nya yikhongolo; mavimbi nya mangi ma di bela ngalavani, ngalava yi di tala khu mati. 38Jesu a di lade gisaloni a gu khighela vbagikhuledzotunu; va di mu wusa, khavo: "Muhevbudzi, ina khu theli kota khu ethu hi mbembago, gani?" 39Khavbo avbo, Jesu na wugide, a di kawuka phuvbo, khuye: "Degula! Rula!" Phuvbo yi di dzegela gu degula, ma gu manega malenga nya makhongolo. 40Khavbo avbo, a di va embela khuye: "Khu ginani mu thavago ngudzu? Ina mu si gu khodwi, gani?" 41Avo va di ndrendremela va gu wudzisana khu gyawe, khavo: "Gasi khu mani oyu nya gu ambari phuvbo ni mavimbi si mu yingela?"

will be added

X\