MARKO 3

1Jesu a di bela nya luphye nyumbani nya nombelo. A di romo umo muthu nya gulimale libogo. 2Vatshavbo va di khusa maho va mu khedza, gasi gu mu wona mwendro a na mu hawulugisa khu litshigu nya Sabhado, vafela gu mana egi nyagu mu mole khigyo. 3Khavbo avbo, Jesu a di embela mwama nya gulimale libogo khuye: "Delu u ta ema vbakari vbavba." 4Khavbo avbo a di va wudzisa khuye: "Ina gu ngu dzumedziswa khu litshigu nya Sabhado gu gira silo nya sadi mwendro nya guvivbe? Gu vbanyisa muthu, mwendro gu mu songa?" Aholu avo va di degula, basi. 5Jesu a di khedza vatshavbo na gu garadzega khu gu wona guvivba nya myonyo yawe, a gu embela mudwali khuye: "Thawuludza libogo lago." Na li thawuludzide li di hawuluga. 6Vafarisi va di duga va ya tshangana ni avo nya tsawa wa Herodhi va gu luga mano nya gusonge Jesu. 7Jesu a di khuga a gu hongola siwoni ni vapizane vaye, a di landrwa khu gidzemo nya gingi gya Galileya; vambe va di guta khu Judheya, 8ni Jerusalema, ni Idhumeya, khisi kheyi nya tsongo wa Jordhani, ni wubambe nya madhoropa ya Tiro ni Sidhoniya. Gidzemo nya gingi, na gi pwide ndruma nya siliwugiso a nga gira Jesu, gi dita gwaye. 9Khavbo avbo, Jesu a di embela vapizane vaye va mu dongisela gingalavana gasi a si gundrwi khu vathu. 10Kha nga olu a nga bani a gu hawulugisa dzingumbe nya dzingi, vathu vatshavbo va nga bani vari ni madwali va di hidzimela gwaye vafela gu mu khuha. 11Maphuvbo nya guvivbe nayo, ma gu mu wona, ma di khidzima mbeli gwaye ma gu ganela khayo: "Uwe khuwe Mwamana wa Nungungulu." 12Aholu, Jesu a di ma degudza a gu ma laya ma si embeli muthu. 13Khavbo avbo, Jesu a di gwela gigomoni, a gu rana avo a nga va gola. Avo va di hongola gwaye. 14A di hatha likhumi na vavili gasi va khala naye, ni gu va ruma gu gimbila va hevbudza Ivhangeli. 15A di va ninga tshivba nya gututumise maphuvbo nya guvivbe. 16Malina yawe khaya: Simoni a nga mu thangisago lina la Pedro; 17Jakobe ni ndriyaye Johane, sanana sa Zebhedhewu, a nga va thangisago lina la Bowanergesi, gu tshamusago pwani: "Sanana nya Libara." 18Andreya, Filipi, Bhartolomewu, Matewu, Tomasi, Jakobe, mwamana wa Alifewu, Tadhewu, Simoni, Mukananewu 19ni Judha Sikarioti, a gu uye a nga ningelago Jesu. 20Khavbo avbo, Jesu a di hongola gaya ni vapizane vaye. Gidzemo gi di tombana nya luphye nyamba mu ninga ni gikhati gidugwana nya gu mane gu hodza. 21Valongo vaye, na va pwide esi, va dita gasi guta mu dzega, kholu va di pimisa nya gukhavo a di handruga. 22Ni vahevbudzi nya Nayo va nga bani va dzude khu Jerusalema va di mu vala khavo: "Oyu mwama a gu fumwa khu Bhelzebhu, khongolo nya maphuvbo nya guvivbe, gambe a gu tutumisa maphuvbo nya guvivbe khu tshivba ya Bhelzebhu." 23Khavbo avbo, Jesu a di va rana a va wudzisa khu sipimaniso khuye: "Gu ngu kodzega kharini Sathane a tutumisa Sathane? 24Mufumu wu dzi kabanisago khu mitsawa yi wugelanago khu gyawe, mufumu wowu kha wuyi danga. 25Ndranga yi dzi kabanisago, ndranga yoyo kha yi na pindruga. 26Kharati nugo, Sathane a gu dzi kabanisa ni gu dzi wugela abune, kha na pindruga, a na mbembisa guralo. 27Mwalo a dzi kodzago gu bela nyumbani nya ndrena gasi gu yi phanga nyamba phela khu gu yi hunga. Hwane nya isoso, khavbo a dzi kodzago gu yi phanga. 28Khu lisine nyi ngu mi embelani gu kheni muthu watshavbo a ngu dzi kodza gu tsetseledwa siwono ni guvivba gwatshavbo a ganelago nya guwugele Nungungulu. 29Aholu uye a valago Liphuvbo nya gu Age, kha na tsetseledwa, a na simama ni giwono gyaye kala gupindruga." 30A di ganela kharato khu kota va nga khavo a na ni liphuvbo nya guvivbe. 31Khavbo avbo, a di vboha mayi waye ni vandriyaye, va ta ema khu vbavbandze va mu ranisa. 32Gidzemo gi di mu randrede, va mu embela khavo: "U ngu vbwetwa khu mayi wago ni vandriyago vbavbandze." 33Aholu Uye a di va hakha khuye: "Khu mani mayi wangu ni vandriyangu?" 34Na khusedzide maho a khedza vatshavbo va nga bani va mu randrede, a di khuye: "Mayi wangu ni vandriyangu khavo ava. 35Kholu muthu watshavbo a girago gugola gwa Nungungulu khuye a gu ndriyangu ni mayi wangu."

will be added

X\