MARKO 2

1Na ma vbindride matshigwana, Jesu, na wide Khafarnawume, vathu va di dziti nya gukhavo womo ndrangani. 2Gi di tshangana gidzemo nya gingi ngudzu, gi nga tadzago ndranga yatshavbo kala vbanyangwatunu. Uye a di va hevbudza Mahungu ya Nungungulu. 3Khavbo avbo, va di mu resela gilima na gi rwadwe khu vama vana. 4Kha nga ulo va ngamba dzi kodza gu gi vbohisa vbafuvbi ga Jesu, khu kota nya vathu va nga bani vari vangi, va di lita vbatshani vaya tshula gikoli nya nyumba omu a nga bani aromo Jesu; na va girile isoso, va di reledza lithatho nya gilima. 5Jesu, na wonile gukhodwa gwawe, a di embela gilima, khuye: "Mwanangu, siwono sago si tsetseledwe." 6Vbakari nya gidzemo gi nga wonago esi, va di romo vahevbudzi nya Nayo va nga hingigedzago myonyoni gwawe khavo: 7"Khu ginani a ganela kharati? A ngu hembulula Nungungulu. Khu mani a dzi kodzago gu tsetselela siwono vbavbandze ga Nungungulu basi?" 8Jesu na wone mapimoni gwawe nya gukhuye va ngu hingigedza kharato, a di va wudzisa khuye: "Khu ginani mu pimisa kharato myonyoni gwanu? 9Khu gevbi gi vbevbugidego, gu embela gilima, kheni: 'Siwono sago si tsetseledwe,' ni gu kheni: 'Khuga u eme, u dzega lithatho lago u hongola?' 10Gasi mufela gu dziti nya gukhenu Mwamana wa Muthu a na ni tshivba nya gutsetselele siwono mafuni." 11Khavbo avbo, a di embela gilima khuye: "Khuga u eme, dzega lithatho lago u hongole gaya." 12Khavbo avbo gilima gi di dzegela gu khuga gi ema gi dzega lithatho laye mahoni nya gidzemo gyatshavbo. Na va wonile esi, vatshavbo va di liwuga ngudzu, gumogo ni gu dhumisa Nungungulu, khavo: "Gima hi si gu woni nya nga esi." 13Jesu a di duga nya luphye a gu hongola siwoni nya litsiva la Galileya. Gidzemo gyatshavbo gi di mu landra; uye a di va hevbudza. 14Na gu vbindra a di wona Levhi, mwamana wa Alifewu, na khade vbagikhalotunu gwaye nya gukhuphise. A di mu rana, khuye: "Nyi landre." Uye a di dzegela gu khuga a mu landra. 15Jesu na khade vbamezatunu ndrangani ga Levhi, va hengisi nya vangi ni sighohi va di ya khala navo vbamezatunu vbale a nga bani aromo Jesu ni vapizane Vaye, kholu va diri vangi va nga bani va gu mu landrela. 16Vahevbudzi nya Nayo, nya tsawa wa Vafarisi, na va mu wone na gu hodza ni sighohi ni vahengisi nya khupho, va di wudzisa ga vapizane vaye khavo: "Khu ginani uye a hodzago gumogo ni vahengisi nya khupho ni sighohi?" 17Jesu, na pwide satshavbo, a di va hakha, khuye: "Khandri vale va gu ni womi va vbwetago n'yanga, aholu vadwali. Eni kha nya tela guta rana va nya gululama, aholu, sighohi." 18Khu gikhati gile, vapizane va Johane ni Vafarisi va di gu hala. Khavbo avbo va dita vathu va ta mu wudzisa khavo: "Khu ginani vapizane va Johane ni Vafarisi va halago, avo vago va si hali?" 19Jesu a di va hakha khuye: " Ina gu ngu kodzega sithiva gu hala si ngari ni mudzegi gani? Na va ngari naye mudzegi, sithiva kha si dzi kodzi gu hala. 20Aholu, ma nguta matshigu va na gu wandredwago mudzegi. Gikhati gyogyo va na hala. 21Mwalo a thelago giziva nya giphya vbamwendratunu wa gale kholu giziva nya giphya gi na pferula mwendra wa gale, khu kharato mwendra wu na engedzelana gu pferuga. 22Kha nga gambe mwalo a thelago wadwa nya givhayi malowoni ya gale, kholu wadwa nya wuphya wu na pola malowo ya gale, gu luzeka kharato wadwa ni malowo. Khu kharato; wadwa nya wuphya, malowoni nya maphya." 23Tshigu mwedo nya Sabhado, Jesu a di vbindra khu thembweni nya mavbila. Vapizane va di vbulula mavbila madugwana. 24Vafarisi va di mu kawuka khavo: "Khu ginani vapizane vago va girago esi si himbedzedwago gu gira khu litshigu nya Sabhado?" 25Jesu a di va hakha khuye: "Mu si gu hevbuli esi a nga girago Dhavide gumogo ni ava a nga bani ari navo gikhati a nga pwago ndzala, gani? 26A di bela Nyumbani ga Nungungulu gikhati gya Abhiyatari, khongolo nya vaphasi nya mhamba, a ya hodza sibaba nya miphaso, a ninga navo ava a nga bani ari navo, sibaba si nga bani si gu lumba gu hodzwa basi khu muphasi." 27A di engedza gambe khuye: "Sabhado yi di giredwa muthu, khandri muthu a nga giredwa Sabhado. 28Khu kharato, dzitini gu khenu Mwamana wa Muthu a ngu fumela ni Sabhado gambe."

will be added

X\