MARKO 16

1Na yi vbindrile Sabhado Mariya wa Madalene, ni Mariya mayi wa Jakobe ni Salome, va di renga mafura gasi guya mu todza. 2Ni dzimindru, na li gu khuga lidambo, litshigu nya guhegule nya semana, va di hongola thowotunu. 3Va di gimbila na va gu wudzisana khavo: "Khu mani a na gu hi rindrividzelago giwindri gi segago liphala?" 4Na va khusedzide maho, va di wona gu khavo giwindri gile nya gikhongolo gi rindrividzidwe gi vegwa phuvbo. 5Na va bede thowoni, va di wona lidzaha na li khade khu nyamudye, na li ambade dzingandzu nya guage. Va di thuruga. 6Lidzaha li di khilo: "Mu nga thavi, khandri mwa gu vbweta Jesu wa Nazareta, oyu a nga khokhothedwago. Wugide, mwalo avba. Wonani wulanga va nga bani va mu vegide avbo. 7Indrani muya tivisa vapizane vaye gumogo ni Pedro, khenu a na mi hegudzani gu vboha Galileya. Iyoyo mu na ya mu wona kha nga edzi a nga mi embelani khidzo." 8Na va dugile, va di tutuma na va gu ndrendremela khu hwanga, aholu kha va embela muthu. [ 9Na wugide khu gufani ni dzimindru nya litshigu nya gu hegule nya semana Jesu a di hegula khu gu dzi wonegisa ga Mariya Madalene, wule a nga mu dusa livbandre na mavili maphuvbo nya guvivbe. 10Uye adiya tivisa ga vambe vapizane va Jesu va nga bani a vari gutshanisekani va gu lila. 11Na va pwide gu pwani a ngu vbanya ni gu pwani wonidwe khu Mariya Madalene, kha va nga khodwa. 12Hwane nya isoso, Jesu a di dzi wonegisa khu gimbe giemo ga vapizane vavili va nga bani va gu duga va hongola vbavbandze nya lidhoropa. 13Va di bwelela hwane va ya embela vambe, aholu avo kha va nga khodwa. 14Khu gu hegisa a di dziwonegisa ga vale nya likhumi na moyo na va khade vbamezatunu va hodza. A di va kawuka gumba khodwa gwawe, ni olu va nga ganedza vale va nga mu wona na wugide. 15Khavbo avbo, a di va embela khuye: "Indrani tigoni gwatshavbo, mu gimbila mu hevbudza Mahungu nya Yadi nya maphya ga vathu vatshavbo. 16Oyu a khodwago a bhapatiswa, a na vbanyiswa; gasi oyu a si khodwigo a na mbemba. 17Siliwugiso va na gu girago ava va na khodwago khesi: khu lina langu va na tutumisa maphuvbo nya guvivbe, va na ganela malimi nya maphya, 18va na mola dzinyoga khu mandza; ambari va sela rendre nya gusonge, kha wu na va gira gilo; va na handzega mandza va nya gudwala, va gu va vbanyisa." 19Pfhumu Jesu Kristo, na ganede navo, a di khusedzedwa ndzadzini, aya khala nyamudye ga Nungungulu. 20Vapizane va di khuga khu vbale va gimbila va tivisa Ivhangeli malangani yatshavbo. Pfhumu a di thumisana navo, a tiyisa magana yawe khu siliwugiso va nga bani va gu gira.]

will be added

X\