MARKO 15

1Na gu ngari dzimindru, vakhongolo nya vaphasi nya mhamba va di gira tshangano ni madhota ni vahevbudzi nya Nayo, va hunga Jesu va gu hongola naye ga Pilato. 2Pilato a di mu wudzisa khuye: "Khuwe Mufumeli wa Vajudha, gani?" Jesu a di hakha khuye: "Khidzo u ganelago." 3Vakhongolo nya vaphasi nya mhamba va di mu singedza silo nya singi. 4Pilato a di mu wudzisa nya luphye, khuye: "Khu hakhi gilo, gani? Ngapwa dziketso dzatshavbo edzi va gu girelago!" 5Aholu Jesu kha nga hakha gilo. Pilato a di liwuga ngudzu. 6Myaga yatshavbo, khu gikhati nya buzo nya Phasika, Pilato a di olovela gu tshula gibotshwa gimwegyo, egi va gi lombago avo. 7Gi di romo gibotshwa nya gupwani khu Bharabhasi, adiri muthu nya guwuse mayunga, a di modwa gumogo ni vambe kholu a nga songago muthu vbalitungatunu. 8Gidzemo gi di hidzimela gi lomba Pilato gu gira edzi a nga olovedza gu va girela. 9Pilato a di va wudzisa khuye: "Mu ngu dzinani nyi mi tshulela Mufumeli wa Vajudha, gani?" 10Kholu a di gu dziti gu khuye vaphasi nya vakhongolo va di mu ningela khu lidiwo. 11Vaphasi nya vakhongolo va di kutsedzela gidzemo gu lomba gu tshudwa Bharabhasi. 12A di va wudzisa nya luphye khuye: "Ahati oyu mu gu khenu Mufumeli wa Vajudha, mwa gu vbweta gu khenu nyi mu rini?" 13Va di phela gambe gu gulumela khavo: "Mu khokhothele!" 14Pilato a di engedza a wudzisa khuye: "Gighoho muni a giridego?" Aholu avo va di gulumela gu vbindrisa, khavo: "Mu khokhothele! Mu khokhothele!" 15Pilato khu gu vbweta gu tsakisa gidzemo, a di va tshulela Bharabhasi, na rumide gu kwamula Jesu, a di va ninga vaya mu khokhothela. 16Masotshwa ma di mu dzega ma gu hongola naye nyumbani nya wufumu, vbawulangatunu nya sitsayiso. Masotshwa yatshavbo ma diya tshangana. 17Va di mu fenengedza giwunguwungu, va mu ambagisa gihugu nya miba va nga lugago. 18Khavbo avbo, va di phela gu mu losa khavo: "Sewe, Mufumeli wa Vajudha!" 19Va di mu veta hungoni khu sengele, va mu hetshela, va mu khidzimela ni gu dzi thesa migondroni gwaye. 20Na va vbedzide gu hagana khuye, va di mu funungula mwendra nya giwunguwungu, va mu ambagisa dzingandzu dzaye, va duga naye gasi guya mu khokhothela. 21Ndzilani va di mana mwama moyo nya gupwani khu Simoni wa Sirene, babe wa Alexandre ni Rufu, na gu wuya khu gundze, va mu ruma guphasa Jesu gu rwala gihambano. 22Va di hongola naye Golgota, gutshamusago gu pwani "Wulanga nya girwarwa." 23Va di mu ninga wadwa nya gupatwe ni rendre, aholu, kha nga sela. 24Khavbo avbo, va di mu khokhothela, va gu kabana dzingandzu dzaye, va gira nyatumbatumbane gasi gu wona ginani gi na gu lumbago moyo ni moyo nya avo. 25Va mu khokhothede ni dzimindru, khu gikhati nya wuraru. 26Khu vbatshani va di lovide mahungu nya gutivise nandru waye: "Mufumeli wa Vajudha." 27Jesu a di khokhothedwa gumogo ni dzimbafa dzimbili, mweyo khu nyamudye, yimbe khu nyambade. [ 28Yi di tadzisega kharati Milowo yi nga khiyo: "Sayedwe tsawani nya sighohi."] 29Vavbindri nya ndzila va di mu vala na va gu khiniga mihungo, khavo: "Ah! Nga tshiga, na! Uwe u pfhungumulago Nyumba ya Nungungulu u yi vbahedza khu matshigu mararu! 30Nga dzi vbanyisa wabune u tshiga khu vbagihambanotunu." 31Vaphasi nya vakhongolo ni vahevbudzi nya Nayo va di mu vala navo khavo: "Kodzide gu vbanyisa vakwawe, aholu, uye mune kha kodzi gu dzi vbanyisa wurumba waye! 32Uye Mesiya, Mufumeli wa Israeli, a na tshige khu vbagihambanotunu, gasi hi mu wona, hi khodwa gwaye." Ni vale a nga khokhothedwago navo, va di mu vala navo. 33Ni mihani, khu gikhati nya livbandre na gimwegyo gi di manega gidema nya gikhongolo ngudzu tigoni gwatshavbo, kala khu gikhati nya livbandre na wuna. 34Khu gikhati gyogyo, Jesu a di rana khu lito nya likhongolo khuye: "Eloyi, Eloyi, lama sabaktani?" Gu tshamusago pwani: "Nungungulu wangu, Nungungulu wangu, khu ginani u nyi digidego?" 35Na va mu pwide, vambe va nga bani varomo vbale, va di khavo: "A gu rana Eliya!" 36Moyo wawe, a di tutuma, aya dzega gipuryana nya wuluva a nega omu nya ginageri, a tshomega vbatshavatunu a mu ninga a sela, na gu ganela khuye: "Digani, hi na wona mwendro a nata Eliya a ta mu tshisa khu vbale." 37Khavbo avbo, Jesu, a di womba huwa nya yikhongolo, a gufa. 38Mwendra nya makhuvi nya Nyumba ya Nungungulu wu di pferuga khu vbakari ni vbakari, gu khugela vbatshani kala vbavbatshi. 39Ndruna yi nga bani yiromo vbafuvbi, na yi wone mafelo yaye, yi di khiyo: "Khu lisine, oyu mwama adiri Mwamana wa Nungungulu!" 40Va di romo navo vbafuvbi vbale vanyamayi va nga bani va gu khedzisela khu hwindzo. Vbakari gwawe a di romo Mariya Madalene, Mariya mayi wa Jakobe, ni Josefe ni Salome. 41Khavo va nga bani va gu mu landrela ni gu mu sayisa gikhati a nga bani aromo Galileya. Va di romo vambe vanyamayi nya vangi a ngatago navo Jerusalema. 42Na li hwide, kha nga a nga bani ari litshigu nya gu dongisele, litshigu li landredwago khu Sabhado. 43Josefe wa Arimateya, givbango nya guthavisege nya madhota, a nga bani a gu lindrela nuye guta nya mufumu wa Nungungulu, a di tiya a gu hongola ga Pilato aya lomba girumbi gya Jesu. 44Pilato a di liwuga khu gupwa nya gupwani Jesu vbiredzede gufa, a di rana ndruna a yi wudzisa gu khuye: "Ina gale na fude, gani?" 45Na pwide phindrulo ya ndruna, a di ninga girumbi Josefe. 46Uye a di renga mwendra nya sidzingelo, a tshisa girumbi, a gi fumbela khuwo, a gi vega phalani li nga bani li kedwe mu giwindrini, a gu sega gambe khu giwindri. 47Mariya Madalene ni Mariya mayi wa Josefe, va di khedzisela gasi gu guti avba a nga dzingwa avbo.


Copyright
Learn More

will be added

X\