MARKO 13

1Na va gu duga khu Nyumbani ga Nungungulu, moyo nya mupizane a di mu embela khuye: "Muhevbudzi, nga wona wukhongolo nya siwindri sesi ni wumburi nya mavbahelo yakone!" 2Jesu a di mu hakha khuye: "U ngu dzi wona dzinyumba dzedzi nya dzikhongolo? Dzatshavbo dzi na pfhungumudwa. Kha gina tshala giwindri vbatshani nya giwindri gikwawe." 3Na khade gigomoni nya miolivha gi khedzanidego ni Nyumba ya Nungungulu, Pedro, Jakobe, Johane ni Andreya va di mu wudzisa vari venga khavo: 4"Hi embele, lini si na gu dugelelago satshavbo soso? Giyeyedzo muni hi na wonago khigyo gu khethu somo vbafuvbi ni gu vboha?" 5Jesu a di phela gu va embela khuye: "Dzi woneleni, gasi mu si kanganyiswi khu vathu. 6Va na tumbuluga nya vangi khu lina langu, khavo: 'Kheni Kristo.' Va na pengisa va nya gutala. 7Mwa gupwa huwa nya dzinyimbi ni gu ganedwa khu dzinyimbi mu nga thurugi; gu vbwetega si girega isoso, aholu khandri mahegiso. 8Mayigo ma na wugelana, mifumu niyo yi na wugelana; malanga nya mangi gu na manega sirevareva ni ndzala. Satshavbo soso a na bani ari guphela nya sisaniso. 9"Dzi woneleni. Mu na yiswa ga valamuli, mu na kwamudwa dzinyumbani nya nombelo, mu yiswa ga vafumeli khu kotani yangu, gasi gu nyi fakazani mahoni gwawe. 10Aholu, guphela gu vbwetega gu enedza mayigo yatshavbo khu gu tivisa mahungu nya guvbanyise. 11Mwa gu yiswa ga vafumeli gasi gu ya lamudwa mu nga garadzegi khu egi mu na gu ya ganelago. Mu na ganela esi mu na gu embedwago khu Nungungulu gikhati gyogyo. Kholu, khandrenu mu na ganelago, khu Liphuvbo nya gu Age. 12Muthu a na ningela ndriyaye a songwa, babe a ningela gyanana; sanana si na wugela vavelegi vawe, si va songisa 13Litigo li na mi venga khu kotani yangu. Aholu oyu a na timiselago kala mahegiso a na vbanyiswa. 14"Aholu, mwa gu wonani manyala nya guthise na ma emisidwe avba gu si yeligo - oyu a hevbulago a na si pime gwadi - ava va na bani varomo Judheya, va na thavele sigomoni. 15Oyu a na bani aromo vbatshani nya nyumba a nga tshigi gambe a bela nyumbani gasi guya dzega gilogyo. 16Oyu a na bani aromo thembweni a nga bweleli gambe hwane gasi guya dzega guambala. 17A na bani ari tshanisa ga va nya dzimimba ni va nya gu mamisa matshigu yoyo. 18Lombelelani ga Nungungulu, si si dugeleli vbagirametunu 19Kholu khu matshigu yoyo yi na manega tshanisa nya yikhongolo nya gu gima yi si gu manegi gukhugela avbo Nungungulu a nga vanga litigo, kala matshigu ya muhuno, gambe gima kha yi na manega gambe. 20Nari pwani Pfhumu kha nga rodzisa matshigu yoyo, mwalo a nga vbweta gu vbuluga; aholu, kotani nya sihathwa saye a ma rodziside. 21Khu kharato, va guta mi embelani khavo: 'Wonani, Kristo womo avba,' mwendro gu khavo: 'Womo vbale,' mu nga dzumelini. 22Kholu va na dugelela vakristo ni vaprofeti nya malipha. Va na gira siliwugiso nya gutale, si na dzi kodzago gu pengisa ambari sihathwa. 23Khu kharato, dzi woneleni, nya gu mi embelani matshigu ma nga romo. 24"Aholu, hwane nya tshanisa yoyo, lidambo li na sivbala, ngima kha na wenengedza. 25Dzinyeledzi dzi na thegela khu ndzadzini ni tshivba nya ndzadzi yi na dzudzwa. 26Khavbo avbo, va na wona Mwamana wa Muthu na gu tshiga khu vbakari nya lipfhi na tade khu tshivba nya yi khongolo ni gidhumo. 27A na rumela sirumwa saye gasi guta tombanisa sihathwa sa maphuvbo yatshavbo ya mana, gukhugela mahegiso nya litigo kala mahegiso nya ndzadzi. 28"Manani gihevbudzo khu gipimaniso nya nguyu: a gu thela matamu nya nyenvu mu ngu dziti nya gukhenu nango nya lithonga yi vbohile. 29Kharato nugo, mwa gu wonani satshavbo sesi na si gu dugelela, dzitini nya gukhenu gi vbohile gikhati. 30Khu lisine, nyi ngu mi embelani gu kheni: Melana yoyu kha wu na vbindra si si gu dugeleli satshavbo sesi. 31Yi na vbindra ndzadzi ni mafu, aholu magana yangu kha ma na vbindra." 32Jesu a di engedza khuye: "Gasi gikhati ni litshigu mwalo a dzitigo, ambari sirumwa sa ndzadzini, ambari Mwamana, sa gu tidwa khu Babe basi. 33Dzi woneleni, khalani na mu dongile, kholu kha mu liti litshigu ambari gikhati. 34Gu ngu fana ni muthu nya gukari a nga donga liendro, a di khuga a tshiyedza ndranga ga sithumi saye, a kabanisela mithumo ga moyo ni moyo, a ruma ghadhi gu tshala yi khevisela. 35Khu kharalo, khalani na mu dongide kholu kha mu giti gikhati a wuyago khigyo mune ndranga, gani silambo, gani vbakari nya wutshigu, gani mambagugya, gani dzimindrudzile; 36a nga wuya khu guvbiredza ata mi mana na mu lade. 37Esi nyi mi embelago nya gu embela vatshavbo kheni: Khalani na mu dongide."

will be added

X\