MARKO 12

1Jesu a di ganela vbakari gwawe khu sipimaniso, khuye: "Muthu nya gukari a di lima lithembwe nya miuvha, a li bhiya, a gira gikhwati, a vbaha gitezi, na vbedzide, a di tshiyedza valimi a endra a gu hongola hwindzo. 2Na wonile gu khuye yi vbohile nango, a di rumela githumi gyaye ga valimi vale gasi guya hengisa dzimbewu dzi mu lumbago. 3Aholu, valimi va diya gi hunga, va gi veta, va gi bweledza nyambana gilo. 4A di va rumela gimbe githumi. Igyo gi diya pandrwa phandza ni gu yuyutedwa. 5A di rumela gambe gimbe, vaya gi songa. Khavbo avbo, a di va rumela simbe nya singi, gasi avo va di si veta, simbe va si songa. 6Na tshaledwe basi khu mwamana waye nya gigodwa, a di mu rumela, na gu alakanya gu khuye: 'Va na ninga githawo mwamana wangu.' 7Valimi va di embedzelana khu gyawe khavo: 'Khuye oyu a na tshalago ni thomba, hongoleni hi mu songe, hifela gu tshala nayo ethu.' 8Va di mu pfinya, va mu songa, va mu dzudzuga vbavbandze nya lithembwe. 9Ginani a na girago mune lithembwe? Khu lisine, a na wuya ata songa valimi vale a dzega lithembwe a tshiyedza vambe valimi. 10Ina mu si gu hevbuli omu nya Milowo magana ma gu khayo: 'Giwindri gi nga nyenywa khu vavbahi khigyo gi khadego hungo nya gikoli nya nyumba. 11Satshavbo sesi sigiro sa Pfhumu,gambe siliwugiso mahoni gwathu!' " 12Na va dzitide nya gukhavo gipimaniso gyogyo gya gu thula avo, va di vbweta ndzila nya gu mu mole, aholu, khu gu thava gidzemo, va di mu diga va hongola. 13Va di rumela ga Jesu Vafarisi nya gukari ni va na Herodhi gasi guya mu riya khu magana nya gukari. 14Na va vbohide va di khavo: "Muhevbudzi, hi ngu dziti nya gukhethu u ngu ganela lisine, khu thavi muthu kholu khu khedzi giemo nya muthu, wa gu hevbudza ndzila ya Nungungulu, kha nga idzo li lombago khidzo lisine. Nga hi embela, hi na ni fanelo nya gulivbe khupho ga Sezari mwendro hi mwalo? Hi livba, mwendro hi nga livbi?" 15Jesu, na holelede wuhephi wawe a di va hakha khuye: "Mwa gu nyi lingela ginani? Nga nyi yeyedzani tsapawu yakone nyi yi wona." 16Na va mu ningide. A di va wudzisa khuye: "Gasi khovbe ni lina leli khya mani?" Va di khavo: "Khya Sezari." 17Khavbo avbo, Jesu a di va embela khuye: "Ningelani ga Sezari esi si gu sa Sezari, ni ga Nungungulu esi si gu sa Nungungulu." Va di liwuga khu gupwa phindrulo yoyo. 18Va dita navo Vasadhusi, tsawa nya vale va ganedzago guwuga ga ava va fudego, va mu wudzisa khavo: 19"Muhevbudzi, Mosi a hi rumide gu khuye a gufa mwama a tshiya noni nyambana sanana, ndriyaye a na hambela namu waye, gasi gu wusa ndranga ya mufi. 20Va di romo livbandre na vavili vandruye. Koma wakone a di dzega nyamayi, afa nyamba tshiya sanana. 21Oyu nya wuvili a di hambela namu waye, afa nuye nyamba tshiya sanana. Ga oyu nya wuraru gu di girega gambe kharato. 22Vatshavbo nya livbandre na vavili va difa nyamba tshiya sanana. Gu hegisa a difa nuye nyamayi wule. 23Khu litshigu nya guwuge khu gufani, nyamayi wule a na lumba mani, olu a nga khala mwangadzi wa vatshavbo nya livbandre na vavili?" 24Jesu a di va hakha khuye: "Ina khandri mwa gu kanganyisega khu gumba pimani milowo ni tshivba ya Nungungulu, gani? 25Kholu, khu gikhati nya guwuge khu gufani, vama kha va na dzega, ni vanyamayi kha va na dzegwa, aholu vatshavbo va na khala kha nga sirumwa sa Nungungulu. 26Nari khu mahungu nya guwuge khu gufani kha mwa hevbulani libhukuni la Mosi, gikhati Nungungulu a nga ganelago naye umo nya gipopwana, khuye: 'Eni kheni Nungungulu wa Abrahama, Nungungulu wa Isaki, Nungungulu wa Jakobe,' gani? 27Khandri Nungungulu nya va nya gufa, aholu Nungungulu nya va nya guvbanya. Mu dzimede ngudzu!" 28Moyo nya muhevbudzi nya Nayo, khu gu wona gu khuye Jesu a va ningile phindrulo nya yadi, a di hidzimela a gu mu wudzisa khuye: "Khu wevbini nayo nya guhegule ga yatshavbo?" 29Jesu a di mu hakha khuye: "Nayo nya guhegule khoyu: 'Upwa Israeli! Pfhumu Nungungulu wathu khuye enga basi a gu Pfhumu. 30U na gola Pfhumu Nungungulu wago khu monyo wago watshavbo, khu hefemulo wago watshavbo, khu mapimo yago yatshavbo ni tshivba yago yatshavbo.' 31Nya wuvili khoyu: 'U na gola muthu kwanu nga edzi u dzi golago khidzo uwe mune.' Mwalo wumbe nayo nya khongolo guvbindra eyi ya mivili." 32Muhevbudzi nya Nayo a di khuye: "Khidzo, Muhevbudzi! U ganede gwadi khuwe Nungungulu moyo basi, mwalo mumbe vbavbandze gwaye; 33ni gu khuwe gu vbwetega gu mu gola khu monyo watshavbo, khu mapimo yatshavbo, khu tshivba yatshavbo, ni gu khuwe gu gola muthu kwanu nga edzi u dzi golago khidzo uwe mune, gu ngu phasa gu vbindra miningelo ni dzimhamba dzatshavbo." 34Jesu, na wonide gu khuye phindrude khu mapimo nya guti, a di mu embela khuye, "U mwalo hwindzo ni mufumu wa Nungungulu." Gu khugela avbovbo mwalo gambe a nga tiya gu mu wudzisa silo. 35Jesu a di simama gu hevbudza Nyumbani ga Nungungulu, a wudzisa khuye: "Khu ginani vahevbudzi nya Nayo va gu khavo Kristo gyanana gya Dhavide? 36Uye Dhavide abune, ganede khu tshivba nya Liphuvbo nya gu Age khuye: 'Pfhumu a di embela Pfhumu yangu khuye:khala khu nyamudye gwangu kala nyi vega valala vago vbavbatshi nya migondro yago.' 37Olu Dhavide abune a mu ranago Pfhumu, gu ngu kodzega kharini Kristo gu khala gambe gyanana gyaye?" Gidzemo gyatshavbo gi di mu yingisa khu gu tsaka. 38Jesu a di simama gu hevbudza a va embela gambe khuye: "Dzi woneleni ni vahevbudzi nya Nayo. Va gu gola gu ambala dzingandzu nya gulaphe, ni gu loswa khu githawo khu vathu; 39va gu gola gu khala malangani nya guhegule dzinyumbani nya nombelo ni omu nya sipfhitsha. 40Va gu phanga dzinoni mu dzindrangani dzawe, na va gu pfhadza khu gu gira milombelo nya gulaphe. Va na hakha tsayiso nya guvbindrise." 41Jesu a di khade vbafuvbi ni wulanga nya ningelo wa Nyumbani ga Nungungulu a di khedzisa edzi vathu va nga bani a va thela khidzo dzitsapawu gyomboni; sitetema nya singi si di ningela dzitsapawu nya gutale. 42Adita nyamayi moyo nya noni nya gisiwana, ata thela nuye singerengere sivili nya tsapawu. 43Jesu a di rana vapizane, vaye khuye: "Khu lisine nyi ngu mi embelani gu kheni noni yeyi nya gisiwana yi ningide guvbindra vatshavbo. 44Kholu avo va di ningela esi si nga va tshalelago, gasi iyo yi di ningela satshavbo yi si thembago mu wusiwanani gwaye."

will be added

X\