MARKO 11

1Na va gu vbweta gu vboha Jerusalema, vari vbafuvbi ni Bhetifage ni Bhetaniya, gigomoni nya miolivha, Jesu a di ruma vapizane vaye vavili, khuye: 2"Indrani dzindrangani mule, na mu vbohide, mu naya mana giburwana na gi hungidwe egi gi si gu khiledwigo khu muthu. Gi tshuleni mu nyi resela. 3Mwa gu wudziswa pwani mwa gu gi tshulela ginani, indrani khenu khu Pfhumu a gi vbwetago, hi na gi resa gambe." 4Na va hongode, va diya mana giburwana na gi hungidwe nyangwani, vbafuvbi ni ndzila, va gi tshula. 5Ava va nga bani varomo vbale va di khavo: "Ginani mu girago? Mwa gu tshulela ginani giburwana gyogyo?" 6Avo va di hakha kha nga edzi Jesu a nga va embela khidzo. Va di va diga va hongola nagyo. 7Na va vbohide nagyo ga Jesu, va di ladza dzingandzu dzawe vbatshani nya giburwana, Jesu a gu khilela. 8Nya vangi va di ladza dzingandzu dzawe ndzilani gasi vambe va di fanya matamu nya misimbo va ladzela ndzilani. 9Ava va nga bani va thangide ni ava va nga bani va tshade khu hwane gwaye, vatshavbo va di kulungela khavo "Hosana; a na rungudzwe oyu atago khu lina la Pfhumu. 10Wu na rungudzwe wufumu wa babe wathu Dhavide wu vbohago. Hosana ndzadzini!" 11Jesu, na vbohide Jerusalema a di bela Nyumbani ga Nungungulu; na wonide satshavbo si nga bani siromo mule, khu gu wona gu khuye lidambo li hwide, a di hongola Bhetaniya ni vale nya likhumi na vavili. 12Na gugide, va di duga khu Bhetaniya, Jesu apwa ndzala. 13Na wonide khu hwindzo nguyu na tade khu mahagane, a di hidzimela khuye mwendro a na mana maguyu, aholu a diya mana basi mahagane, kholu khandri di nango yaye nya guvelege. 14Khavbo avbo, Jesu a di embela nguyu khuye: "Gu khugela muhuno mwalo a na hodzago gambe mihandro yago." Vapizane va dipwa magana yaya. 15Na va vbohile Jerusalema a di bela Nyumbani ga Nungungulu a tutumisa varengisi ni varengi, a thesela dzimeza dza va nya wugwewo nya dzitsapawu ni sikhalo sa vale va nga bani va gu rengisa matuva. 16Kha nga dzumedzisa muthu gu tsemakanya Nyumba ya Nungungulu na rwade gilogyo. 17A di va hevbudza khuye: "Ina kha mu dziti nya gukhenu gu lovidwe gu pwani 'Nyumba yangu yi na ranwa gu pwani nyumba nya milombelo nya mahundzu yatshavbo, gani?' Gasi enu mu yi girile liphala nya dzimbafa." 18Vakhongolo nya vaphasi nya mhamba ni vahevbudzi nya Nayo, na va pwide esi, va di vbweta mano nya gu mu songe; aholu va di mu thava kholu vathu vatshavbo va di gu samala sihevbudzo saye. 19Aholu, na li hwide, Jesu ni vapizane vaye va di duga dhoropani. 20Ni dzimindru, na va gu vbindra khu ndzila yamweyo, va di wona nguyu wule na wu bangide ni mikhamba yaye. 21Pedro a di dundruga, a embela Jesu khuye: "Muhevbudzi, nga wona nguyu u nga wu vala, bangide." 22Jesu a di khuye: "Khodwani ga Nungungulu. 23Khu lisine nyi ngu mi embelani gu kheni, muthu a gu embela gigomo gegi khuye siguga khavba uya thegela phwani, na si kanakani monyoni gwaye, aholu a khodwa gu khuye esi a ganelago si na girega, khu lisine furi si ngu girega guralo. 24Khu magirelo yoyo, nyi ngu mi embelani gu kheni satshavbo esi mu lombago umo nya nombelo wanu, dzitini gu khenu mu na si mana. 25Mwa gu vbweta gu gira nombelo wanu phelani khu gu tsetselela ava va gu ni sihoso gwanu, gasi Babe wanu a guromo ndzadzini a mi tsetselelani nenu sihoso sanu. [ 26Kholu mwa gumba tsetselelana, Babe wanu a guromo ndzadzini kha na mi tsetselelani nenu sihoso sanu.]" 27Na wide gambe Jerusalema, Jesu a di gu gimbilagimbila Nyumbani ga Nungungulu, ata randredwa khu vakhongolo nya vaphasi nya mhamba, ni vahevbudzi nya Nayo ni madhota, 28va mu wudzisa khavo: "Wa gu yi mana hayi tshivba nya gu gire esi? Khu mani a nga gu ninga tshivba yoyo?" 29Jesu a di va hakha khuye: "Eni neni nyi na ni giwudziso gwanu. Mwa gu nyi hakhani nyi na mi embela neni umo yi dugelago umo tshivba nyi girago khiyo silo sesi. 30Ina gubhapatisa ga Johane gu diri ga Nungungulu mwendro gu diri ga vathu? Nyi samuleni." 31Va di phela gu ganedzisana khu gyawe khavo: "Ha gu khethu gu diri ga Nungungulu, a na khuye khu ginani mu nga mba khodwa khugo? 32Aholu ha gu khethu gu diri ga vathu, hi na wugedwa khu vathu, kholu vatshavbo va di gu wona Johane kha nga muprofeti nya guvbelele." 33Va di hegisa khu gu khavo: "Ahati." Khavbo avbo, Jesu a di khuye: "Eni neni Kha nyi mi embelini omu nyi yi manago tshivba nya gugire esi."


Copyright
Learn More

will be added

X\