MARKO 10

1Na khugile khu bale a diya tigoni ga Judheya, tshatugo nya tsongo wa Jordhani. Na randredwe nya luphye khu vathu, a di va hevbudza kha nga giolovedzo gyaye. 2Vafarisi nya gukari va di mu wudzisa gasi gu mu linga khavo: "Ina gu ngu kodzega mwama gu hula mwangadzi waye gani?" 3Uye a di va hakha khuye: "Gasi wa gu ruma gurini Nayo a nga mi hevbudzago Mosi?" 4Va di mu hakha khavo: "Mosi a di dzumedzisa mwama gu lova lidangalila nya musi a ninga mwangadzi waye a gu hongola nalo gaya gwawe." 5Jesu a di va embela khuye: "Mosi a mi dzumedziside khu kota nya guvivbe nya myonyo yanu. 6Aholu, dzitini gu khenu guhegulani Nungungulu a di gira mwama ni nyamayi. 7Khu kharato, mwama a na tshiya babe ni mayi a ya patana ni mwangadzi waye. 8Va vavili va na khala muthu moyo basi. Khu kharato, kha va ngari vavili gambe, aholu moyo basi. 9Khu magirelo yoyo, kha dzi kodzi muthu gu tshula egi gi hungidwego khu Nungungulu." 10Na va vbohide gaya, vapizane va di ya mu wudzisa nya luphye khu mahungu yaya. 11Jesu a di va embela khuye: "Oyu a hulago mwangadzi waye a gu dzega mumbe a ngu bhaya. 12Nyamayi nuye a gu diga mwama waye a dzegwa khu mumbe a ngu bhaya." 13Khavbo avbo, va di yisa sanana ga Jesu gasi a si kategisa. Aholu, vapizane va di si himbedzela. 14Jesu, na si wone, a di garadzega a gu ganela khuye: "Digani sanana sita gwangu. Mu nga si himbedzeli, kholu mufumu wa Nungungulu wa gu lumba iso. 15Khu lisine nyi ngu mi embelani kheni oyu a si hakhigo mufumu wa Nungungulu kha nga gyanana, gima kha na wu mana." 16Jesu a di wugarela sanana mawogoni, a si handzega mandza a gu si kategisa. 17Na gu vbweta gu duga a hongola, a di khingwa khu mwama na gu tutuma, a ta khidzima migondroni gwaye khuye: "Muhevbudzi nya wadi, ginani nyi fanelago gu gira gasi nyi mane guvbanya nya gupindruge?" 18Jesu a di mu hakha khuye: "Khu ginani u nyi ranago nya wadi? Uye a gu wadi, khu Nungungulu basi. 19U ngu yiti milayo yi gu khiyo: 'U nga songi; u nga bhayi; u ngabi; u nga singedzi; u nga kanganyisi; rungudza babe ni mayi.' " 20Gasi uye a di hakha khuye: "Muhevbudzi, nyi ngu landrisa satshavbo soso gu khugela wudzahani wangu." 21Jesu, na mu khedzide, a di tsakiswa khuye a gu mu embela khuye: "U nga gu keneledwa khu gimwegyo basi. Indra u ya rengisa satshavbo u gu naso, dzitsapawu dzakone u ninga sisiwana, gasi u mane thomba ya ndzadzini. Hwane nya iso delu uta nyi landrela." 22Aholu, mwama, na pwide magana yaya a di garadzega a gu hongola na swihade kholu adiri ni dzithomba nya dzingi. 23Jesu, na va khedziside gwadi vatshavbo, a di embela vapizane vaye khuye: "Gu ngu garadza ngudzu gubela mufumuni wa Nungungulu ava va gu ni dzithomba!" 24Vapizane va di liwuga khu magana yoyo. Aholu Jesu a di engedza gambe khuye: "Vanavangu, gu ngu garadza ngudzu gubela mufumuni wa Nungungulu! 25Gu ngu vbevbuga gu vbulela lidzoke vbatshinganotunu guvbindra gu dzega gitetema gi gu bela mufumuni wa Nungungulu." 26Avo va di liwuga ngudzu. Va wudzisana khu gyawe: "Khu kharato khu mani a na vbulugago?" 27Jesu a di va khedzisa a gu va hakha khuye: "Ga vathu kha si kodzegi, aholu ga Nungungulu si ngu kodzega, kholu, gwaye gimwalo gi si kodzegigo." 28Khavbo avbo, Pedro a di mu embela khuye: "Hi womo avba ethu hi nga diga satshavbo hi gu landrela." 29Jesu a di phindrula khuye: "Khu lisine nyi ngu mi embelani gu kheni: oyu a digago ndranga, vandruye, mayi ni babe ni sanana khu kotani yangu ni Ivhangeli, 30a na bweledzedwa lizana dzinyondro dzindranga, vandruye, vamayi ni vababe, ni sanana gumogo ni sisaniso, na nga guvbanya mafuni momu, gambe ga gikhati gitago a na hakha guvbanya nya gupindruge. 31Vangi va nya guhegula va na hegisela, va nya guhegisa va na thanga." 32Vbakari nya ndzila, na va gu hongola Jerusalema, Jesu a di thanga mbeli vapizane va di samala, va mu landra na va tade khu hwanga. A di rana ava nya likhumi na vavili khu phuvbo, a va embela esi si na gu dugelelago gwaye, khuye: 33"Olu hi ngu gwela, gu hongola Jerusalema, Mwamana wa Muthu a na ningedwa ga vakhongolo nya vaphasi nya mhamba, ni vahevbudzi nya Nayo, va na lamula gu khavo a na songwe, va mu ningela mandzani ga va nya mayigo, 34va na mu vala, va mu hetshela, va mu kwamula khu dzimboma, va hegisa khu gu mu songa. Aholu, khu litshigu nya wuraru a na wuga khu gufani." 35Jakobe ni Johane, sanana sa Zebhedhewu, va di hidzimela ga Jesu va mu embela khavo: "Muhevbudzi, ha gu vbweta gu khethu u hi girela esi hi vbwetago gu gulomba." 36Jesu a di va wudzisa khuye: "Ginani mu vbwetago khenu nyi mi girela?" 37Avo va di mu hakha khavo: "Hi dzumedzise gukhala mufumoni wago, mumbe khu nyamudye, mumbe khu nyambade wago." 38Jesu a di va phindrula khuye: "Negi mu lombago kha mu giti! Ina mu ngu dzi kodzani enu gu sela gikombe nyi na gu selago, ni gu hakha gubhapatisa nyi na gu hakhago, gani?" 39Avo va di hakha khavo: "Ina, hi ngu dzi kodza." Khavbo avbo, Jesu a di khuye: "Gikombe nyi na gu selago, mu na selani, ni gubhapatisa nyi na gu hakhago mu na gu hakhani. 40Aholu, gukhala nyamudye mwendro nyambade gwangu kha si tidwi kheni; iso sa gu lumba vale va hathidwego." 41Na va pwide esi, vale vambe nya likhumi va di sola Jakobe ni Johane. 42Khavbo avbo, Jesu a di va rana a gu va embela khuye: "Kha nga mu dzitigo gwadi, vafumeli nya mayigo va gu ma fuma khu tshivba, ni dzindruna dzakone dza gu vbweta gu tidwa pwani khidzo dzi rumago. 43Gu nga giregi kharato vbakari gwanu. Aholu, oyu a vbwetago gu khala khongolo vbakari gwanu, a na khale githumi gyanu; 44oyu a vbwetago gu khala nya guhegule vbakari gwanu, a na khale khumbi yanu. 45Kholu, Mwamana wa Muthu kha tela guta thumedwa aholu, guta thumela ni gu ningela womi waye gasi gudzegisa va nya gutala." 46Khavbo avbo, va di vboha dhoropani ga Jeriko. Jesu, na gu vbweta gu vbindra ni vapizane vaye, gumogo ni gidzemo nya gingi, mwamana wa Timewu nya gupwani khu Bartimewu, gisiwana nya gikhumu, a di khade bambe nya ndzila na gu lomba zomola. 47Na pwide gu pwani khu Jesu wa Nazareta a vbindrago, a di khusa lito a lomba khuye: "Jesu, mwamana wa Dhavide, nyi pwele wusiwana." 48Nya vangi va di mu kawuka khavo a degule. Aholu, uye a di engedzela gu gulumela khuye: "Mwamana wa Dhavide, nyi pwele wusiwana!" 49Jesu a di ema a ganela khuye: "Mu raneni." Khavbo avbo, va di rana gikhumu va gi embela khavo: "Tiya, khuga u ema, a ngu gu rana." 50Khu vbale, gikhumu gi di rinya hwindzo gifenengelo gyaye gi khuga khu guvbiredza gi hongola ga Jesu. 51Jesu a di mu wudzisa khuye: "Wa gu vbweta gu khuwe nyi gu girela ginani?" Gikhumu gi di hakha khigyo: "Muhevbudzi, nya gu vbweta gu kheni nyi wone!" 52Jesu a di gi embela khuye: "Indra, gukhodwa gwago gu gu vbanyisile." Gikhumu gi di dzegela gu tulega maho gi gu landra Jesu.

will be added

X\