MARKO 1

1Mahungu nya Yadi ya Jesu Kristo, Mwamana wa Nungungulu ma phede, 2kha nga idzo gu lovidwego khidzo khu muphrofeti Isaya, a nga khuye: "Nyi ngu rumela mwango wangu mbeli gwago, owu wu na gu dongiselago ndzila yago. 3Lomo lito li huwelelago mu giwulani, khilo:'Dongiselani ndzila ya Pfhumu, lulamisani sindzilana saye.' " 4Khidzo kharati Johane Mubhapatisi a nga manega giwulani a huwelela gubhapatiswa nya gu dzi sodzise gasi gufela gu pwedwa siwono. 5Va di mu yela vatshavbo va nga bani va gu vbanya tigoni ga Judheya ni dhoropani ga Jerusalema, gasi guya bhapatiswa khuye tsongoni ga Jordhani; na va gu dawulela siwono sawe. 6Johane a di gu ambala dzingandzu nya mawoya nya dzingamiriya, giwununi gwaye a di hunga libhandri nya lidowo; guhodza gwaye a diri dzimbera ni wulombe nya likhabi. 7A di gu huwelela khuye: "Khu hwane gwangu, a nguta uye a gu ni tshivba gu nyi vbindra, eni nyi gu mwalo fanelo nya gunoge nyi tshula dzingodzi nya silato saye. 8Eni nya gu mi bhapatisani khu mati, gasi uye a na ta mi bhapatisa khu Liphuvbo nya gu Age." 9Khu matshigu yale, Jesu a di khuga Nazareta ga Galileya a gu hongola tsongoni wa Jordhani afela gu ya bhapatiswa khu Johane. 10Na gu duga khu matini, Jesu a di wona ndzadzi na yi tulegide, Liphuvbo li di mbaka vbatshani Gwaye kha nga lituva. 11Khu ndzadzini li di pwala lito, li nga khilo: "U Mwamana wangu nya gigodwa ngudzu, monyo wangu wu ngu tsakiswa khuwe." 12Khavbo avbo, Liphuvbo nya gu Age li di mu dzega li gu mu yisa giwulani. 13Iyo a nga ya khalago magumi mana matshigu vbakari nya sirengo nya likhabi na gu lingwa khu Sathane, sirumwa sa Nungungulu si di mu thumela. 14Hwane nya gu na modwe Johane, Jesu adita Galileya gasi guta hevbudza Mahungu Yadi ya Nungungulu, 15khuye: "Ma tadzisegide matshigu, mufumu wa Nungungulu womo vbafuvbi. Vbindrugedzani mavbanyelo, mu khodwe khu Mahungu Yadi nya guvbanyise." 16Na gu gimbila bambe nya yiphwa ya Galileya Jesu a di wona Simoni ni ndriyaye Andreya na va gu thesa dzikhoga kholu va diri vagogi. 17Jesu a di va embela khuye: "Nyi landreni, nyi na mi girani vagogi nya vathu." 18Va di dzegela gu diga dzikhoga va gu mu landra. 19Na gimbide pfhukanyana, a di wona Jakobe ni ndriyaye Johane, sanana sa Zebhedhewu na va gu andza dzikhoga ngalavani. 20A di va rana, avo va di tshiya babe wawe Zebhedhewu ni sithumi ngalavani, va gu mu landra. 21Jesu ni vapizane vaye va di bela dhoropani ga Khafarnawume. Na li vbohide litshigu nya Sabhado, Jesu a di bela nyumbani nya nombelo a phela gu hevbudza. 22Vatshavbo va di liwuga khu sihevbudzo saye, kholu a di hevbudza kha nga muthu moyo a gu ni fanelo nya guhevbudze, nasiri kha nga vahevbudzi nya Nayo. 23Nyumbani mule nya nombelo, a di romo muthu moyo a nga bani ari ni liphuvbo nya guvivbe, li di ganela khu tshivba 24khilo: "Ginani hi nga gu ghohelago, Jesu wa Nazareta, wa gu tela gu ta hi mbembisa? Nyi ngu guti khuwe mani: Khuwe gihathwa gya Nungungulu." 25Jesu a di li kawuka khuye: "Degula, duga ga muthu yoyo." 26Khavbo avbo, liphuvbo nya guvivbe li di mu dzudza khu tshivba, li womba huwa, li gu duga. 27Vatshavbo va di liwuga va gu wudzisana khavo: "Nari ginani egi? Mu ngu wonani gihevbudzo giphya nya gutale khu tshivba! A dzi kodzago gu kawuka maphuvbo nya guvivbe ma gu mu yingisa." 28Ndruma yaye yi di pwala tigoni gwatshavbo ga Galileya. 29Na dugide khu nyumbani nya nombelo, a di hongola ndrangani ga Simoni ni Andreya, nari ni Jakobe ni Johane. 30Va diya mana ngogadzi wa Simoni vbadawutunu na gu dwala, va tivisa Jesu. 31Na mu yede, adiya mu phara khu libogo a gu mu wusa. Khavbo avbo, feveri yi di dzegela gu vbindra, a gu wuga a va sayisa. 32Na lipfode lidambo, va di mu yisela vadwali vatshavbo ni va nya maphuvbo nya guvivbe. 33Vathu vatshavbo va dhoropani va diya tombana mwanyani nya ndranga yile. 34A di hawulugisa vathu nya vangi madwali yawe nya guhambane-hambane, a gu tutumisa maphuvbo nya mangi nya guvivbe, a si ma dzumedzisi gu ganela, kholu ayo ma di gu muti khayo khuye mani. 35Ni mamba gugya, a di khuga a gu hongola giwulani, gasi guya gira nombelo. 36Simoni ni ava a nga bani ari navo, va di gimbila va mu vbweta. 37Na va mu mane, va di mu embela khavo: "Vathu vatshavbo va ngu gu vbweta." 38Aholu, uye a di va hakha khuye: "Hongoleni mambe malanga, mu dzindranganani dza vbafuvbyana momu, gasi guya hevbudza gambe Ivhangeli, kholu khiso nyi nga si tela." 39A di gimbila tigoni gwatshavbo ga Galileya, na gu hevbudza Ivhangeli dzinyumbani gwawe nya nombelo, ni gu tutumisa maphuvbo nya guvivbe. 40Mudwali moyo nya sokono a di mu yela a ya mu khidzimela, a gu mu lomba khuye: "Pfhumu, wa gu dzina nyi hawulugise." 41Jesu a di mu pwela wusiwana a mu handzega mandza, a mu embela khuye: "Nyi ngu dzina. Hawuluga." 42Mudwali wule a di dzegela gu hawuluga. 43Khavbo avbo, Jesu a di mu laya khu gigurumedza a gu mu diga a hongola na gu khuye: 44"U nga embeli muthu esi nyi gu giredego, aholu indra dzi yeyedza ga muphasi nya mhamba gasi afela gu ningela, khu gu agiswa gwago, esi si rumwago khu Nayo wa Mosi, gasi gu khala wufakazi vbakari gwawe." 45Aholu, uye, me ni gu khuga khu vbale, a di huwelela ni litigo latshavbo esi si nga giregago gwaye. Khu kharato, Jesu kha nga dzi kodza gubela madhoropani, a di khala mu siwulani. Ambari ulo, vathu va di hongola gwaye na va guta khu malangani yatshavbo.

will be added

X\