LUKA 9

1Jesu a di tshanganisa vale nya likhumi na vavili, a va ninga tshivba nya guduse maphuvbo yatshavbo nya guvivbe ni gu hawulugisa vadwali. 2Khavbo avbo, a di va ruma gu gimbila va tivisa mufumu wa Nungungulu ni gu hawulugisa vadwali. 3A di va ninga sileletelo khuye: "Mu nga dongi gilo, nya nga ndronga, kwama, dzimbuva, dzitsapawu, guambala. 4Ndrangani mu na gu belago khalani avbo kala mu khuga tigoni momo. 5Gasi vale va na gumba mi hakha, gikhati mu dugago tigoni gwawe, phuphuthani kudzudzwane migondroni gwanu, kha nga wufakazi vbakari gwawe." 6Khavbo avbo, vapizane va di phara dzindzila, va gu gimbila va hevbudza Mahungu nyaYadi khu ndranga ni ndranga ni gu hawulugisa vadwali malangani yatshavbo. 7Mufumeli Herodhi, wa Galileya, na pwide satshavbo si nga bani si dugelela, a di hamuga ni gilo nya gugire, kholu vambe va digu khavo: khu Johane Mubhapatisi a nga wugago khu ga vafudego! 8Vambe, khavo khu Eliya a nga wuyago; gasi vambe va di gu tiyisa gu khavo: moyo nya vaprofeti va gale a nga wugago. 9Aholu, Herodhi a di khuye: "A gu bani ari Johane Mubhapatisi, uyoyo nyi rumide gu a pidwe ngolo. Ahati oyu a gu pwani a ngu gira satshavbo sesi, khu mani?" Herodhi a di vbweta gu mu wona. 10Na va wide, vapostoli va dita tshamusela ga Jesu satshavbo iso va nga gimbila va gu gira. Khavbo avbo, a di va dzega a gu hongola navo giwulani, kha guya Bhetisayida. 11Gidzemo na gi tugude, gi di mu landra. Jesu a di gi hakha, a gu gi hevbudza mahungu nya mufumu wa Nungungulu. Gumogo ni gu hawulugisa vadwali. 12Kha nga ulo li nga bani gu liphela gupfola, vapostoli va diya ga Jesu vaya khavo: "Diga vathu va hongole, gasi va kodze gu gimbila va renga gilogyo nya guhodze mitalalani ni dzindrangani dza vbafuvbyana momu, gumogo ni gu mana wulanga nya gulale, kholu avba hi gomo mu giwulani." 13Jesu a di va hakha, khuye: "Va ningeni kamwe enu guhodza!" Gasi avo va di khavo: "Avba livbandre sibaba ni dzindzandzi dzimbili basi hi gu nadzo. Ginani gyogyo ha gu pima khu vathu vava. Mwendro hi naya renga guhodza gu ninganago gu va hodzisa vatshavbo!" 14Va di ganela kharati kholu va di romo gipimo nya livbandre magumi mazana nya vama. Khavbo avbo, Jesu a di embela vapizane, khuye: "Rumani vathu va khale khu sikwata nya livbandre magumi." 15Va di gira iso va nga rumwa khu Jesu, va gu khadzisa vathu vbavbatshi. 16Khavbo avbo, Jesu a di dzega sibaba sile nya livbandre ni dzindzandzi dza dzimbili, a gu khusedza maho a khedza vbatshani, gumogo ni gu bonga Nungungulu khu guhodza gule. Khu vbale, a di si pilela, a ninga vapizane va kabanisela gidzemo. 17Vatshavbo va di hodza, va gu tshiya; bwelo khavbo va gu tadza likhumi na sivili situndru khu sipandre si nga tshalago. 18Tshigu mwedo, Jesu nari vbakari nya nombelo ni vapizane vaye basi, a di va wudzisa, khuye: "Vathu vari khavo kheni mani?" 19Va di mu hakha, khavo: "Vomo va gukhavo khuwe Johane Mubhapatisi, vambe vari khavo khuwe Eliya, gasi vambe vari khavo u moyo nya vaprofeti va gale a nga wugago." 20Jesu a di khuye: "Ahati enu, mwari khenu kheni mani?" Pedro a di khusa lito, khuye: "Khuwe Kristo, u nga rumedwa khu Nungungulu." 21Khavbo avbo, Jesu a di va laya gu vasi embeli muthu. 22A di engedza gambe, khuye: "Mwamana wa Muthu a na ni fanelo nya gu saniseke ngudzu ni gu nyenywa khu madhota, ni vakhongolo nya vaphasi ni vahevbudzi nya Nayo. Ana songwa, aholu khu litshigu nya wuraru a na wuga." 23Khavbo avbo, a di embela vatshavbo, khuye: "Uye a vbwetago gu nyi landrela, a na dzi nyenye uye wurumba waye, a vbagara gihambano gyaye a nyi landre. 24Kholu uye a vbwetago gu vbanyisa womi waye, a na wu luza; gasi uye a luzago womi waye khu kotani yangu, a na wu vbanyisa. 25Giphaso muni a na gu gi manago wule a fumelago litigo rumba, a gu hegisa khu gu mbemba ni hungo waye, mwendro saye gu dzi dzimedza? 26Kholu, uye a na khalago dzitshoni ku kotani yangu mwendro khu kota nya mahungu yangu, Mwamana wa Muthu a na mu khalela nuye dzitshoni litshigu anatago na tade khu gidhumo gyaye ni gya Babe, nigyo nya sihathwa nya guage! 27"Nyi ngu mi embelani, khu lisine, kheni: vbakari gwanu vomo gu linga lufu, kala va wona mufumu wa Nungungulu." 28Na gu vbindride gipimo nya livbandre na mararu matshigu hwane nya gu Jesu na ganede esi, a di dzega Pedro, Johane ni Jakobe a gwela navo gigomoni, gasi guya khozela. 29Vbakari nya nombelo, khovbe yaye yi di vbindrugedza; dzingandzu dzaye dzi di aga ngudzu, dzi ngangamela. 30Va di tumbuluga vama vavili va nga bani va bhula naye: adiri Mosi ni Eliya. 31Ava, na va tade khu gidhumo, va digu ganela khu gufa gwaye gu nga bani gu vbweta gu dugelela Jerusalema. 32Pedro ni vangana vaye va di wongomedwa khu ligovbe. Aholu, na va khendzugide, va di wona gungangamela ga Jesu ni madhota yale ya mavili ma nga bani mari naye. 33Gikhati ma nga vbweta gu hongola madhota yale, Pedro a di embele Jesu, khuye: "Muhevbudzi, gwadi gu hi khale avba! Hi na gira mitshatsha miraru: moyo wago, mumbe wa Mosi, mumbe wa Eliya." Uye kha nga gi ti ni gilo a nga bani a gu ganela. 34Na nga gu ganela, li dita lipfhi li ngata va fenengedza. Na va bede ndrani nya lipfhi, va di khala hwanga. 35Khu vbakari nya lipfhi li di pwala lito li nga khilo: "Oyu khu Mwamana wangu nya gu mu haladze. Mu yingiseni." 36Hwane nya lito lile, Jesu a di tshala enga. Vapizane va di degula naso, vasi embeli muthu matshiguni yale. 37Gandra ni dzimindru, na va gu tshiga khu gigomoni, a di khingwa khu gidzemo nya gingi. 38Vbakari gwawe a di duga mwama a nga khusedza lito, a lomba na gulumela, khuye: "Muhevbudzi, nyi ngu gu lomba gu uta wona mwamana wangu, a gu uye wa moyo basi nyi gu naye. 39A na ni liphuvbo nya guvivbe. La gu mu dugela, la gu mu dzudza khu tshivba ni tshivba, li mu thesa vbavbatshi na gu ndrendremela gumogo ni gu womba dzihuwa ni gu pupuma liguvi khu kanani. Hwane nya gu mu khuyusele sivbango khavbo li mu digago. 40Nyi di lomba vapizane vago gu li tutumisa, aholu kha va li kodza." 41Jesu a di mu hakha, khuye: "Mela nya vathu nyamba khodwa, mu si gi tigo nigyo mu girago! Nyi na khala nanu kala lini? Nyi na timisela mavbanyelo yanu kala lini?" Khavbo avbo, a di embela babe wule, khuye: "Mu rese eno." 42Na gi hidzimela ga Jesu, gikhwathana gi di dugedwa khu liphuvbo nya guvivbe, li nga gi dzudza khu tshivba ni tshivba, li gi thesa vbavbatshi. Aholu Jesu a di li kawuka, a gu hawulugisa gikhwathana, a gi ningela ga babe waye. 43Vatshavbo vathu va di liwuga khu gu wona tshivba nya yikhongolo ya Nungungulu.Kha nga ulo vatshavbo va nga bani va liwuga khiso a nga gira, Jesu a di embela vapizane vaye, khuye: 44"Yingisani gwadi iso nyi vbwetago gu mi embela: Mwamana wa Muthu a ngu vbweta gu ningedwa ga va nya mayigo." 45Aholu avo kha va nga dziti khavo a gu vbweta khuye ginani, kholu adiri sihalo gwawe.Ambari ulo kha va mu wudzisa, kholu vadigu mu thava. 46Tshigu mwedo vapizane va di ganedzisana, khu gu vbweta guti khu mani a gu khongolo vbakari gwawe. 47Jesu, na tugude mapimo yawe, a di dzega gyanana, a gi emisa vbakari gwawe, khuye: 48"Muthu watshavbo a na hakhago gyanana nya nga egi khu lina langu, kheni a nyi hakhago. Gasi uye a nyi hakhago, a gu hakha wule a nga nyi rumelago. Kholu wule a dzi sodzisago ngudzu vbakari gwanu, uyoyo khuye a gu khongolo." 49Johane a di khusa lito, khuye: "Muhevbudzi, womo hi nga mu manago na gu tutumisa maphuvbo nya guvivbe khu lina lago, hi mu himbedzela, kholu kha gimbili ni ethu." 50Aholu Jesu a di khuye: "Mu nga mu himbedzeli, kholu uye a si mi wugeligo khwana gyanu." 51Kha nga ulo ma nga bani ma gu vboha matshigu yaye nya gurure tigoni momu, Jesu a di hunga monyo a gu hongola Jerusalema. 52A di thangisa myango yi hongola talalani nya gukari wa tigoni ga Vasamariya, gasi guya mu dongisela wulanga nya guhefemule. 53Aholu vamune tigo kha va mu hakha kholu khovbe yaye yi di nonedza guhongola Jerusalema avbo. 54Khavbo avbo, vapizane va Jesu, Jakobe ni Johane, na va wonide esi, va di khavo: "Pfhumu, u ngu dzina gu khuwe hi ranise nilo wa ndzadzini gasi vata dagarela, gani?" 55Aholu Jesu a di va kawuka. 56Va di vbindra vaya ga wumbe talala. 57Na varomo vbakari nya ndzila, gu di manega moyo a nga khuye: "Nyi na gu landrela ni hayini avbo una gu hongolago." 58Jesu a di mu hakha, khuye: "Migehe yi na ni mavbala yawe; sinyoni si na ni sihaga sawe. Aholu Mwamana wa Muthu mwalo avbo nya gukhihimele hungo waye." 59Aholu a di embela mumbe, khuye: "Nyi landre." Oyu a di hakha, khuye: "Pfhumu, nyi dige guphela nyiya dzinga babe wangu." 60Jesu a di mu embela khuye: "Va dige vafi va dzingane khu gyawe. Gasi uwe indra u gimbila u tivisa mufumu wa Nungungulu." 61A di manega mumbe a nga khuye: "Pfhumu, eni nya gu vbweta gu gu landrela neni, aholu nyi dige guphela nyiya vbangana gaya." 62Jesu a di mu hakha, khuye: "Watshavbo uye a pharago liphadza, bwelo khavbo a khedza hwane, kha yedwi khu mufumu wa Nungungulu."


Copyright
Learn More

will be added

X\