LUKA 8

1Khavbo avbo, a di gimbila khu madhoropani ni dzindrangani, a gimbila a hevbudza Mahungu yadi nya mufumu wa Nungungulu, nari ni vapostoli vaye nya likhumi na vavili, 2vadiri naye vanyamayi vale a nga va vbanyisago khu gu va tutumisela maphuvbo nya guvivbe ni gu va hawulugisa dzingumbe nya gutale. Adiri avo: Mariya Madalene, a nga mu dusela livbandre na mavili maphuvbo nya guvivbe, 3Joana, ngadza Kuza, muthangeli nya madhota ya Herodhi; Suzana, ni vambe nya gutale, va nga bani va gu phasa Jesu ni vapizane vaye khu silo sawe. 4Vathu nya vangi va dita khu madhoropani yatshavbo va ta vbweta Jesu. Na wonide nya gukhuye randredwe khu gidzemo nya gingi, a di khusa lito, a gu ganela khu gipimaniso, khuye: 5"Nga wonani. A di khuga muthu nya gukari gasi guya yala mbewu yaye. Gikhati a nga yi swaya, yimbe yi di thegela bambe nya ndzila; yi gandredzedwa, gumogo ni gu rothedwa khu sinyoni sa ndzadzini. 6Yimbe yi di thegela siwindrini; hwane nya gu bani yi bugide, yi di banga khu gu hamuga thomwa. 7Yimbe yi di thegela mibani; na yi dandride gumogo nayo, yi di padwa khu miba. 8Gasi yimbe yi di thegela wulimeni nya wadi; na yi bugide, mbewu ni mbewu yidi thela lizana dzimbewu." Khavbo avbo, a di khuye: "Uye a gu ni dzindzeve nya guyingise, a na pwe!" 9Vapizane va Jesu va di mu wudzisa tshamuselo nya gipimaniso gile. 10Jesu a di va embela, khuye: "Ga enu, Nungungulu a ngu tivisa misihalo nya mufumu waye; gasi ga vambe, a gu ganela khu sipimaniso, gufela gu khuye va ronoge, aholu vasi woni; vapwe aholu vasi si pimi. 11"Tshamuselo nya gipimaniso khowu: Mbewu khu magana ya Nungungulu. 12Mbewu yi nga thegela bambe nya ndzila khu vale va nga pwago Mahungu ya Nungungulu, aholu Sathane ata ma wandra myonyoni gwawe, gasi va si khodwi, vasi mani guvbanyiswa. 13Mbewu yi nga thegela siwindrini, khu vale nya gu, na va pwide Mahungu ya Nungungulu va gu ma hakha khu gunengela. Kha nga ulo va gu mwalo mikhamba, va gu khodwa gikhati gidugwana; aholu sa gu vboha silingo, va gu ma diga. 14Mbewu yi nga thegela mibani khu vale nya gu, na va pwide mahungo ya Nungungulu va hegisa khu gu ma diga ma padwa khu sigaradzo nya guvbanye, khu dzithomba ni sihungato nya mafu. Iso si girago gu va si theli mihandro. 15Yile yi nga thegela wulimeni nya wadi khu vale nya gu, na va ma pwide, va ma hakha khu monyo nya wadi nya gululame, va ma vegedza nyamba rereka kala va gu thela mihandro. 16"Mwalo a rothago kandriya a yi fenengedza khu gitundru, mwendro gu yi vega khwitshini. Aholu yo vegwa wulanga yi dzi kodzago gu wenengedza vatshavbo ava va belago nyumbani. 17Kholu, gimwalo gi sihadego gi na gu ne guwonegiswa; kha nga gambe, mwalo sihalo a na gu ne gu tugudwa. 18Yingisani gwadi iso nyi mi embelago: uye a gu naso a na engedzedwa; gasi uye a gu mwalo gilo, ni esi nya sidugwana a gu naso, a na dzegedwa." 19Mayi wa Jesu ni vandriyaye va di mu yela, aholu kha va dzi kodza guvboha vbafuvbi gwaye khu gu tala nya vathu. 20Va di mu embela, khavo: "Mayi wago ni vandriyago vomo vbavbandze; va gu vbweta gu gu wona." 21Uye a di va hakha, khuye: "Mayi wangu ni vandriyangu khu vale va pwago magana ya Nungungulu, va ma landrisa." 22Tshigu mwedo, Jesu a di bela ngalavani ni vapizane vaye, a gu va embela, khuye: "Hongoleni tshatugo." Va di tshula ngalava va gu hongola. 23Na varomo vbakari nya mati, Jesu a di lala. Yi di duga phuvbo nya yikhongolo; ngalava yi di tala khu mati, yi gu vbweta gu dzama. 24Va diya mu wusa, va Mu embela, khavo: "Muhevbudzi, hi ngu mbemba!" Uye, na wugide, a di kawuka phuvbo ni mavimbi, si gu renga; ma di manega malenga nya makhongolo. 25Khavbo avbo, a di va embela, khuye: "Gomo hayi gukhodwa gwanu?" Na va tade khu hwanga ni guliwuga, va di wudzisana, khavo: "Gasi khu mani oyu nya gu ambari phuvbo ni yiphwa si mu yingela?" 26Va diya tshegema tigoni ga Vagerazi, vbingano ni Galileya. 27Na dugide khu ngalavani, Jesu a di khingwa khu mwama moyo a nga bani a guta khu dhoropani. Mwama yoyo adiri ni maphuvbo nya mangi nya guvivbe. Adiri gale a nga bani a gu khala nyamba ambala gilo a di si khali ndrangani, a di vbanyela marowoni. 28Na wonide Jesu, a di dzi thesa migondroni gwaye, na gu gulumela khu tshivba khuye: "Ginani nyi nga gu ghohela, Jesu, Mwamana wa Nungungulu a khusegidego ngudzu? Nya gu lomba gu kheni u nga nyi sanisi." 29A di ganela kharati, kholu Jesu a di vbweta gu tutumisa liphuvbo nya guvivbe gasi li mu dige; kholu ilo li di gu mu sanisa dzinyondro dzingi. A digu hungwa khu makhetshe ni gu thedwa maphili mawogo ni mawundru, aholu a di kavila ni gu pandra satshavbo, a gu pepudwa khu liphuvbo lile aya giwulani. 30Jesu a di mu wudzisa, khuye: "Khuwe mani, lina lago?" Mwama a di hakha, khuye: "Kheni lidhuma." A di hakha kharati, kholu maphuvbo nya mangi a nga bani ari nawo. 31Maphuvbo ma di mu lomba gu a si ma dzudzugi phalani nya guthise. 32Dzi di romo vbafuvbyana vbale dzikhumba nya dzingi dzi nga bani dzi gu haviswa gigomoni. Maphuvbo ma di lomba ga Jesu gu a ma dzumedzise guya bela dzikhumbani. Uye a di ma dzumedzisa. 33Khavbo avbo, ma di duga ga muthu wule, ma gu ya bela mu dzikhumbani. Dzikhumba dzi di tutuma dziya bela nondrwani, dzi gu mbemba dzatshavbo. 34Vahavisi vakone, na va wonide esi, va di thava, vaya bika mahungu yaya madhoropani ni dzindrangani. 35Va di hongola vathu, gasi guya wona iso si nga si dugelelago. Na va vbohide avbo a nga bani aromo Jesu, va diya wona wule a nga bani ari ni maphuvbo nya mandriki, na khade migondroni gwaye, na ambade dzingandzu dzaye, nari ni mapimo yaye yatshavbo, va di khala hwanga. 36Avo va nga si wonago va di va embela idzo a nga vbanyiswago khidzo madwali mwama wule. 37Vathu vatshavbo va tigoni ga Gerazi, va di lomba ga Jesu gu a khuge tigoni gwawe, kholu va di tade khu hwanga. Jesu a di bela ngalavani a gu khuga khu vbale. 38Muthu wule a nga duswago maphuvbo nya guvivbe a di mu lomba gu hongola naye, aholu Jesu a di mu embela, khuye: 39"Indra gaya gwago uya tivisa valongo vatshavbo iso Nungungulu a nga gu girelago." Uye a di hongola a gimbila a ganela dhoropani gwatshavbo iso a nga giredwa khu Jesu. 40Gikhati a nga wuyago, Jesu a di hakhwa khu litsako, kholu gidzemo gyatshavbo gi di gu mu lindrela. 41A di tedwa khu mwama moyo nya gupwani khu Jayiro, a nga bani ari muthangeli nya nyumba nya nombelo. A di dzi thesa migondroni ga Jesu a gu mu lomba gu a hongole ndrangani gwaye, 42kholu adiri ni nyamahegyane wa moyo, nya likhumi na mivili myaga, a nga bani a gu dwala nya gu hadza gufa. Vbakari nya ndzila, kha nga olu vathu va nga bani vari vangi, Jesu a di gundrwa maphuvbo yatshavbo. 43Vbakari gwawe a di romo nyamayi moyo a nga bani ari ni madwali nya gudugele novba. Giride gipimo nya likhumi na mivili myaga, na gu phalalegisela thomba yaye yatshavbo dzin'yangani, nyamba mana ni mweyo nya gu mu vbanyise. 44A di hidzimela khu hwane gwa Jesu, aya mu khuha tshoka nya libhadzi laye. Khavbo avbo, a di dzegela gu hawuluga, novba wu gu hegisa gu duga. 45Jesu a di wudzisa, khuye: "Khu mani a nga nyi khuha?" Kha nga ulo vatshavbo va nga ganedzago. Pedro a di khuye: "Muhevbudzi, vathu va gu gundrago ni gu gu rindrividza maphuvbo yatshavbo." 46Aholu Jesu a di engedza gambe, khuye: "Womo a nyi khuhidego, kholu nyi ngupwa nya gukheni yi dugide tshivba khavbo gwangu." 47Nyamayi wule na wonide nya gukhuye tugudwe, a di hidzimela, na gu ndrendremela. Na dzi theside migondroni gwaye, a di ganela na gu pwidwa khu vathu vatshavbo, iso si nga mu gira gu a khuhe Jesu, nidzo a nga dzegela gu hawuluga khidzo. 48Jesu a di mu embela, khuye: "Mwanangu, gukhodwa gwago gu gu vbanyiside; indra khu gurula." 49Na nga gu ganela, wu di vboha mwango khu ndrangani ga muthangeli nya nyumba nya nombelo, wuta khuwo: "Mwanago fude; u nga garadzi gambe Muhevbudzi." 50Aholu Jesu, na pwide satshavbo, a di mu embela, khuye: "U nga thavi, khodwa basi; mwanago a na vbanya." 51Na vbohide ndrangani kha dzumedzisa gu bela nyumbani vambe vathu, vbavbandze ga Pedro, Johane ni Jakobe, ni vavelegi va gyanana. 52Vatshavbo va di gu lila khu gupwa gisiro. Aholu Jesu a di va embela, khuye: "Mu nga lili, kholu gyanana kha gyafa, gi di lala." 53Kha nga ulo va nga bani va gu dziti nya gukhavo gyanana gi fude khu lisine, va di mu hega. 54Gasi uye, na gi pharide khu libogo, a di gi rana khu tshivba, khuye: "Nyamahegyane, wuga." 55Hefemulo waye wu di wuya, a gu dzegela gu wuga, a khuga a ema. Jesu a di va ruma gu mu ninga guhodza. 56Vavelegi vakone va di tsaka ngudzu. Aholu Jesu a di va laya gu va si embeli muthu esi si nga dugelelago.

will be added

X\