LUKA 6

1Tshigu mwedo nya Sabhado, Jesu a di vbindra khu thembweni nya mavbila. Vapizane va di vbulula madugwana, va tshigira mandzani, va hodza. 2Vafarisi nya gukari va di khavo: "Khu ginani mu girago iso si himbedzedwago khu litshigu nya Sabhado?" 3Jesu a di va phindrula, khuye: "Mu si gu hevbuli iso a nga girago Dhavide, gikhati a nga pwago ndzala uye, ni avo a nga bani ari navo, gani? 4Idzo a nga belago khidzo Nyumbani ga Nungungulu, gikhati gya muphasi nya khongolo, Abhiyatari, aya hodza sibaba nya miphaso, a ninga ni ava a nga bani ari navo, sibaba si nga bani si gu lumba gu hodzwa basi khu vaphasi, gani?" 5A di engedza gambe, khuye: "Mwamana wa Muthu a ngu fuma Sabhado yinene." 6Khu yimbe Sabhado a di bela nyumbani nya nombelo, a gu phela gu hevbudza. A di romo vbale muthu a nga bani a limade libogo. 7Vahevbudzi nya Nayo ni Vafarisi va di khusa maho va mu khedza, gasi gu mu wona mwendro a na mu hawulugisa khu Sabhado, vafela gu mana igyo nya gu mu mole khigyo. 8Na wonide mahingigedzo yawe, Jesu a di embela uye a nga bani a limade libogo, khuye: "Nga ema vbakari vbale." A diya ema. 9Khavbo avbo, Jesu a di khuye: "Olu nya guvbweta gu mi wudzisani: Ginani gi yelago gu girwa khu Sabhado gu gira nya sadi, mwendro nyamba sadi? Guvbanyisa muthu, mwendro gu mu diga afa?" 10Uye, a di khedzisa gwadi vatshavbo va nga bani va mu randrede, agu embela mudwali, khuye: "Nga thawuludza libogo." Na li thawuludzide, li di hawuluga. 11Avo va di swireka khu Jesu va gu wudzisana, khavo: "Ginani hi na mu girago?" 12Khu matshigu yale, Jesu a di gwela mu gigomoni, gasi guya gira nombelo. A di pilekelana wutshigu watshavbo na gu lombelela ga Nungungulu. 13Na gugide, a di rana vapizane, gasi gu hatha, vbakari gwawe, likhumi na vavili, avo a nga va ranago vapostoli: 14Simoni a nga mu thangisago lina la Pedro, ni ndriyaye Andreya, Jakobe, Johane, Filipi ni Bhartolomewu; 15Matewu ni Tomasi; Jakobe, mwamana wa Alifewu, ni Simioni, a ranwago Mupinyameli; 16Judha, mwamana wa Jakobe, ni Judha Sikarioti, a gu uye a nga mu ningelago. 17Jesu a di relela ni vapostoli a gu ema panini, avbo a nga mananago ni vapizane nya vangi ni gidzemo nya gingi nya vathu va nga bani va dugela Judheya gwatshavbo, ni Jerusalema, ni khoga yatshavbo ya Tiro ni Sidhoniya, 18va nga bani va dzude guta mupwa ni gu hawulugiswa madwali yawe, ni avo va nga bani vari ni maphuvbo nya guvivbe va di vbanyiswa. 19Vathu vatshavbo va di vbweta gu mu khuha, kholu yi di gu duga khu mu givilini gyaye tshivba yi nga bani yi gu hawulugisa vatshavbo. 20Na khuside maho a khedza vapizane vaye a di khuye: "Mu kategide enu, sisiwana;kholu khwanu mufumu wa Nungungulu. 21Mu kategide enu, mu gu ni ndzala olu;kholu mu na khuriswa.Mu kategide enu, mu lilago olu;kholu mu na hegela. 22"Mu kategide mwa gu vengwa khu vathu, va mi tutumisa, va mi vala ni gu nyenya lina lanu khwatshi li di nyenyeza, khu kotani ya Mwamana wa Muthu. 23Tsakani ni gu ghiya litshigu lolo, kholu tshatshazelo yanu yi na bani yiri yikhongolo ndzadzini. Khidzo kharati vababe vawe va nga bani va gu sanisa vaprofeti. 24Aholu, libango lanu, enu sitetema;kholu mu hakhide tshatshazelo yanu; 25Libango lanu enu mu khuridego olu;kholu mu na khala ni ndzala. Libango lanu enu mu hegelago olu,kholu mu na womba dzihuwa ni gu lila. 26"Libango lanu mwa gu zundzwa khu litigo latshavbo. Khidzo kharati vababe vawe va nga bani va gu vbanyisa idzo ni vaprofeti nya malipha. 27"Enu mu nyi yingisago, nyi ngu mi embelani, kheni: Golani valala vanu, girelani gutshamba vale va mi vengago. 28Kategisani ava va mi valago, lombelelani ava va mi singedzago. 29Wa gu vetwa khu pama gihaya gimwegyo, ningedzela gimbe gihaya; uye a gu dzegelago libhadzi, mu dige a dzega gambe ni ngandzu. 30Uye a gu lombago mu ninge; uye a gu dzegelago silo sago u nga mu wudzisi gambe. 31Iso mu golago khenu va mi girele, va gireleni nenu. 32"Mwagu gola ava va mi golago basi, tshatshazelo muni mu yi lindrelago? Kholu vawoni navo va ngu gola vale va va golago. 33Mwa gu girela nya sadi basi vale va mi girelago gutshamba, tshatshazelo muni mu yi lindrelago? Kholu vawoni navo va ngu gira kharato. 34Mwa gu fiyarisa basi ga vale mu va thembago khenu va na mi livba, tshatshazelo muni mu yi lindrelago? Kholu vawoni navo va ngu fiyarisa ga vawoni vakwawe, na va gu themba gu livbwa. 35Gasi enu, golani valala vanu, girani esi si gu sadi; lombisani, na mu si lindreli gu livbwa. Mwa gu gira kharato, tshatshazelo yanu yi na bani yiri yikhongolo. Gambe, mu na bani muri sanana sa Wule a khusegidego ngudzu, kholu uye khwadi ambari ga vale va si gu vadi, va si mu bongigo. 36Girelani wuhindzi vakwanu kha nga Babe wanu a gu ni wuhindzi. 37"Mu nga lamuli, gasi mu si lamudwi nenu khu Nungungulu. Mu nga ningi nandru muthu, gasi mu si ningwi nenu nandru khu Nungungulu. Tsetselelani, mu na tsetseledwa nenu khu Nungungulu. 38Ningani, mu na ningwani nenu khu Nungungulu; mu na ningwa gipimo nya gyadi, nya gutale, gi gonyeledwa, bwelo khavbo gi phathamela. Kholu Nungungulu a na mi pimela khu gipimo mu na pimago khigyo vakwanu." 39A di va embela gambe gipimaniso gegi: "Ina gi ngu dzi kodza gikhumu gu phara kunga gikhumu gikwawe, gani? Kha si na thegela phalani sa sivili gani? 40Mwalo mupizane a vbindrago muhevbudzi waye; aholu, mupizane a vbeledego a na ningana ni muhevbudzi waye. 41Khu ginani u khedzago gitoti gi guromo lisoni ga ndriyago, u si khedzi vhambala wu guromo lisoni gwago? 42Una dzi kodza kharini gu embela ndriyago, khuwe: 'Wandruye, nga hidzimela nyi gu dusa gitoti gi guromo lisoni gwago,' uwe u si wonigo vhambala guromo lisoni gwago? Nya maliphawe, dusa gu phela vhambala lisoni gwago, khavbo una dzi kodzago gu dusa gitoti lisoni ga ndriyago. 43"Mwalo simbo nya wadi wu ningago mihandro nyamba yadi, kha nga gambe a gu mwalo simbo nyamba wadi wu ningago mihandro nya yadi. 44Simbo ni simbo wa gu tidwa khu mihandro yaye; kholu, kha gu hawi maguyu sikakaradzani, mwendro saye dziuvha mu sigangarabwani. 45Muthu nya wadi a gu dusa khu monyoni gwaye nya guhandzege silo nya sadi; gasi uye a si gu wadi a gu dusa khu monyoni gwaye nya guvivbe silo nyamba sadi; kholu likana la gu dusa iso si tadego monyoni. 46"Khu ginani mu nyi ranago: 'Pfhumu, Pfhumu,' mu si giri iso nyi mi embelago? 47Nyi na mi yeyedzani uye a fanago naye muthu wule a tago gwangu, ata pwa magana yangu, bwelo khavbo a ma landrisa. 48A ngu fana ni muthu a nga vbahago nyumba, a phela khu gu kemba gwadi, a reledza ngudzu, gasi gu tadza khokhweni. Na vbohide talo nya mati, yi di taledwa nyumba yile, yi vetwa khu mati khu tshivba ni tshivba, aholu kha ya thega, kholu yi vbahidwe gwadi. 49Gasi muthu a pwago magana yangu a si ma theli kota, a ngu fana ni muthu a nga vbaha nyumba yaye mu lipfuleni, a si pheli khu gu kela a tadza khokhweni. Na vbohide talo nya mati yita vetwa khu mati khu tshivba ni tshivba, yi di dzegela gu pfhungumuga wufendretiri."

will be added

X\