LUKA 5

1Jesu, na romo siwoni nya yiphwa ya Jenezare, vbakari nya vathu va nga bani va gu mu gundra, gasi gu pwa mahungu ya Nungungulu, 2a di wona dzingalava dzimbili dzi nga bani dzi tshegemide siwoni, vagogi vakone na va tshigide va ya andza dzikhoga. 3A di bela ngalavani, yi nga bani yi gu lumba Simoni. Khavbo avbo, a di mu ruma gu yi hidzimisa matini. Uye, khu ngalavani, a di hevbudza gidzemo. 4Na vbedzide gu ganela, a di embela Simoni, khuye: "Hidzimisani ngalava nondrwani, mu thesa dzikhoga dzanu." 5Simoni a di hakha, khuye: "Muhevbudzi, hi gogide wutshigu watshavbo, kha ha mana gilo; aholu kha nga ulo u rumago, nyi na thesa dzikhoga." 6Va di dzi thesa, va goga dzindzandzi nya dzingi kamwe ngudzu, nya gu ni dzikhoga dzi di hadza gu pferuga. 7Va di khweneta vangana vawe va nga bani varomo ga yimbe ngalava, gasi guta va phasa. Va dita tadza navo ngalava yawe. Dza dzimbili dzidi vbweta gu rika khu gu tala. 8Na wonide esi, Simoni Pedro a di dzi thesa migondroni ga Jesu, khuye: "Leya uya hwindzo gwangu, Pfhumu, kholu nyi gighoni!" 9Simoni ni vatshavbo avo a nga bani ari navo va di tala khu gu liwuga, khu kotani nya dzindzandzi nya dzingi va nga molago; 10ni vangana vaye, Jakobe ni Johane sanana sa Zebhedhewu, va di liwuga navo. Khavbo avbo, Jesu a di embela Simoni, khuye: "U nga thavi; gukhugela muhuno u na bani uri mugogi nya vathu." 11Va di dusa dzingalava vbavbandze, va diga satshavbo va gu mu landra. 12Jesu na romo dhoropani nya gukari a dita muthu moyo a nga bani a gu dwala khu sokono. Uye, na wonide Jesu, a di dzi thesa migondroni gwaye, a mu lomba, khuye: "Pfhumu, wa gu dzina, nyi hawulugise." 13Jesu a di mu handzega mandza, na gu khuye: "Nyi ngu dzina, hawuluga." Khavbo, mudwali a di dzegela gu hawuluga. 14A di mu laya gu a si embeli muthu, bwelo khavbo a mu embela, khuye: "Indra dzi yeyedza ga muphasi, gasi uye a ningele, khu guagiswa gwago, iso si rumwago khu Mosi, gasi gu khala nari wufakazi vbakari nya vathu." 15Ndruma yaye yi di phalalega ni litigo, vathu nya vangi va di ya mu randrela, gasi gupwa sihevbudzo saye ni gu hawulugiswa madwali yawe. 16Aholu uye a di thava a gu hongola giwulani, aya gira nombelo. 17Tshigu mwedo, Jesu, a di gu hevbudza, vbakari nya vathu va nga bani va mu yingisa. Va di romo navo vafarisi ni vahevbudzi nya Nayo va nga tago khu Galileya, khu Judheya ni Jerusalema. Adigu hawulugisa madwali khu tshivba ya Pfhumu. 18Va di vboha vama va nga bani va rwade gilima khu lithatho. Va di vbweta ndzila nya gu gi vbohise ga Jesu. 19Na va yi hamugide khu kotani nya talo nya vathu, va di lita vbatshani nya nyumba, a nga bani aromo Jesu, vaya tshula vbamwambatunu. Na va giride isoso, va di reledza lithatho nya gilima, va li tshisa vbakari ni vbakari, mbeli ga Jesu. 20Na wonide gukhodwa gwawe, Jesu a di ganela khuye: "Amasawu, siwono sago si tsetseledwe." 21Vahevbudzi nya Nayo ni vaphasi nya mhamba va di phela gu ngurangura, khavo: "Khu mani oyu a hembululago Nungungulu? Khu mani a dzi kodzago gu tsetselela siwono vbavbandze ga Nungungulu basi?" 22Aholu Jesu, na tugude maalakanyo yawe, a di khusedza lito a gu va wudzisa, khuye: "Mahingigedzo muni mu gu nawo myonyoni gwanu? 23Khu gevbini gi vbevbugidego gu ganela: gu kheni siwono sago si tsetseledwe, ni gu kheni khuga u gimbila? 24Kha nga ulo, gasi gu enu mu dzitini nya gukhenu Mwamana wa Muthu a na ni tshivba nya gutsetselele siwono mafuni momu." Khavbo avbo a di embela gilima khuye. "Nyi ngu gu ruma khuga u eme, dzega lithatho lago u gu hongola gaya." 25Khavbo avbo, gilima gi di dzegela gu khuga gi ema mahoni ya vathu vatshavbo, gi dzega lithatho laye gi gu hongola gaya, na gi gu dhumisa Nungungulu. 26Vatshavbo va di liwuga ngudzu ni gu tala khu githawo, gumogo ni gu dhumisa Nungungulu, khavo: "Muhuno hi wonide siliwugiso." 27Khavbo avbo, Jesu a di duga. A diya mana muhengisi nya khupho nya gupwani khu Levhi, na khade vbagikhalotunu gwaye nya thumo, a di mu embela, khuye: "Nyi landre." 28A di diga satshavbo, a khuga a mu landra. 29Khavbo avbo, Levhi a di rana Jesu ndrangani gwaye, a gu mu girela buzo nya khongolo. Vbamezatunu va di romo vambe vahengisi nya khupho nya vangi ni vambe vathu. 30Vafarisi ni vahevbudzi nya Nayo va di ngurangura, va gu wudzisa vapizane va Jesu, khavo: "Khu ginani mu hodzago ni gu sela gumogo ni vakhuphisi ni sighohi?" 31Jesu a di hakha, khuye: "Khandri vale va gu ni womi va vbwetago n'yanga, aholu, vadwali. 32Eni kha nya tela guta rana avo va nya gululama aholu, nyi tede guta rana sighohi gasi si wuye ndzilani nya lisine." 33Khavbo avbo, va di mu embela, khavo: "Vapizane va Johane ni vapizane va Vafarisi va ngu tala gu hala, gumogo ni gu gira milombelo matshigu nya gutale. Gasi avo vago va gu hodza ni gu sela!" 34Jesu a di va hakha, khuye: "Ina gu ngu kodzega vabangaladzi va mwane va hala mwane na ngari navo, gani? 35Ma nguta matshigu va na gu dzegedwago mwane. Gikhati gyogyo va na hala!" 36A di va embela gambe gipimaniso gegi: "Mwalo a pferulago mwendra nya muphya gasi gu gira giziva vbamwendratunu wa gale. Wa gu gira kharato, u na luza mwendra nya muphya, gambe giziva gyakone kha gi na yelana ni mwendra wa gale. 37Kha nga gambe, mwalo a thelago wadwa nya givhayi somboni nya madowo ya gale. Wa gu gira kharato, wadwa nya givhayi wu na pola sombo. Gu luzeka, kharati, wadwa ni sombo. 38Aholu, wadwa nya givhayi gu vbwetega gu thedwa madowoni nya maphya. 39Mwalo muthu nya gu na sede wadwa nya guvile gwadi a wuya a lomba wadwa nya givhayi, kholu wa ri khuye: 'Uwo nya guvile gwadi khuwo wu gu wadi.' "

will be added

X\