LUKA 4

1Jesu a di khuga khu Jordhani, na tade khu Liphuvbo nya gu Age. Liphuvbo li di mu gimbidzisa a gu hongola giwulani, 2iyo a ngaya khalago magumi mana matshigu, a gu lingwa khu Sathane. Kha nga hodza gilo matshigu yoyo yatshavbo. Guhegisani a di pwa ndzala. 3Sathane a di mu embela, khuye: "Wa gu bani uri Mwamana wa Nungungulu, embela giwindri gegi gi vbindrugedze gi khala guhodza." 4Jesu a di mu hakha, khuye: "Gu lovidwe, khu pwani: 'Muthu kha vbanyi khu guhodza basi.' " 5Sathane a di mu dzega aya naye gigomoni nya gulaphe ngudzu, aya mu yeyedza, mifumu yatshavbo nya mafu, 6a mu embela, khuye: "Nyi ngu dzi kodza gu ninga satshavbo sesi ni dzithomba dzakone, kholu nyi ningidwe satshavbo, eni neni nyi ngu dzi kodza gu ningela ga uye nyi mu nago. 7Wa gu khidzima u nyi khozela satshavbo si na bani siri sago." 8Jesu a di mu hakha, khuye: "Gu lovidwe, pwani: 'U na khozela Pfhumu Nungungulu wago. Khuye basi u na gu mu phaselago.' " 9Khavbo avbo, Sathane adiya naye Jerusalema, aya gwela naye langwetunu nya Nyumba ya Nungungulu. A Mu embela khuye: "Wa gu bani uri Mwamana wa Nungungulu, nga dzi ditsha khavba, u thega vbavbatshi, 10kholu gu lovidwe, pwani: 'Nungungulu a na rumela sirumwa saye, gasi si gu hake, 11si gu khusedza khu mandza, gasi u si dzi bayisi khu siwindri.' " 12Jesu a di mu hakha, khuye: "Gu lovidwe, pwani: 'U nga lingi Pfhumu Nungungulu wago.' " 13Nari mwalo mambe mano nya gu mu senge khayo, Sathane a di mu diga a gu hongola, aya lindredza gimbe gikhati. 14Na kutsidwe khu Liphuvbo, Jesu a di wuya Galileya. Ndruma yaye yi di pwala tigoni mule gwatshavbo. 15A di gu hevbudza dzinyumbani nya nombelo; vatshavbo vadigu mu zundza. 16Adita Nazareta, avbo a nga dandrelago avbo. Kha nga giolovedzo gyaye, a di bela nyumbani nya nombelo khu litshigu nya Sabhado. A di khuga a ema, gasi gu hevbula Milowo nya gu Age. 17Va di mu ninga libhuku la muprofeti Isaya. A di li thawuludza, a kotsana navbo gu lovidwego, pwani: 18"Liphuvbo la Pfhumu li nyi tshigede,kholu li nyi phasede gasi guya hevbudza sisiwana Mahungu nya Yadi;li nyi rumede guya tivisa dzikhumbi gutshulega gwawe, guya tivisa sikhumu guwoniswa gwawe,ni ga vasaniseki gutshulega gwawe; 19ni gu tivisa mwaga nya wuhigo wa Pfhumu." 20Khavbo avbo, a di peta libhuku, a li ningela ga githumi gya nyumbani nya nombelo, a gu khala vbavbatshi. Vathu vatshavbo va nga bani varomo nyumbani nya nombelo va di khusa maho va khedza uye. 21Khavbo avbo, a di phela gu va embela, khuye: "Ma tadzisegide muhuno magana yaya mu ngari gu ma pwago." 22Vatshavbo va di mu fakazela, gumogo ni gu liwuga khu magana nya gutale khu wuhigo ma nga bani ma gu duga khu kanani gwaye. Va di wudzisana khu gyawe khavo: "Ina khandruye oyu mwamana wa Josefe gani?" 23Gasi uye a di va embela, khuye: "Khu lisine mu na ganelani khu sipinga, na mu gu thula eni, khenu: 'N'yanga, nga dzi hawulugisa wabune; gumogo ni gu nyi embelani, khenu satshavbo hi si pwidego gu pwani u si giride Khafarnawume, nga si gira gambe tigoni momu gwago!' " 24A di engedza gambe, khuye: "Khu lisine nyi ngu mi embelani nya gukheni mwalo muprofeti a hakhwago gwadi tigoni gwawe. 25"Aholu nyi ngu mi embelani gambe, khu lisine, kheni: Matshiguni ya Eliya dzi di romo dzinoni nya dzingi tigoni ga Israeli, gikhati yi nga segegago ndzadzi myaga miraru ni livbandre na moyo migima, yi manega, ndzala nya yikhongolo tigoni gwatshavbo. 26Aholu yi mwalo noni yi nga rumedwago Eliya, vbavbandze ga noni ya Sarepta ga Sidhoniya. 27Va di romo gambe va nya sokono tigoni ga Israeli matshiguni ya muprofeti Elizewu. Aholu mwalo a nga hawulugiswago vbavbandze ga Nahamane wa Siriya." 28Na va pwide magana yaya, vatshavbo va nga bani varomo nyumbani nya nombelo va di swireka ngudzu. 29Na va khugide khu vbale, va di mu tutumisa dhoropani mule, va mu dzega va gu gwela naye mahegiso nya gigomo va nga bani va vbahede avbo lidhoropa, gasi guya mu rindrividza khavbo. 30Aholu Jesu a di vbindra khu vbakari gwawe a gu hongola. 31Khu vbale, Jesu a di relela a gu hongola Khafarnawume, dhoropani ga Galileya, iyo a nga ya simama guhevbudza vathu khu dzisabhado. 32Avo va di liwuga khu sihevbudzo saye, kholu magana yaye ma diri ni tshivba. 33Nyumbani nya nombelo a di romo muthu a nga bani ari ni liphuvbo nya guvivbe li nga khusedzago lito, li laledza, khilo: 34"Ginani hi nga gu ghohela, Jesu wa Nazareta? Wa gu tela guta hi mbembisa? Eni nyi ngu guti, gwadi: khuwe Gihathwa gya Nungungulu." 35Jesu a di li kawuka, khuye: "Degula, duga ga muthu yoyo." Gasi ilo, na li mu theside vbavbatshi khu tshivba ni tshivba, mahoni ya vathu vatshavbo, li di duga li gu hongola, nyamba mu gira gilo. 36Vatshavbo va di liwuga, va gu wudzisana khu gyawe, khavo: "Sa gu tshamusa ginani esi? Nya gu muthu a dzi kodza gu ruma maphuvbo nya guvivbe ayo, ma gu yingela!" 37Ndruma yaye yi di pwala tigoni mule gwatshavbo. 38Jesu a di duga khu nyumbani nya nombelo a gu hongola ndrangani ga Simoni iyo a ngaya manago ngogadzi wa Simoni nari ni feveri. Va di mu lomba gu a mu khedzise. 39Na nogide a mu khedzisa, a di ruma feveri gu yi mu diga. Yi di mu diga kamwe. Na yi mu digide, a di dzegela gu khuga a va sayisa. 40Na li hwide, vatshavbo avo va nga bani vari ni vadwali nya dzingumbe nya guhambanelane va di va resa gwaye. A di handzega mandza ga moyo mi moyo wawe, a va hawulugisa. 41Ga vangi vakone ma di duga maphuvbo nya guvivbe, na ma gulumela, khayo: "Uwe u Mwamana wa Nungungulu!" Aholu uye a di ma kawuka ni gu ma degudza, kholu ma di gu muti nya gukhayo khuye Kristo. 42Na gugide, a di duga a gu hongola giwulani. Vathu vatshavbo va di mu landra. Na va mu mane, va diya mu lomba, gasi a si va digi a hongola. 43Aholu uye a di va embela, khuye: "Nyi na ni fanelo nya gutivise gambe ga mambe mayigo Mahungu nya Yadi nya mufumu wa Nungungulu, kholu khiso nyi nga rumedwago iso." 44Khidzo kharati a nga bani a gu hevbudza khidzo dzinyumbani nya nombelo dza Judheya.


Copyright
Learn More

will be added

X\