LUKA 3

1Khu mwaga nya likhumi na livbandre nya gufume ga mufumeli nya khongolo wa Roma, Tiberiyu Sezari; Pilato nari mwamangulu wa Judheya, Herodhi na gu fumela Galileya, ndriyaye Filipi na gu fumela Itureya ni Trakonidhe, Lizaniya na gu fumela Abhilena, 2Anasi ni Khayifasi vari vaphasi nya vakhongolo, magana ya Nungungulu ma di rumedwa ga Johane mwamana wa Zakariya, a nga bani a gu vbanyela mu giwulani. 3Johane a di gimbila gimbila tsongoni wa Jordhani na gu hevbudza vathu khuye gu vbwetega gu hakha gubhapatisa nya gu dzi sodzise, gasi gu tsetseledwa siwono, 4kha nga gu lovidwego mu libhukuni la muprofeti Isaya, pwani: "Lomo lito li huwelelago mu giwulani, khilo:Dongiselani ndzila ya Pfhumu,lulamisani sindzilana saye; 5mikova yatshavbo yi na futedwa,ni sigomo satshavbo si na guledwa,dzindzila nya guwegele dzi na lulamiswa,nidzo nya sikidinga dzi na futeledwa. 6Vathu vatshavbo va na wona guvbanyisa ga Nungungulu." 7Johane a di embela vathu va nga bani va mu yela, gasi guya bhapatiswa, khuye: "Enu livelego nya dzinyoga, khu mani a nga mi layani gu thava tsayiso nya khongolo wu vbwetago gu vboha? 8Nonedzani khu mithumo yanu gu khenu khu lisine mu ngu vbindrugedza mavbanyelo; mu nga dzi pembi sanu, khenu: Ethu hi na ni babe Abrahama. Dzitini nya gukhenu Nungungulu a ngu dzi kodza gu vbindrugedza siwindri sesi si gu khala sanana sa Abrahama. 9Gibhewula gyomo tshinani nya misimbo. Khu kharato, simbo watshavbo wu si ningigo mihandro nya yadi wu na kokwa, wu gu rinywa niloni." 10Khavbo avbo, vathu va di mu wudzisa, khavo: "Hi na rini olu?" 11A di va hakha, khuye: "Uye a gu ni dzingandzu dzimbili a na kabane ni wule a gu mwalo; uye a gu ni silo nya guhodze a na gire nuye kharato." 12Va diya navo vahengisi nya khupho, gasi gu ya bhapatiswa. Vaya mu wudzisa, khavo: "Muhevbudzi, ginani hi fanelago gu gira?" 13A di va hakha, khuye: "Mu nga khuphisi gu vbindrisa nayo." 14Masotshwa nayo ma diya wudzisa, khayo: "Ahati ethu, ginani hi fanedego gu gira?" A di ma hakha, khuye: "Mu nga phangi muthu, mu nga mu singedzi malipha, mu nga dwaneli gimbe gilo, vbavbandze nya iso mu hakhiswago khu mufumu." 15Kha nga olu vathu vatshavbo va nga bani va lindrede, vatshavbo va di hingigedza myonyoni gwawe khavo mwendro saye Johane khuye Mesiya wakone. 16Johane a di va embela vatshavbo, khuye: "Khu lisine, eni nya gu mi bhapatisani khu mati, aholu a nguta uye a gu ni tshivba gu nyi vbindra, oyu eni nyi gu mwalo fanelo nya gunoge nyi mu tshula dzingodzi nya silato saye; uye anata mi bhapatisani khu Liphuvbo nya gu Age ni nilo. 17A na ni gitandri mandzani, gasi gu vbevberela sa githungani gyaye, bwelo khavbo a gu sefa tirigu a yi vega mu githungani, a dzega mungu wakone a wu vbisa niloni nya gukhondre kala gupindruga." 18Khu sihevbudzo nya nga esi ni simbe nya gutale Johane, adigu hevbudza vathu Mahungu nya Yadi. 19Johane a di kawuka mufumeli Herodhi khu kotani ya Herodhiya, mwangadzi wa ndriyaye, Filipi, ni kotani nya mimbe mithumo nya guvivbe a nga girago, 20aholu mithumoni yaye yatshavbo nya guvivbe, Herodhi a di engedzela gambe khu gu khothela Johane pasoni. 21Hwane nya gu vathu vatshavbo na va bhapatisidwe Jesu a diya bhapatiswa nuye. Na romo vbakari nya nombelo, ndzadzi yi di tulega; 22Liphuvbo nya gu Age li di tshiga lita mbaka vbatshani gwaye kha nga lituva. Lidita lito khu ndzadzini li nga khilo: "Uwe u Mwamana wangu nya gigodwa ngudzu. Monyo wangu watshavbo womo avbo gwago." 23Gikhati a nga phela thumo waye, Jesu adiri ni gipimo nya magumi mararu myaga. Adiri gyanana gya Josefe kha nga idzo va nga bani va gu pimisa khidzo va nya litigo. Josefe adiri gyanana gya Heli, 24wa Mathati, wa Levhi, wa Meleke, wa Jane, wa Josefe, 25wa Matatiye, wa Amosi, wa Nawume, wa Esli, wa Nagayi, 26wa Mahate, wa Matatiye, wa Semeye, wa Josefe; wa Jodha, 27wa Johane, wa Rasaye, wa Zorobhabheli, wa Salatiyeli, wa Neri, 28wa Meleke, wa Adhe, wa Khozame, wa Elimadhame, wa Eri, 29wa Josuwa, wa Eliyazare, wa Jorime, wa Mathati, wa Levhi, 30wa Simioni, wa Jodha, wa Josefe wa Jonane, wa Eliyakhime, 31wa Meleya, wa Menane, wa Mathathaye, wa Nathane, 32wa Dhavide, wa Jese, wa Obhedhe, wa Bhowazi, wa Salaye, wa Nasoni, 33wa Aminadhabhi, wa Adhimine, wa Areni, wa Esrome, wa Faresi, wa Judha, 34wa Jakobe, wa Isaki, wa Abrahama, wa Tareye, wa Nakore, 35wa Seruge, wa Ragawe, wa Faleke, wa Hebhere, wa Salaye, 36wa Khayinane, wa Arifaxadhe, wa Seme, wa Nowa, wa Lameke, 37wa Mathuzaleme, wa Enoki, wa Jarete, wa Mahalalele, wa Khayinane, 38wa Enosi, wa Sete, wa Adhamu a nga tumbulugiswa khu Nungungulu.

will be added

X\