LUKA 24

1Litshigu nya guhegule nya semana, ni mambagugya, vanyamayi vale va di hongola thowotunu ni mafura va nga bani va dongisede. 2Va diya mana giwindri gi nga bani gi segide mwanya nya lithowo na gi rindrividzidwe 3va di bela, aholu kha va mana girumbi gya Jesu. 4Na va nga gu liwuga esi, va di tumbulugedwa khu vama vavili na va ambade dzingadzu nya gungangamele. 5Kha nga ulo va nga bani va tsitside dzithamo khu hwanga, vama vale va di va embela, khavo: "Khu ginani mu vbwetago vbakari nya va nya gufa uye a vbanyago? 6Mwalo avba, wugide! Dundrugani iso a nga mi embela na nga romo Galileya, khuye: 7'Mwamana wa Muthu emede gu ningedwa mandzani nya vawoni va mu khokhothela, aholu khu litshigu nya wuraru a na wuga.' " 8Khavbo avbo, vanyamayi va di dundruga magana yaye. 9Na va wide khu thowotunu, va diya tivisa satshavbo sesi ga vapostoli vatshavbo vale nya likhumi na moyo ni ga vatshavbo vambe va nga bani vari navo. 10Vanyamayi vava adiri Mariya wa Madalene, Jowana ni Mariya, mayi wa Jakobe. Vambe vanyamayi va nga bani vari navo, va di fakaza navo silo sesi ga vapostoli, 11aholu vapostoli kha va nga khodwa khu magana yawe, va di ma wona kha nga milotelote. 12Ambari ulo, Pedro a di hongola thowotunu khu mazambo. Na nogide a holela, a di wona basi sidzingelo. A di wuya gaya, na gu liwuga iso si nga dugelelago. 13Litshigu lolo la limwedo, vavili vawe va di phara ndzila nya guhongole talalani nya gupwani Emawusi, gu nga bani gu khalela gipimo nya likhumi dzikolometru vbavbandze ga Jerusalema. 14Va di gu bhula khu esi satshavbo si nga dugelelago. 15Na varomo vbakari nya libhulo ni gu ganedzisana, Jesu a di gimbidzisa aya va manela, a gu longoloka navo. 16Va mu wone, aholu kha va nga mu tugula. 17A di va wudzisa, khuye: "Libhulo muni ilolo mu gu nalo vbakari nya ndzila?" Va di ema, na va tade khu wusiwana. 18Khavbo avbo, moyo wawe, nya gupwani khu Kleofasi, a di hakha, khuye: "Ina khuwe basi u gu pfhumba, u hangwago khiso si nga dugelela tigoni momu ga Jerusalema matshigu yaya, gani?" 19Jesu a di va wudzisa, khuye: "Gasi ginani gi nga giregago?" Va di mu embela, khavo: "Iso si nga dugelelago Jesu wa Nazareta, muprofeti nya sigiro ni magana nya tshivba mahoni ga Nungungulu ni mahoni nya vathu vatshavbo. 20Idzo a nga ningedwago khidzo khu vakhongolo nya vaphasi nya mhamba ni vathangeli vathu a songwa, vaya khu gu mu khokhothela vbagihambanotunu. 21Hi di khethu mwendro khuye anotago ata vbanyisa Israeli, aholu eli khu litshigu nya wuraru hwane nya gu bani si dugelede satshavbo sesi. 22Vomo vanyamayi nya gikwata gyathu va ngata hi thusa, kholu va diya thowotunu, ni mambagugya; 23na va yide vaya hamuga girumbi gyaye, va di wuya vata khavo va di tumbulugedwa khu sirumwa sa Nungungulu si nga va embelago khiso a ngu vbanya. 24Khavbo avbo, vambe va na gyathu va di hongola thowotunu vaya mana satshavbo kha nga idzo vanyamayi vale va nga bani va ganede khidzo. Aholu, uye wutumbu, kha va mu wona." 25Khavbo avbo, Jesu a di va embela, khuye: "Mapeminu, nya mihungo nya gulemele, mu si vbiredzeligo gu khodwa khu satshavbo si nga ganedwago khu vaprofeti! 26Gasi Kristo a di si emeli gu saniseka, afela gu bela wudhumoni gwaye, gani?" 27Khavbo avbo, a di va tshamusela milowo yatshavbo yi nga bani yi ganela khu uye, guphela khu Mosi kala gu vbedza vaprofeti vatshavbo. 28Na va gu vboha talalani va nga bani va gu hongola umo, a di gira gu khwatshi a gu vbweta gu vbindra. 29Gasi avo va di mu khadzisa, khavo: "Khala ni ethu, kholu lidambo li hwidwe, wutshigu wu nguya na wu hidzimela." A di bela, gasi guya khala navo. 30Na khade vbamezatunu, a di dzega gibaba, a gi kategisa, a gi kabanisa, a va ninga. 31Khavbo avbo, maho yawe ma di tulega, va mu tugula; aholu uye a di mwalalega mahoni gwawe. 32Va di phela gu embedzelana, khavo: "Ina kha ha nga bani hi pwa myonyo yathu na yi dzura gikhati a nga bani a gu ganela ni ethu ndzilani, a hi tshamusela Milowo gani?" 33Va di bwelela khu guvbiredza va hongola Jerusalema, iyo vangaya manago vale nya likhumi na moyo vapostoli ni vangana vawe na vari danga mwedo, 34avo va di va embela, khavo: "Khu lisine Pfhumu wugide! A dzi wonegiside ga Simoni!" 35Avo navo va di ya va tivisa, iso si nga va dugelelago ndzilani, ni idzo Jesu a nga dzi wonegisago khidzo vbagupilatunu nya gibaba. 36Na va nga gu ganela esi, Jesu a di dzi wonegisa vbakari gwawe, a gu va embela, khuye: "Gurula gu na khale ni enu!" 37Na va tade khu guthuruga ni hwanga, va di pimisa nya gukhavo githusa va gi wonago. 38Aholu a di va embela, khuye: "Mwa gu thavela ginani? Khu ginani mu gu ni gukanakana gogo myonyoni gwanu? 39Khedzani mandza yangu ni migondro yangu. Kheni kamwe. Nyi phareni; dzitini nya gukhenu githusa gi mwalo nyama ni marambo kha nga esi mu si wonago khenu nyi naso." 40Na gu ganela esi, a di va yeyedza mandza ni migondro. 41Kha nga ulo va nga bani vari vbakari nya guliwuge ni gukanakana, khu kota nya gunengele, Jesu a di va wudzise, khuye: "Mu na ni gilo nya guhodze avbovbo, gani?" 42Va di mu ninga gipandre nya ndzandzi nya guvawudwe. 43A di dzega a gu hodza mahoni gwawe. 44Khavbo avbo, a di va embela, khuye: "Khayo aya magana nyi nga mi embelani na nyi ngari nanu, gikhati nyi nga kheni: Womo fanelo nya gutadzisege satshavbo si nga lowago khu Mosi, khu Vaprofeti ni Dzindzimo, na si gu ganela khu eni." 45Khu vbale, a di va tula mapimo, gasi va pime Milowo, 46a gu va embela, khuye: "Gu lovidwe pwani Kristo emedwe khu gusaniseka, aholu khu litshigu nya wuraru a na wuga khu ga vafudego; 47ni gu pwani, khu lina laye, gu na hevbudzwa mayigoni gwatshavbo guvbindrugedza mavbanyelo ni tsetselelo nya siwono, gukhugela Jerusalema. 48Enu mu dzifakazi nya silo sesi. 49Eni nyi na mi rumelani igyo nyi nga thembiswa khu Babe wangu. Aholu indra bani mu khala dhoropani kala mu gu hakha tshivba ya vbatshani." 50Hwane nya matshigu, a di hongola navo Bhetaniya, na va vbohide, a di khusedza mandza a va kategisa. 51Na gu va kategisa, a di hambana navo, a gu khusega aya ndzadzini. 52Gasi avo, na va mu khozede, va di bwelela Jerusalema na va tade khu gunengela. 53Va di khala gikhati gyatshavbo Nyumbani ga Nungungulu va gu rungudza Nungungulu.

will be added

X\