LUKA 21

1Jesu na khuside maho, a di wona sitetema na si gu gira miningelo yawe. 2A di wona gambe gisiwana gimwegyo nya noni na gi gu rinya nigyo kwamani sikinyetana sivili nyamba phasa gilo. 3Khavbo avbo, a di khuye: "Khu lisine nyi ngu mi embelani: noni yeyi nya gisiwana yi ningede guvbindra vatshavbo, 4kholu avo va di ningela iso si nga va tshalelago, gasi iyo, wusiwanani gwaye, yi di ningela satshavbo iso yi si tumbago guvbanyani gwaye." 5Kha nga ulo vambe va nga bani va gu liwuga wumburi nya Nyumba ya Nungungulu, khavo: yi vbahidwe khu siwindri nya gumbure, ni gu ndrani gwaye yi na ni silo nya gumbure. Jesu a di va hakha, khuye: 6"Li nguta litshigu si na pfhungumudwago satshavbo sesi mu si wonago, nyamba tshala ni giwindri gimwegyo vbatshani nya giwindri gikwawe." 7Khavbo avbo, va di mu wudzisa, khavo: "Muhevbudzi, lini si na gu dugelelago satshavbo soso? Giwonegiso muni gi na yeyedzago pwani silo sesi somo vbafuvbi ni gu dugelela?" 8Jesu a di hakha, khuye: "Dzi woneleni, gasi mu si kanganyiswi khu vathu, kholu va na tumbuluga nya vangi va ganela khu lina langu, khavo: kheni Kristo. Ni gu khavo: 'Gi ngu vboha gikhati.' Mu nga va landri. 9Mwa gu pwa na gu ganedwa khu dzinyimbi ni guwugelana, mu nga thurugini, kholu si na ni fanelo nya guphele khiso si girega, aholu khandri guhegisa." 10Khavbo avbo, a di va embela, khuye: "Mayigo ma na wugelana, ni mifumu yi na wugelana niyo. 11Si na manega sirevareva nya sikhongolo; malanga nya mangi gu na manega ndzala ni mitungu nya gutale; si na tumbuluga silo nya guthise mafuni ni siwonegiso nya sikhongolo ndzadzini. 12"Aholu, guphela, si si gu wonegi satshavbo sesi, va na mi molani va mi sanisa, va mi yisa dzinyumbani nya nombelo ni gu mi khothelani mapasoni; mu na yiswa ga vafumeli khu kota nya lina langu; 13satshavbo soso si na dugelela gasi mu khale vakustumunyu. 14Vegedzani gwadi myonyoni gwanu magana yaya: Mu nga dzi garadzini khu guti ginani muno va hakhago, 15kholu eni mune nyi na mi ningani magana nya guti, ayo valala va na gumba dzi kodza gu ma kona. 16Gu na dzega ni vababe vanu, vandriyanu, valongo ni dzipari va mi ningelani. Vambe va na khu gu songwa. 17Mu na nyenywa khu litigo latshavbo khu kotani nya lina langu. 18Aholu kha gu na luzeka, ambari basi ndzudzu moyo wa hungoni gwanu. 19Khu gu timisela gwanu, mu na vbanyisa mihefemulo yanu. 20"Aholu mwa gu wona Jerusalema na gu randredwe khu dzinyimbi, dzitini nya gukhenu gu vbohide gumbemba gwaye. 21Gikhati gyogyo, avo va na gu bani varomo Judheya va na thavele sigomoni; avo va na gu bani varomo dhoropani va na duge vbavbandze, navo va na gu bani varomo mahangeni va nga wuyi dhoropani, 22kholu matshigu yoyo khya tsayiso, gasi gu tadzisega satshavbo iso si nga lowago. 23Libango li na bani liri ni va nya dzimimba navo va nya gu mamisa ga matshigu yoyo, kholu yi na bani yiromo tshanisa tigoni gwatshavbo, vathu vakone va na yi wona mihumbo. 24Nya vangi va na songwa khu matshari, vambe va na vbagedwa va gu yiswa mayigoni kha nga dzikhumbi; Jerusalema gu na gandredzedwa khu va nya mayigo kala va gira satshavbo va na sinago. 25"Gi na manega giwonegiso damboni, ngimani numo nya dzinyeledzi; mafuni gu na manega tshanisa vbakari nya mayigo, ma na thedwago rerema khu gudzuma nya mavimbi ya linene, 26Va na dzima vathu khu hwanga nya iso si na gu dugelelago tigoni, kholu ndzadzi ni mafu si na dzudzwa. 27Khavbo avbo, va na wona Mwamana wa Muthu na gu tshiga khu vbakari nya lipfhi, na tade khu tshivba nya yikhongolo ni gidhumo. 28Gikhati si na gu phelago gu dugelela satshavbo sesi, tiyani longo mu khusedza dzithamo dzanu, kholu guvbanyiswa gwanu gu na bani gu vbohide." 29A di va embela gipimaniso gegi khuye: "Khedzani nguyu ni mimbe misimbo. 30Ya gu phela gu thela nyenvu, mwa gu dzegela gu dziti khenu maronga ma vbohide. 31Kharati nugo, mwa gu wonani satshavbo sesi, mu na dzitini nya gu khenu mufumu wa Nungungulu wu vbohide. 32Khu lisine nyi ngu mi embelani: kha wu na vbindra melana yoyu na si si dugeleli satshavbo sesi. 33Ndzadzi ni mafu si na hegisa, aholu magana yangu gima kha ma na vbindra. 34"Dzi woneleni, mu nga pfhali khu limidzo ni gu leva, gambe mu nga pfhadzwi khu sigaradzo nya guvbanye! Mu ngata manwa khu litshigu lolo na mu pfhade, 35kholu ilo linata kha nga naphwi a riyidwego vbakari nya vathu vatshavbo, va mafuni. 36Khu kharato, khalani na mu dongide, na mu gu lombelela gikhati gyatshavbo, gasi mu mane tshivba nya guvbuluge ga satshavbo si na gu dugelelago, mu kodza guta manwa khu Mwamana wa Muthu na mu nga tsaramide." 37Matshigu yatshavbo Jesu a di gu hevbudza Nyumbani ga Nungungulu; vbasilambotunu a di hongola Gigomoni nya Miolivha, aya lala iyo vbavbandze. 38Vathu vatshavbo va di gu vindrugela gu hongola Nyumbani ga Nungungulu gasi guya pwa Jesu.

will be added

X\