LUKA 20

1Matshigu yale, Jesu na romo Nyumbani ga Nungungulu a hevbudza vathu ni gu tivisa Mahungu nya Yadi, a di yedwa khu vakhongolo nya vaphasi nya mhamba ni vahevbudzi nya Nayo ni madhota. 2Vaya khavo: "Nga hi embela: wa gu yi mana hayi tshivba nya gu gire esi? Khu mani a nga gu ruma?" 3A di va hakha, khuye: "Eni neni nyi na ni giwudziso gwanu. Nga nyi embelani: 4gubhapatisa ga Johane gwa guta khu ga Nungungulu, mwendro khu ga vathu?" 5Va di phela gu ganedzisana khu gyawe, khavo: "Ha gu khethu: Khu ga Nungungulu, a na khuye khu ginani mu nga mba khodwa khugo? 6Aholu ha gu khethu khu vathu, hi na rinyedwa siwindri khu vathu, kholu vatshavbo va gu wona Johane kha nga muprofeti nya lisine." 7Khavbo avbo, va di khavo: "Ahati." 8Jesu a di va embela, khuye: "Basi. Eni neni kha nyi mi embeli umo nyi yi manago tshivba nya gu gira esi." 9Khavbo avbo, Jesu a di phela gu ganela vbakari nya vathu, a gu va ninga gipimaniso gegi khuye: "Muthu nya gukari a di lima lithembwe nya miuvha, a li tshiyedza valimi, a gu endra nya gu ya vbedze matshigu nya gulaphe, vbavbandze nya mayigo. 10Vbanangotunu, a di rumela githumi gyaye ga valimi vale, gasi guya hengisa wadwa wu nga bani wu mu lumba. Aholu valimi va diya gi veta va wuya va gi tutumisa nyamba gi ninga gilo. 11A di va rumela gimbe githumi, aholu va diya gi veta nigyo, va gi tutumisa, va gi yuyutela nyamba gi ninga gilo. 12A di rumela nya wuraru gimbe githumi. Va diya gi bayisa, va gi tutumisa. 13Khavbo avbo, mune lithembwe a di khuye: 'Olu nyi na gira kharini? Nyi na va rumela mwamana wangu nya gu mu haladze ngudzu, mwendro saye va naya mu ninga githawo.' 14Aholu, na va mu wone, valimi va di, khavo: 'Khuye oyu a na tshalago ni thomba. Hongoleni hi mu songa, gasi hi tshale nayo ethu.' 15Va di mu pfinya, va gu hongola naye khabini vaya mu songa. Nga nyi embelani, anata va rini mune lithembwe? 16Anata va songa vatshavbo, a gu dzega lithembwe a tshiyedza vambe valimi." Na va pwide esi, va di khavo: "Pfhumu a na hi phase, si si hi dugeleli nya nga isoso!" 17Jesu, na va khedziside gwadi, a di va wudzisa, khuye: "Gasi ma gu vbweta gu khayo ginani magana ma nga lowago, nya gu khayo: 'Giwindri gi nga nyenywago khu vavbahi khigyo gi khadego gikoli nya nyumba?' 18Watshavbo uye a thegelago vbatshani nya giwindri gegi a na vbadzuledwa; gasi uye a thegedwago khigyo a na pfarwa." 19Avbovbo, vahevbudzi nya Nayo ni vakhongolo nya vaphasi nya mhamba va di vbweta gu mu mola, kholu va di wona nya gu khavbo gipimaniso gile gi di thula avo, aholu va di thava gidzemo. 20Va di mu riya, va mu rumela vathu nya gu ya mu linga. Avo va di hongola kha nga vathu nya vadi, na va lindrela gu khavo a na hoheta likana, gasi gu mu ningela mandzani ga mufumu. 21Ava va diya mu wudzisa, khavo: "Muhevbudzi, hi ngu dziti nya gukhethu u ngu hevbudza nya dzadi, khu hatheli vathu; wa gu hevbudza ndzila ya Nungungulu kha nga idzo li lombago khidzo lisine. 22Nga hi embela, na. Hi na ni fanelo mwendro hi mwalo nya gu livbe khupho ga Sezari?" 23Jesu, na gu ma ti makungu yawe, a di va hakha, khuye: 24"Nga nyi yeyedzani dzitsapawu dzakone. Gasi mufananiso yoyu ni lina leli khya mani?" Va di khavo: "Khya Sezari." 25Khavbo avbo, a di va embela, khuye: "Ina, ka, ningelani ga Sezari iso si gu sa Sezari, ni ga Nungungulu iso si gu sa Nungungulu." 26Kha va dzi kodza gu mana magana nya gu mu mole khayo vbakari nya vathu, aholu va di liwuga khu phindrulo yaye, va gu hamuga nigyo nya guganele. 27Va dita vasadhusi nya gukari, va ganedzago gu wuga nya vafi, vata mu wudzisa, khavo: 28"Muhevbudzi, Mosi a hi tshiyede nayo nya gukhuye a gufa mwama, a tshiya noni nya mbana sanana, ndriyaye a na hambele namu waye, gasi gu wusa ndranga ya mufi. 29Va di romo livbandre na vavili vandruye. Koma wakone a di koka ndranga, a fa nyamba tshiya sanana. 30Uye nya wuvili nuye nya wuraru va di hambela namu wawe, 31kala gu vbela vatshavbo nya livbandre na vavili, aholu kha va velega naye. 32Khu gu hegisa afa nuye nyamayi wule. 33Guwugani nya vafi, nyamayi yoyu a na lumba wevbini wakone, ulo vatshavbo va mu dzegidego kha nga mwangadzi wawe?" 34Jesu a di va hakha, khuye: "Vathu nya litigo leli khavo va dzegago ni gu dzegwa. 35Aholu vale va na manwago vari ni fanelo nya gu ya vbanya ga limbe litigo gumogo ni gu wuga khu gufani, avovo kha va dzegi gambe kha va dzegwi. 36Kha va na ngafa gambe. Va gu fana ni sirumwa sa Nungungulu. Va vbindrugedzide va gu khala sanana sa Nungungulu. Kholu va nga wuswa khu gufani. 37A gu bani ari khu mahungu nya guwuge nya vafi, ambari Mosi nuye fakazide mahungu yaya vbagipopwanatunu gile nya gu dzure, avbo a nga ranago Pfhumu khuye Nungungulu wa Abrahama, Nungungulu wa Isaki ni Nungungulu wa Jakobe. 38Khu kharato, khandri Nungungulu nya vafi, aholu, nya vathu va vbanyago. Kholu ga Nungungulu vatshavbo va ngu vbanya." 39Vambe vahevbudzi nya Nayo va di khusa lito, khavo: "Muhevbudzi, u ganede gwadi." 40Kha va nga tiyela gambe gu mu wudzisa gilo. 41Jesu a di va wudzisa, khuye: "Khu ginani mu gu khenu Mesiya gyanana gya Dhavide? 42Olu Dhavide abune a ganelago u mo nya libhuku nya Dzindzimo, khuye: 'Pfhumu a di embela Pfhumu yangu, khuye: Khala khu nyamudye gwangu, 43kala nyi gu thesa valala vago vbavbatshi nya migondro yago' 44Kha nga olu Dhavide abune a mu ranago Pfhumu, gu ngu kodzega kharini Mesiya gu khala gambe mwamana waye?" 45Khavbo avbo, a di embela vapizane vaye, na gu pwidwa khu vathu vatshavbo, khuye: 46"Dzi woneleni ni vahevbudzi nya Nayo. Avo va gu gola gu ambala dzingadzu nya gulaphe ni gu loswa khu githawo mu vathuni, ni gu khala malangani nya guthange dzinyumbani nya nombelo numo nya sipfhitsha. 47Avo va gu phanga dzinyumbani nya dzinoni, na va pfhadza gu gira nombelo nya gulaphe. Va na tsayiswa nya dzadi."

will be added

X\