LUKA 2

1Khu matshigu yale, gu di tshayedwa thetho nya gilovela nya litigo latshavbo khu mufumeli nya khongolo Sezari Augusto. 2Gilovela gegi nya guphele gi giregide gikhati Kirino a nga bani ari mufumeli wa Siriya. 3Muthu ni muthu a di ya lovedwa tigoni gwawe nya mavelego. 4Josefe nuye, a di khuga khu dhoropani ga Nazareta wa Galileya a gu hongola, tigoni ga Dhavide, a gu Bhetlehema gwa Judheya, kholu adiri wa nyumbani ya Dhavide, 5gasi guya dzi lovedzisa gumogo ni Mariya, mwangadzi waye, a nga bani ari ni mimba. 6Na varomo iyoyo, Mariya a di vbohedwa khu matshigu yaye, 7a gu velega gyanana gyaye nya matiwula, a nga gi fenengedzelago myendra a gu gi ladzisa mu gighowoloni, kholu kha va nga mana wulanga nyumbani nya vaendri. 8Vbafuvbyana vbale va di romo vahavisi va nga bani va gulala panini va ghadha sifuyo sawe, wutshigu watshavbo. 9Va di tumbulugedwa khu girumwa gya Pfhumu, va fenengedzwa khu wenengedzo wa Pfhumu, va tala khu hwanga. 10Girumwa gya Nungungulu gi di khigyo: "Mu nga thavi, nya guta mi tivisani mahungu maphya nya gutsake nya gukhongolo ngudzu, ma na gu tsakisago vathu vatshavbo. 11Muhuno olu, mu velegedwe Muvbanyisi wanu, a gu Pfhumu Kristo, tigoni ga Dhavide. 12Giwonegiso mu na guya mu tigo khigyo, khegi: mu na mana gyanana na gi fenengedzedwe myendra, na gi ladzisidwe mu gighowoloni." 13Khavbo avbo, girumwa gya Nungungulu gi di randredwa khu lidhuma nya simbe sirumwa sikwawe, na si gu rungudza Nungungulu, khiso: 14"Rungudzo ga Nungungulu ndzadzini,gurula mafuni ga sigodwa saye." 15Hwane nya gu sirumwa sa Nungungulu na si bwelede ndzadzini, vahavisi va di embedzelana, khavo: "Hongoleni Bhetlehema hiya wona iso si dugeledego, niso Pfhumu a hi tivisidego." 16Khavbo avbo, va di hongola khu guvbiredza, vaya mana Mariya ni Josefe ni gyanana, na gi ladzisidwe mu gighowoloni. 17Na va va wone, va di phela gu ganela iso va nga embedwago khu mahungu nya gyanana gile. 18Vatshavbo va nga bani va gupwa, va di liwuga khiso si nga bani si gu ganedwa khu vahavisi. 19Gasi Mariya, a di vegedza satshavbo sile khanani gwaye na gu zama guti tshamuselo waye. 20Vahavisi va di bwelela na va gu dhumisa ni gu rungudza Nungungulu khu gu wona nya gukhavo satshavbo va nga si wonago ni gu sipwa si ngu fana niso va nga embedwago khu girumwa gya Nungungulu. 21Na gu vbindride livbandre na mararu matshigu, va di mu hanisa wugwera, va mu thangisa lina la Jesu, a gu ilo a nga thangiswago khu girumwa gya Nungungulu mayi waye na si gu khuri mimba. 22Na ma vbohide matshigu nya guagiswe gwawe, gasi gu landrisa Nayo wa Mosi, Mariya ni Josefe va di dzega gyanana va gu hongola nagyo Nyumbani a Nungungulu, Jerusalema gasi guya gi bikela ga Pfhumu, 23kha nga idzo a rumago Nayo wa Pfhumu wu gu khuwo: "Mwamana watshavbo nya matiwula a na phasedwa Pfhumu." 24Josefe ni Mariya va giride gambe ningelo nya matuva mavili, khonge ni mbaha mwendro sipombana sivili, kha nga guruma nya Nayo wa Pfhumu. 25Adigu vbanya Jerusalema mwama moyo nya gupwani khu Simioni. Adiri muthu nya gululame ni githawo ga Nungungulu; adigu lindrela gu tangadziswa ga Israeli, Liphuvbo nya gu Age lidiri gwaye. 26A di embedwe khu Liphuvbo nya gu Age pwani kha nafa nyamba wona Kristo wa Pfhumu. 27Na kutsidwe khu Liphuvbo, adiya Nyumbani ga Nungungulu gikhati Jesu a nga yiswago khu vavelegi vaye, gasi guya landrisa milayo yi nga bani yi mu lumba. 28Simioni a di mu dzega, a mu wugarela, a gu rungudza Nungungulu waye, khuye: 29"Pfhumu, olu diga githumi gyago gi gu hongola khu gurula,kholu u giride iso u nga gi sambanyelago. 30Kholu nyi wonide guvbanyisa khu maho yangu, 31ugo u gu vegidego vbakari nya vathu vatshavbo. 32Uye khuye wenengedzo wu na gu wenengedzago va nya mayigo,Uye gambe gidhumo gya Israeli, ngamo yago." 33Vavelegi va Jesu va di liwuga khiso si nga bani si gu ganedwa khu kota yaye. 34Simioni a di va kategisa, a gu embela Mariya, mayi wa Jesu, khuye: "Gyanana gegi gi emisedwe gu khunguvanyisa ni gu wusa vathu nya vangi va na Israeli; gi na va nga guganedzisana; 35gasi gu wonegiswa mahingigedzo ma sihadego myonyoni nya yingi. Monyo wago wu na hekhwa khu litshari." 36Gidi romo nigyo gikhosane gimwegyo nya nyamayi gi nga bani giri muprofeti, nya gupwani khu Ane, gyanana gya Fanuweli, nya lihundzu la Aza. 37Gi vbanyide ni mwama waye livbandre na mivili myaga. Na gi tshidwe, gi di vbanya kha nga gifurugadzi kala gi nga enedza livbandre na mararu magumi na mina (84) myaga. Gi di gu khala Nyumbani ga Nungungulu, umo gi nga bani gi thumela Nungungulu wutshigu ni mihani, na gi lombelela ni gu hala. 38Ana a di vboha nuye gikhati gile, a di dhumisa Nungungulu gumogo ni gu ganela khu gyanana gile ga vatshavbo va nga bani va gu lindrela guvbanyiswa ga Jerusalema. 39Na va landriside satshavbo si nga bani si gu lombwa khu Nayo wa Pfhumu Josefe ni Mariya va di bwelela ni Jesu Galileya, tigoni ga Nazareta. 40Aholu gyanana gi di gu dandra na gi tade khu guti ni wuhigo wa Nungungulu. 41Myaga yatshavbo vavelegi va Jesu vadigu olovela gu hongola Jerusalema, khu gikhati nya Phasika. 42Nari ni likhumi na mivili myaga, va di hongola naye kha nga giolovedzo gyawe. 43Guvbelani nya buzo, va di bwelela gaya. Aholu mwamana Jesu a di tshala Jerusalema nyamba tidwa khu vavelegi. 44Va di hingigedza gukhavo womo vbakari nya vathu. Na va gimbide litshigu rumba, va di phela gu mu vbweta mu valongoni numo nya vaakelane. 45Na va mu hamugide, va di bwelela Jerusalema, guya mu vbweta. 46Hwane nya matshigu mararu va diya mu mana Nyumbani ga Nungungulu na khade vbakari nya vahevbudzi nya Nayo a va yingisa gumogo ni gu va wudzisa. 47Vatshavbo va nga mupwago va di liwuga khu guti gwaye ni dziphindrulo dzakone. 48Na va mu wone, vavelegi vaye va di thuruga; mayi waye a di khuye: "Mwanangu, u di hi sanisela ginani? Nga wona, babe wago ni eni hi di gu vbweta khu tshivba." 49Khavbo avbo, Jesu a di khuye: "Mu di nyi vbwetela ginani? Kha mu dziti nya gukhenu fanelo yangu khu gu khala nyumbani ga Babe wangu, gani?" 50Aholu avo kha va nga wu pima gwadi tshamuselo nya magana ya Jesu. 51Khavbo avbo, a di wuya navo Nazareta; adigu va yingela. Mayi waye a di vegedza satshavbo sesi monyoni gwaye. 52Gasi Jesu a di dandra khu guti, ni tanga ni wuhigo, mahoni ga Nungungulu ni ga vathu.


Copyright
Learn More

will be added

X\